ശബരിമല സന്നിധാനത്ത് മകരവിളക്കിനുള്ള ഒരുക്കങ്ങൾ പൂർത്തിയായി. ജനുവരി 14 മകരവിളക്ക് ദർശനം നടക്കാനിരിക്കെ സന്നിധാനത്തും പരിസരത്തും ലക്ഷക്കണക്കിന് തീർത്ഥാടകരാണ് ഇതിനോടകം തമ്പടിച്ചിരിക്കുന്നത്. എരുമേലി പേട്ടതുള്ളൽ കഴിഞ്ഞ് കൂടുതൽ തീർത്ഥാടകർ മല ചവിട്ടുന്നതോടെ സന്നിധാനത്ത് വലിയ തിരക്കാണ് അനുഭവപ്പെടുന്നത്.
പന്തളം കൊട്ടാരത്തിൽ നിന്ന് അയ്യപ്പ സ്വാമിക്ക് ചാർത്താനുള്ള തിരുവാഭരണവും വഹിച്ചുകൊണ്ടുള്ള ഘോഷയാത്ര നാളെ വൈകുന്നേരത്തോടെ സന്നിധാനത്തെത്തും. തുടർന്ന് തിരുവാഭരണം ചാർത്തിയുള്ള ദീപാരാധന നടക്കുമ്പോഴാണ് പൊന്നമ്പലമേട്ടിൽ മകരവിളക്ക് തെളിയുക. ഭക്തർക്ക് സുഗമമായ ദർശനം ഉറപ്പാക്കാൻ വിപുലമായ സുരക്ഷാ സജ്ജീകരണങ്ങളാണ് പോലീസ് സംവിധാനിച്ചിരിക്കുന്നത്.
Also Read: കോൺഗ്രസിനെതിരെ ഗുരുതര ആരോപണവുമായി എം ബി രാജേഷ്
അതേസമയം മകരവിളക്ക് പ്രമാണിച്ച് ശബരിമലയിൽ കനത്ത സുരക്ഷയും നിയന്ത്രണങ്ങളും ഏർപ്പെടുത്തിയതായി ദേവസ്വം മന്ത്രി വി.എൻ. വാസവൻ അറിയിച്ചു. തിരക്ക് നിയന്ത്രിക്കുന്നതിന്റെ ഭാഗമായി നാളെ 35,000 തീർത്ഥാടകർക്ക് മാത്രമാണ് സന്നിധാനത്തേക്ക് പ്രവേശനം അനുവദിക്കുക. സന്നിധാനത്തിന് പുറമെ മകരവിളക്ക് ദർശിക്കാൻ സാധിക്കുന്ന പുൽമേട് ഉൾപ്പെടെയുള്ള എല്ലാ മേഖലകളിലും പോലീസിന്റെയും അർദ്ധസൈനിക വിഭാഗങ്ങളുടെയും നേതൃത്വത്തിൽ കർശന നിരീക്ഷണം ഏർപ്പെടുത്തിയിട്ടുണ്ട്. ഭക്തരുടെ സുരക്ഷ ഉറപ്പാക്കാൻ എല്ലാവിധ ഒരുക്കങ്ങളും പൂർത്തിയായതായും മന്ത്രി വ്യക്തമാക്കി.
The post മകരവിളക്കിനായി ശബരിമല ഒരുങ്ങി; തിരുവാഭരണ ഘോഷയാത്ര നാളെ എത്തും appeared first on Express Kerala.
