അന്താരാഷ്ട്ര ബഹിരാകാശ നിലയത്തിലെ (ISS) ക്രൂ-11 ദൗത്യസംഘം നിശ്ചയിച്ചതിലും നേരത്തെ ഭൂമിയിലേക്ക് മടങ്ങുന്നു. അമേരിക്കൻ സമയം ജനുവരി 14 വൈകുന്നേരം 5 മണിക്ക് (ഇന്ത്യൻ സമയം ജനുവരി 15 പുലർച്ചെ 3:30) സ്പേസ് എക്സിന്റെ ഡ്രാഗൺ പേടകം നിലയത്തിൽ നിന്ന് അൺഡോക്കിംഗ് നടത്തും. ദൗത്യം പൂർത്തിയാക്കി മടങ്ങുന്ന നാലംഗ സംഘത്തിന് വികാരനിർഭരമായ യാത്രയയപ്പാണ് നിലയത്തിൽ നൽകിയത്. മടക്കയാത്രയ്ക്ക് മുന്നോടിയായി നാസ കമാൻഡർ മൈക്ക് ഫിൻക് നിലയത്തിന്റെ ചുമതല റഷ്യൻ ബഹിരാകാശ ഏജൻസിയായ റോസ്കോസ്മോസിന്റെ സെർഗെ കുഡ്-സ്വേർചോവിന് കൈമാറി.
നാസയുടെ ഒരു ബഹിരാകാശ സഞ്ചാരിക്കുണ്ടായ ആരോഗ്യപ്രശ്നമാണ് പെട്ടെന്നുള്ള ഈ മടക്കയാത്രയ്ക്ക് കാരണമായത്. ഇതാദ്യമായാണ് അന്താരാഷ്ട്ര ബഹിരാകാശ നിലയത്തിന്റെ ചരിത്രത്തിൽ ഒരു സഞ്ചാരിയുടെ ശാരീരിക അസ്വസ്ഥത മൂലം ഒരു ദൗത്യം വെട്ടിച്ചുരുക്കുന്നത്. പേടകത്തിലെ സഞ്ചാരിയുടെ സ്വകാര്യതയും സുരക്ഷയും മുൻനിർത്തി, എന്താണ് ആരോഗ്യപ്രശ്നമെന്നോ ഏത് സഞ്ചാരിക്കാണ് അസ്വസ്ഥത ഉണ്ടായതെന്നോ ഉള്ള വിവരങ്ങൾ വെളിപ്പെടുത്താൻ നാസ ഇതുവരെ തയ്യാറായിട്ടില്ല. കാലിഫോർണിയ തീരത്തിനടുത്ത് ശാന്തസമുദ്രത്തിലാണ് പേടകം ഇറങ്ങുക.
Also Read: ആപ്പിളിന്റെ അടുത്ത വിസ്മയം ഐഫോൺ 17e; ഫ്ലാഗ്ഷിപ്പ് കരുത്തുമായി പുതിയ മോഡൽ
കഴിഞ്ഞ കുറച്ചുദിവസങ്ങളായി അന്താരാഷ്ട്ര ബഹിരാകാശ നിലയത്തിലെ ഒരു സഞ്ചാരിക്ക് ഗുരുതരമായ ആരോഗ്യപ്രശ്നങ്ങളുണ്ടെന്ന് നാസ സൂചിപ്പിച്ചിരുന്നു. ഇതിന്റെ ഭാഗമായി ജനുവരി എട്ടിന് സെന കാർഡ്മാനും മൈക്ക് ഫിൻകെയും ചേർന്ന് നടത്താനിരുന്ന ബഹിരാകാശ നടത്തം (Spacewalk) അവസാന നിമിഷം റദ്ദാക്കിയിരുന്നു. നിലയത്തിന്റെ പവർ സിസ്റ്റത്തിലെ അറ്റകുറ്റപ്പണികൾക്കായിരുന്നു ഈ സ്പേസ് വാക്ക് നിശ്ചയിച്ചിരുന്നത്. സെനയ്ക്കോ മൈക്കിനോ ആണ് പ്രശ്നമെന്ന് നാസ ഔദ്യോഗികമായി സ്ഥിരീകരിച്ചിട്ടില്ലെങ്കിലും, സുരക്ഷാ കാരണങ്ങളാൽ ദൗത്യം പാതിവഴിയിൽ അവസാനിപ്പിക്കാൻ ഏജൻസി തീരുമാനിക്കുകയായിരുന്നു.
നിശ്ചയിച്ച സമയക്രമം അനുസരിച്ച് ജനുവരി 15ന് പുലർച്ചെയോടെ ഡ്രാഗൺ പേടകം ഭൂമിയിൽ സ്പ്ലാഷ് ഡൗൺ ചെയ്യും. അടിയന്തരമായി മടങ്ങേണ്ടി വന്നതിനാൽ വലിയ തയ്യാറെടുപ്പുകളോടെയാണ് നാസയുടെയും സ്പേസ് എക്സിന്റെയും ഗ്രൗണ്ട് ടീം ഈ ലാൻഡിംഗിനെ നോക്കിക്കാണുന്നത്. ദൗത്യം നേരത്തെ അവസാനിപ്പിക്കുന്നത് പരീക്ഷണങ്ങളെ ബാധിക്കുമെങ്കിലും സഞ്ചാരിയുടെ ജീവനും സുരക്ഷയ്ക്കുമാണ് മുൻഗണനയെന്ന് ബഹിരാകാശ ഏജൻസി വ്യക്തമാക്കി.
The post സഞ്ചാരിയുടെ ആരോഗ്യപ്രശ്നം; ക്രൂ-11 ദൗത്യം പാതിവഴിയിൽ നിർത്തി നാസ appeared first on Express Kerala.
