‘ഐക്യരാഷ്ട്രസഭ വെറും കാണിയാകരുത്, നേതൃത്വം ഏറ്റെടുക്കണം’: അടിയന്തര ആഗോള പരിഷ്കരണത്തിന് ആഹ്വാനം ചെയ്ത് S ജയശങ്കർ | S Jaishankar

ന്യൂഡൽഹി: ആഗോള പ്രതിസന്ധികളിൽ ഐക്യരാഷ്ട്രസഭ (UN) വെറുമൊരു കാഴ്ചക്കാരനായി നിൽക്കാതെ കൃത്യമായ നേതൃത്വം നൽകാൻ തയാറാകണമെന്ന് കേന്ദ്ര വിദേശകാര്യ മന്ത്രി എസ്. ജയശങ്കർ. സംഘടന സ്വന്തം പരിമിതികളും പോരായ്മകളും തിരിച്ചറിഞ്ഞ് സ്വയം തിരുത്തലിനും പരിഷ്കരണങ്ങൾക്കും തയ്യാറാകേണ്ട സമയം അതിക്രമിച്ചുവെന്നും അദ്ദേഹം വ്യക്തമാക്കി.(S Jaishankar UN Leadership Global Crisis Reformed Multilateralism Bharat Mandapam)

ന്യൂഡൽഹിയിലെ ഭാരത് മണ്ഡപത്തിൽ വച്ച് നടന്ന ചിന്മയ മിഷന്റെ 75-ാം വാർഷികാഘോഷത്തിലും യു.എൻ ദിനാചരണ പരിപാടിയിലും സംസാരിക്കുകയായിരുന്നു അദ്ദേഹം. ഇന്ത്യയിലെ യു.എൻ റെസിഡന്റ് കോഓർഡിനേറ്റർ സ്റ്റെഫാൻ പ്രീസ്നറുടെ സാന്നിധ്യത്തിലായിരുന്നു ജയശങ്കറിന്റെ ഈ കടുത്ത വിമർശനം. ലോകരാജ്യങ്ങളെ ഒന്നിപ്പിക്കാനും ആഗോള പ്രശ്നങ്ങൾക്ക് കൂട്ടായ പരിഹാരം കണ്ടെത്താനുമാണ് എട്ട് പതിറ്റാണ്ട് മുൻപ് യു.എൻ രൂപീകരിച്ചതെന്ന് ജയശങ്കർ ഓർമ്മിപ്പിച്ചു.

“പരിപൂർണ്ണമല്ലാത്ത ഒരു ലോകത്താണ് നാം ജീവിക്കുന്നത്, എന്നാൽ കൂടുതൽ മെച്ചപ്പെട്ട ഒന്നിലേക്ക് എത്താൻ നാം നിരന്തരം ശ്രമിക്കണം. ഐക്യരാഷ്ട്രസഭയെ സംബന്ധിച്ച് തങ്ങളുടെ പോരായ്മകൾ തിരിച്ചറിഞ്ഞ് സ്വയം മെച്ചപ്പെടുകയാണ് വേണ്ടത്. ബഹുമുഖ നയങ്ങളുടെ പരിഷ്കരണത്തിനായുള്ള വാദം ദിനംപ്രതി ശക്തമാകുകയാണ്. ലോകത്തിന്റെ ഭൂരിഭാഗം പ്രദേശങ്ങളെയും തീരുമാനങ്ങൾ എടുക്കുന്നതിൽ നിന്ന് മാറ്റിനിർത്താൻ കഴിയില്ല.” – വിദേശകാര്യ മന്ത്രി പറഞ്ഞു.

യുക്രൈൻ, മിഡിൽ ഈസ്റ്റ് (ഗൾഫ്) മേഖലകളിലെ യുദ്ധങ്ങൾ ഉൾപ്പെടെയുള്ള ആഗോള വിഷയങ്ങളിൽ തീരുമാനമെടുക്കാൻ കഴിയാതെ ഐക്യരാഷ്ട്രസഭ പ്രസക്തിയില്ലാത്ത ഒന്നായി മാറിയെന്ന് ഈ മാസം നടന്ന കൗടില്യ ഇക്കണോമിക് കോൺക്ലേവിലും ജയശങ്കർ ചൂണ്ടിക്കാട്ടിയിരുന്നു. സുരക്ഷാ കൗൺസിൽ (UNSC) നിലവിൽ ആഗോള താല്പര്യങ്ങളെ പ്രതിനിധീകരിക്കുന്നില്ലെന്നും, സംഘടന പൂർണ്ണമായും സ്തംഭിച്ച അവസ്ഥയിലാണെന്നും അദ്ദേഹം വിമർശിച്ചിരുന്നു. സഹകരണത്തിന്റെ മനോഭാവത്തോടെ ആഗോള വെല്ലുവിളികളെ നേരിടാൻ എല്ലാ രാജ്യങ്ങളും ഒറ്റക്കെട്ടായി നിൽക്കണമെന്ന് അദ്ദേഹം ആഹ്വാനം ചെയ്തു.

Story Summary

Speaking at an event marking UN Day and the 75th anniversary of Chinmaya Mission at Bharat Mandapam, External Affairs Minister S. Jaishankar urged the United Nations to show strong leadership during global crises instead of being a spectator. Emphasizing the urgent need for “reformed multilateralism,” Jaishankar asserted that the UN must acknowledge its shortcomings and reform its decision-making structure to include all regions of the world.