യൂറോസോണില്‍ വളര്‍ച്ച മന്ദം; ഫ്രാന്‍സിലെ പ്രതിസന്ധി തിരിച്ചടിയായി

ലണ്ടന്‍: ഉയരുന്ന ഊര്‍ജച്ചെലവും ഫ്രാന്‍സിലെ രാഷ്ട്രീയ-സാമ്പത്തിക അനിശ്ചിതത്വവും യൂറോസോണിലെ സ്വകാര്യ മേഖലയ്ക്ക് തിരിച്ചടിയാകുന്നു. ഒക്ടോബറിലെ ബിസിനസ് വളര്‍ച്ച നാലുമാസത്തെ ഏറ്റവും താഴ്ന്ന നിലയിലെത്തി. ഉല്‍പാദന-സേവന മേഖലകളിലെ പ്രവര്‍ത്തനം അളക്കുന്ന എസ് ആന്‍ഡ് പി ഗ്ലോബലിന്റെ പ്രാഥമിക സംയുക്ത പര്‍ച്ചേസിങ് മാനേജേഴ്സ് സൂചിക സെപ്റ്റംബറിലെ 53.1ല്‍നിന്ന് 51.9ലേക്കു താഴ്ന്നു. സാമ്പത്തിക വിദഗ്ധര്‍ പ്രതീക്ഷിച്ചിരുന്ന 52.7നേക്കാളും താഴെയാണിത്.

സൂചിക 50നു മുകളിലായതിനാല്‍ സ്വകാര്യ മേഖല ഇപ്പോഴും വളര്‍ച്ചയിലാണ്. എന്നാല്‍ വളര്‍ച്ചയുടെ വേഗം കുറഞ്ഞത് സാമ്പത്തിക മുന്നേറ്റത്തെക്കുറിച്ചുള്ള ആശങ്ക വര്‍ധിപ്പിക്കുന്നു.

ഫ്രാന്‍സില്‍ വിശ്വാസം ഇടിയുന്നു

ഫ്രാന്‍സില്‍ ഉല്‍പന്നങ്ങള്‍ക്കും സേവനങ്ങള്‍ക്കുമുള്ള ആവശ്യകത കുറഞ്ഞതോടെ സ്വകാര്യ മേഖലയിലെ പ്രവര്‍ത്തനം വീണ്ടും ചുരുങ്ങി. സര്‍ക്കാരിന്റെ ധനസ്ഥിതിയെക്കുറിച്ചുള്ള ആശങ്കകളും ഉയര്‍ന്ന കടമെടുപ്പുചെലവും രാഷ്ട്രീയ അനിശ്ചിതത്വവും ബിസിനസ് ആത്മവിശ്വാസത്തെ ബാധിച്ചു.

കോവിഡ് കാലഘട്ടം ഒഴിവാക്കിയാല്‍, 2012നുശേഷമുള്ള ഏറ്റവും താഴ്ന്ന നിലയിലാണ് ഫ്രാന്‍സിലെ ബിസിനസ് ആത്മവിശ്വാസം. യൂറോപ്പിലെ ഏറ്റവും വലിയ സമ്പദ്വ്യവസ്ഥയായ ജര്‍മനിയിലും സ്വകാര്യ മേഖലയുടെ വളര്‍ച്ച മന്ദഗതിയിലായി.

ഊര്‍ജച്ചെലവ് ഉയരുന്നു; ലാഭത്തില്‍ സമ്മര്‍ദം

പശ്ചിമേഷ്യന്‍ സംഘര്‍ഷത്തിന്റെ പശ്ചാത്തലത്തില്‍ ഊര്‍ജം, ഇന്ധനം, ഗതാഗതം എന്നിവയ്ക്കുള്ള ചെലവ് വര്‍ധിക്കുന്നത് സ്ഥാപനങ്ങളെ സമ്മര്‍ദത്തിലാക്കുന്നു. തുടര്‍ച്ചയായ രണ്ടാം മാസവും പ്രവര്‍ത്തനച്ചെലവിലെ വര്‍ധനയ്ക്ക് വേഗമേറി. എന്നാല്‍ വില്‍പനവില ഉയര്‍ത്തുന്നതിന്റെ വേഗം സെപ്റ്റംബറിനെക്കാള്‍ കുറഞ്ഞത് സ്ഥാപനങ്ങളുടെ ലാഭവിഹിതത്തില്‍ സമ്മര്‍ദമുണ്ടാകുന്നതിന്റെ സൂചനയാണ്.

നിയമനങ്ങള്‍ ഏറെക്കുറെ നിലച്ചു

യൂറോസോണിലെ പുതിയ നിയമനങ്ങള്‍ ഏറെക്കുറെ നിലച്ച അവസ്ഥയിലാണ്. സേവനമേഖലയിലെ തൊഴിലവസര വര്‍ധന അഞ്ചുമാസത്തെ ഏറ്റവും താഴ്ന്ന നിലയിലെത്തി. രണ്ടുമാസത്തെ മെച്ചപ്പെടലിനുശേഷം ഉല്‍പാദനമേഖലയിലെ ജീവനക്കാരുടെ എണ്ണവും നേരിയ തോതില്‍ കുറഞ്ഞു.

അതേസമയം, പുതിയ കയറ്റുമതി ഓര്‍ഡറുകള്‍ തുടര്‍ച്ചയായ മൂന്നാം മാസവും വര്‍ധിച്ചത് ആശ്വാസമായി. ഏതാണ്ട് നാലരവര്‍ഷത്തോളം തുടര്‍ന്ന ഇടിവിനുശേഷമുള്ള ഈ മുന്നേറ്റം, മന്ദഗതിക്കിടയിലും പ്രതീക്ഷ നല്‍കുന്നു.