മണിപ്പൂരിൽ തെരഞ്ഞെടുപ്പ് ഒരുക്കങ്ങൾ തകൃതി; സംഘർഷ ബാധിത മേഖലകളിൽ കേന്ദ്ര തെരഞ്ഞെടുപ്പ് കമ്മീഷന്റെ അവലോകന സന്ദർശനം, മുതിർന്ന ഉദ്യോഗസ്ഥൻ മനീഷ് ഗാർഗിന്റെ നേതൃത്വത്തിൽ ഉന്നതതല യോഗങ്ങൾ പൂർത്തിയായി
Current: മലയാളം
ഇംഫാല്‍: കലാപബാധിതമായ മണിപ്പൂരില്‍ വരാനിരിക്കുന്ന നിയമസഭാ തെരഞ്ഞെടുപ്പിന്റെ തയ്യാറെടുപ്പുകളും സുരക്ഷാ സാഹചര്യങ്ങളും വിലയിരുത്തുന്നതിനായി മുതിര്‍ന്ന ഉദ്യോഗസ്ഥന്‍ മനീഷ് ഗാര്‍ഗ് ഉള്‍പ്പെടുന്ന 12 അംഗ കേന്ദ്ര തെരഞ്ഞെടുപ്പ് കമ്മീഷന്‍ സംഘം സംസ്ഥാനം സന്ദര്‍ശിച്ചു.
അടുത്ത വര്‍ഷം ആദ്യത്തോടെ തെരഞ്ഞെടുപ്പ് നടക്കാനിരിക്കുന്ന പശ്ചാത്തലത്തിലാണ് സീനിയര്‍ ഡെപ്യൂട്ടി ഇലക്ഷന്‍ കമ്മീഷണര്‍ മനീഷ് ഗാര്‍ഗിന്റെ നേതൃത്വത്തിലുള്ള സംഘം ഡല്‍ഹിയില്‍ നിന്ന് ഇംഫാലിലെത്തി അടച്ചിട്ട മുറിയില്‍ നിര്‍ണ്ണായക യോഗങ്ങള്‍ ചേര്‍ന്നത്.
ഒക്ടോബര്‍ 21 മുതല്‍ 23 വരെ നീണ്ട സന്ദര്‍ശനത്തില്‍ സംസ്ഥാന പോലീസ് നോഡല്‍ ഓഫീസര്‍മാരുമായും ജില്ലാ കളക്ടര്‍മാരുമായും പോലീസ് സൂപ്രണ്ടുമാരുമായും സംഘം സുരക്ഷാ അവലോകനം നടത്തി.
വംശീയ അക്രമങ്ങള്‍ തുടരുന്ന പശ്ചാത്തലത്തില്‍ സമാധാനപരമായി തെരഞ്ഞെടുപ്പ് നടത്തുന്നതിനുള്ള സുരക്ഷാ ക്രമീകരണങ്ങളാണ് പ്രധാനമായും ചര്‍ച്ച ചെയ്തത്.
അക്രമസംഭവങ്ങളില്‍ നാല് പേര്‍ കൊല്ലപ്പെട്ടതിനെ തുടര്‍ന്ന് താഴ്വര മേഖലകളില്‍ ഹര്‍ത്താല്‍ ആചരിക്കുന്നതിനിടയിലായിരുന്നു തെരഞ്ഞെടുപ്പ് കമ്മീഷന്റെ ഈ നിര്‍ണ്ണായക സന്ദര്‍ശനം.
അതേസമയം, തെരഞ്ഞെടുപ്പ് കമ്മീഷനിലെ ആഭ്യന്തര ഭിന്നതകളുടെ പശ്ചാത്തലത്തിലാണ് ഈ സന്ദര്‍ശനം നടന്നതെന്നതും ശ്രദ്ധേയമാണ്. ജൂലൈയില്‍ ഭരണവിഭാഗത്തിന്റെ അധികച്ചുമതല ലഭിച്ചതിന് പിന്നാലെ മനീഷ് ഗാര്‍ഗ് സ്വയം ചുമതലകള്‍ വിഭജിച്ചു നല്‍കിയതുമായി ബന്ധപ്പെട്ട് തെരഞ്ഞെടുപ്പ് കമ്മീഷണര്‍മാരായ സുഖ്ബീര്‍ സിംഗ് സന്ധുവും വിവേക് ജോഷിയും കാബിനറ്റ് സെക്രട്ടറിക്ക് പരാതി നല്‍കിയിരുന്നു.
ഈ പരാതി പിന്നീട് ചീഫ് ഇലക്ഷന്‍ കമ്മീഷണര്‍ ജ്ഞാനേഷ് കുമാറിന്റെ ഓഫീസിലേക്ക് കൈമാറുകയും ചെയ്തിട്ടുണ്ട്. ഇതിനിടയിലാണ് മണിപ്പൂരിലെ തെരഞ്ഞെടുപ്പ് മുന്നൊരുക്കങ്ങള്‍ക്ക് കമ്മീഷന്‍ തുടക്കം കുറിച്ചിരിക്കുന്നത്.
