സ്ഥാനാർഥി നിർണയ നടപടികൾ വേഗത്തിലാക്കാൻ കോൺഗ്രസ് സ്ക്രീനിംഗ് കമ്മിറ്റി തിരുവനന്തപുരത്ത് ചർച്ചകൾ സജീവമാക്കി. സമിതി അധ്യക്ഷൻ മധുസൂദനൻ മിസ്ത്രി എ.കെ. ആന്റണി ഉൾപ്പെടെയുള്ള മുതിർന്ന നേതാക്കളുമായി കൂടിക്കാഴ്ച നടത്തിയതിന് പിന്നാലെ, എംപിമാരുടെയും മറ്റ് പ്രധാന നേതാക്കളുടെയും അഭിപ്രായങ്ങൾ ഇന്ന് കേൾക്കും. ചർച്ചകൾക്ക് ശേഷം സ്ഥാനാർഥി നിർണയത്തിനുള്ള കൃത്യമായ മാനദണ്ഡങ്ങൾ സമിതി രൂപീകരിക്കും. രണ്ടു ഘട്ടങ്ങളിലായി സ്ഥാനാർഥി പ്രഖ്യാപനം പൂർത്തിയാക്കാനാണ് കോൺഗ്രസ് ലക്ഷ്യമിടുന്നത്.
അതേസമയം, നിയമസഭാ തെരഞ്ഞെടുപ്പിൽ മുസ്ലിം ലീഗ് യുവാക്കൾക്ക് കൂടുതൽ പ്രാധാന്യം നൽകണമെന്നും ‘മൂന്ന് ടേം’ നയം നടപ്പിലാക്കണമെന്നും യൂത്ത് ലീഗ് സംസ്ഥാന ജനറൽ സെക്രട്ടറി പി.കെ. ഫിറോസ് ആവശ്യപ്പെട്ടു. ലീഗിന് കൂടുതൽ സീറ്റുകൾക്ക് അർഹതയുണ്ടെന്നും മുന്നണി ബന്ധത്തെ ബാധിക്കാതെ ഈ ആവശ്യം ഉന്നയിക്കുമെന്നും അദ്ദേഹം വ്യക്തമാക്കി. വിജയസാധ്യത മാത്രം മാനദണ്ഡമാക്കി സ്ഥാനാർഥികളെ നിശ്ചയിക്കണമെന്നാണ് യുവാക്കളുടെ പക്ഷം.
Also Read: ഐഷ പോറ്റിയുടേത് വഞ്ചനയുടെ രാഷ്ട്രീയം, വിഡി സതീശന്റെ പ്രഖ്യാപനത്തിന് എതിരായ രാഷ്ട്രീയ പ്രവേശനം!
കോഴിക്കോട് ജില്ലയിലെ സ്ഥാനാർഥി പട്ടികയെച്ചൊല്ലി കോൺഗ്രസിനുള്ളിൽ തർക്കം രൂക്ഷമായിരിക്കുകയാണ്. നാദാപുരം, കൊയിലാണ്ടി ഉൾപ്പെടെയുള്ള അഞ്ച് സീറ്റുകളിൽ ചില നേതാക്കളുടെ പേരുകൾ പ്രചരിക്കുന്നതിനെതിരെ കെ.പി.സി.സി രാഷ്ട്രീയ കാര്യ സമിതി അംഗം എൻ. സുബ്രഹ്മണ്യൻ അടക്കമുള്ളവർ രംഗത്തെത്തി. സീറ്റ് മോഹികളാണ് ഇത്തരം പ്രചാരണങ്ങൾക്ക് പിന്നിലെന്നും സ്ഥാനാർഥികളെ തീരുമാനിക്കുന്നത് ഡി.സി.സി അല്ലെന്നും ഇവർ തുറന്നടിച്ചു. മുതിർന്ന നേതാവ് മുല്ലപ്പള്ളി രാമചന്ദ്രനെ അപമാനിക്കുന്ന തരത്തിലുള്ള പ്രചാരണങ്ങളിലും ഒരു വിഭാഗം നേതാക്കൾ കടുത്ത അതൃപ്തി രേഖപ്പെടുത്തി.
The post നിയമസഭാ തെരഞ്ഞെടുപ്പ്; സ്ഥാനാർഥി നിർണയം വേഗത്തിലാക്കാൻ കോൺഗ്രസ് appeared first on Express Kerala.
