തൃശ്ശൂരിൽ അഞ്ചു ദിവസങ്ങളിലായി അരങ്ങേറുന്ന 64-ാമത് കേരള സ്കൂൾ കലോത്സവത്തിന് ഇന്ന് ആവേശകരമായ തുടക്കമാകും. തേക്കിൻകാട് മൈതാനിയിലെ ‘സൂര്യകാന്തി’ എന്ന പ്രധാന വേദിയിൽ രാവിലെ 10 മണിക്ക് മുഖ്യമന്ത്രി പിണറായി വിജയൻ കലോത്സവത്തിന് തിരി തെളിക്കും. 25 വേദികളിലായി നടക്കുന്ന ഈ കൗമാര കലാമേളയിൽ 250 ഇനങ്ങളിലായി പതിനയ്യായിരത്തോളം പ്രതിഭകളാണ് മാറ്റുരയ്ക്കുന്നത്. ജനുവരി 18 വരെ നീളുന്ന ഈ മഹാമേള തൃശ്ശൂരിനെ കലയുടെ ഉത്സവ നഗരിയാക്കി മാറ്റും.
വിവിധ പൂക്കളുടെ പേരുകളാണ് കലോത്സവ വേദികൾക്ക് നൽകിയിരിക്കുന്നത്. വേദികളുടെ പട്ടികയിൽ നിന്ന് ‘താമര’ ഒഴിവാക്കിയത് വലിയ രാഷ്ട്രീയ വിവാദങ്ങൾക്കും പ്രതിഷേധങ്ങൾക്കും കാരണമായിരുന്നുവെങ്കിലും, സർക്കാർ ഇടപെട്ട് 15-ാം നമ്പർ വേദിക്ക് താമര എന്ന് പേര് നൽകി വിവാദങ്ങൾ പരിഹരിച്ചു. മുൻപ് വേദി ഒന്നിന് നൽകിയിരുന്ന ‘ഡാലിയ’ എന്ന പേര് മാറ്റി പകരം താമര എന്ന് നൽകിയതായും, അനാവശ്യ തർക്കങ്ങൾ ഒഴിവാക്കുകയാണ് ലക്ഷ്യമെന്നും മന്ത്രി വി. ശിവൻകുട്ടി വ്യക്തമാക്കി. ഈ തീരുമാനത്തെ ബിജെപി ഉൾപ്പെടെയുള്ള സംഘടനകൾ സ്വാഗതം ചെയ്തിട്ടുണ്ട്.
The post പൂരനഗരിയിൽ വസന്തം; സംസ്ഥാന സ്കൂൾ കലോത്സവം ഇന്ന് മുതൽ appeared first on Express Kerala.
