ദുബായ് രാജ്യാന്തര വിമാനത്താവളത്തിലെ പാർക്കിങ് ഫീസ് ഇനി സാലിക്കിലൂടെ (Salik) ലളിതമായി അടയ്ക്കാം. ദുബായ് എയർപോർട്ടും സാലിക് കമ്പനിയും തമ്മിൽ ഒപ്പിട്ട കരാർ പ്രകാരം വിമാനത്താവളത്തിലെ മൂന്ന് ടെർമിനലുകളിലും സാലിക് ഇ-വാലറ്റ് വഴി പാർക്കിങ് ചാർജ് നൽകാൻ സാധിക്കും. ജനുവരി 22 മുതൽ പ്രാബല്യത്തിൽ വരുന്ന ഈ പുതിയ സംവിധാനത്തിലൂടെ ക്യൂ നിൽക്കാതെയും സമയം ലാഭിച്ചും യാത്രക്കാർക്ക് പാർക്കിങ് നടപടികൾ വേഗത്തിൽ പൂർത്തിയാക്കാനാകും.
ദുബായ് എയർപോർട്ട് ചെയർമാൻ ഷെയ്ഖ് അഹമ്മദ് ബിൻ സയീദ് അൽ മക്തൂം, സാലിക് ചെയർമാൻ മത്താർ അൽ തായർ എന്നിവരുടെ സാന്നിധ്യത്തിലാണ് 10 വർഷത്തേക്കുള്ള സുപ്രധാന കരാർ ഒപ്പിട്ടത്. ദുബായ് അന്താരാഷ്ട്ര വിമാനത്താവളത്തിലെ മൂന്ന് ടെർമിനലുകളിലും കാർഗോ മെഗാ ടെർമിനലിലുമായി ആകെ 7,400 പാർക്കിങ് ഇടങ്ങളിലാണ് ഈ പുതിയ സൗകര്യം ലഭ്യമാകുക. സാലിക് ഇ-വാലറ്റ് സംവിധാനത്തെ നിലവിലെ പാർക്കിങ് മാനേജ്മെന്റുമായി ബന്ധിപ്പിക്കുന്നതോടെ യാത്രക്കാർക്ക് കൂടുതൽ സുഗമമായ സേവനം ഉറപ്പാക്കാൻ സാധിക്കും.
Also Read: യുഎഇയിൽ കനത്ത മൂടൽമഞ്ഞ്! ഗതാഗത തടസ്സത്തിന് സാധ്യത, ജാഗ്രതാ നിർദ്ദേശവുമായി കാലാവസ്ഥാ കേന്ദ്രം
ഈ പരിഷ്കാരം നടപ്പിലാകുന്നതോടെ പാർക്കിങ് കേന്ദ്രങ്ങളിലെ നീണ്ട ക്യൂ ഒഴിവാക്കാനും വാഹനങ്ങൾ തടസ്സമില്ലാതെ കടന്നുപോകാനും സാധിക്കുമെന്ന് അധികൃതർ വ്യക്തമാക്കി. ഡിജിറ്റൽ പേയ്മെന്റ് രീതി പ്രോത്സാഹിപ്പിക്കുന്നതിലൂടെ വിമാനത്താവളത്തിലെ തിരക്ക് കുറയ്ക്കാനും യാത്രാനുഭവം കൂടുതൽ ആധുനികമാക്കാനും കരാർ സഹായിക്കും.
The post ദുബായ് എയർപോർട്ട് പാർക്കിങ് ഫീസ് ഇനി സാലിക്കിലൂടെ; ജനുവരി 22 മുതൽ പുതിയ സംവിധാനം appeared first on Express Kerala.
