ബാങ്ക് ഹോളിഡേ വീക്കെൻഡിൽ ഗാർഡയുടെ പ്രത്യേക പരിശോധന; റോഡിലിറങ്ങുന്നവർ ശ്രദ്ധിക്കുക

ഒക്ടോബർ ബാങ്ക് ഹോളിഡേ വീക്കെൻഡിനോടനുബന്ധിച്ച് അയർലൻഡിലുടനീളം പ്രത്യേക റോഡ് സുരക്ഷാ പരിശോധനയുമായി ഗാർഡ. ഒക്ടോബർ 22 വ്യാഴാഴ്ച മുതൽ 27 ചൊവ്വാഴ്ച വരെയാണ് പ്രത്യേക റോഡ് പൊലീസിങ് ഓപ്പറേഷൻ നടത്തുന്നത്. മദ്യപിച്ചും ലഹരിവസ്തുക്കൾ ഉപയോഗിച്ചും വാഹനമോടിക്കുന്നവരെയും അമിതവേഗക്കാരെയും നിയമലംഘകരെയും കണ്ടെത്തുകയാണ് പരിശോധനയുടെ പ്രധാന ലക്ഷ്യം.

പരിശോധന ആരംഭിച്ച ആദ്യ ദിവസം തന്നെ മദ്യപിച്ച് വാഹനമോടിച്ചതിന് 18 പേരെ അറസ്റ്റ് ചെയ്തതായി ഗാർഡ അറിയിച്ചു. അമിതവേഗത്തിൽ വാഹനമോടിച്ച 650-ലധികം ഡ്രൈവർമാരെയും വാഹനമോടിക്കുന്നതിനിടെ മൊബൈൽ ഫോൺ ഉപയോഗിക്കുകയോ സീറ്റ് ബെൽറ്റ് ധരിക്കാതിരിക്കുകയോ ചെയ്ത 95-ലധികം പേരെയും കണ്ടെത്തി.

ബാങ്ക് ഹോളിഡേ കാലയളവിൽ റോഡുകളിൽ വാഹനത്തിരക്ക് വർധിക്കാൻ സാധ്യതയുള്ളതിനാൽ ഡ്രൈവർമാർ കൂടുതൽ ജാഗ്രത പുലർത്തണമെന്ന് ഗാർഡ മുന്നറിയിപ്പ് നൽകി. നിശ്ചിത വേഗപരിധി പാലിക്കുക, മദ്യമോ ലഹരിവസ്തുക്കളോ ഉപയോഗിച്ച ശേഷം വാഹനമോടിക്കാതിരിക്കുക, യാത്രയ്ക്കിടെ സീറ്റ് ബെൽറ്റ് ധരിക്കുക, ഡ്രൈവിങ്ങിനിടെ മൊബൈൽ ഫോൺ ഉപയോഗിക്കുന്നത് ഒഴിവാക്കുക തുടങ്ങിയ നിർദേശങ്ങളും അധികൃതർ ആവർത്തിച്ചു.

റോഡ് സുരക്ഷ ഉറപ്പാക്കുന്നതിൽ എല്ലാ റോഡ് ഉപയോക്താക്കൾക്കും ഉത്തരവാദിത്തമുണ്ടെന്ന് ഗാർഡ വ്യക്തമാക്കി. യാത്ര പുറപ്പെടുന്നവർ നിയമങ്ങൾ കർശനമായി പാലിക്കുകയും സ്വന്തം സുരക്ഷയ്ക്കൊപ്പം മറ്റുള്ളവരുടെ സുരക്ഷയും ഉറപ്പാക്കുകയും വേണമെന്ന് അധികൃതർ അഭ്യർഥിച്ചു.