പ്രധാനമന്ത്രിയുടെ വസതിക്ക് സമീപത്തെ വ്യോമസേന ഗോൾഫ് കോഴ്‌സ് അടച്ചു; ഭൂമിക്ക് പറയാനുള്ളത് നൂറ്റാണ്ടിന്റെ ചരിത്രം | Delhi Air Force golf course closure

ന്യൂഡൽഹി: പ്രധാനമന്ത്രിയുടെ വസതിക്ക് സമീപമുള്ള ഇന്ത്യൻ വ്യോമസേനയുടെ ഗോൾഫ് കോഴ്‌സ് അടച്ചു. ന്യൂഡൽഹിയിലെ എയർഫോഴ്‌സ് സ്റ്റേഷനിലുള്ള എയർഫോഴ്‌സ് സ്പോർട്സ് കോംപ്ലക്സിന് ഒക്ടോബർ 28 മുതൽ ഇനിയൊരു ഉത്തരവുണ്ടാകുന്നതുവരെ അടച്ചിടാൻ നിർദേശം നൽകി. ഭൂമി തിരിച്ചുനൽകണമെന്ന് ആവശ്യപ്പെട്ട് കേന്ദ്ര ഭവന-നഗരകാര്യ മന്ത്രാലയത്തിന് കീഴിലുള്ള ലാൻഡ് ആൻഡ് ഡെവലപ്‌മെന്റ് ഓഫീസ് (എൽ ആൻഡ് ഡി ഒ) നേരത്തേ നോട്ടീസ് നൽകിയിരുന്നു. വ്യോമസേനാ മേധാവി എയർ ചീഫ് മാർഷൽ എ.പി. സിങ്ങിന്റെ വിരമിക്കലിനോടനുബന്ധിച്ച് നടത്താനിരുന്ന പരമ്പരാഗത ഗോൾഫ് യാത്രയോടെയുള്ള യാത്രയയപ്പും ഇതോടെ മുടങ്ങി. (Delhi Air Force golf course closure)

ഗോൾഫ് കോഴ്‌സിനു പുറമെ കായിക സൗകര്യങ്ങൾ, നീന്തൽക്കുളം, ഭക്ഷണശാലകൾ എന്നിവയും സമുച്ചയത്തിലുണ്ട്. പ്രധാനമന്ത്രിയുടെ വസതിയുള്ള ലോക് കല്യാൺ മാർഗിന് സമീപത്തെ ഭൂമികൾ തിരിച്ചുപിടിക്കുന്ന കേന്ദ്രസർക്കാർ നടപടികളുടെ ഭാഗമായാണ് ഈ നീക്കവും. ഡൽഹി റേസ് ക്ലബ്ബിന്റെ ഭൂമിയും ജയ്പൂർ പോളോ ഗ്രൗണ്ടും ഇതിനകം സർക്കാർ തിരിച്ചുപിടിച്ചിട്ടുണ്ട്. ഡൽഹി ജിംഖാന ക്ലബ്ബിന്റെ പാട്ടക്കരാറും അവസാനിപ്പിച്ചു. ഈ ഭൂമികൾ ഭാവിയിൽ എന്തിനായി ഉപയോഗിക്കുമെന്ന കാര്യത്തിൽ സർക്കാർ വ്യക്തമായ പ്രഖ്യാപനം നടത്തിയിട്ടില്ല.

കുതിരപ്പന്തയത്തിൽനിന്ന് വ്യോമസേനാ കേന്ദ്രത്തിലേക്ക്

ഗോൾഫ് കോഴ്‌സ് സ്ഥിതിചെയ്യുന്ന ഭൂമിയുടെ ചരിത്രം ഒരു നൂറ്റാണ്ടിലേറെ പഴക്കമുള്ളതാണ്. 1926ൽ ബ്രിട്ടീഷ് ഭരണകൂടം ഡൽഹി റേസ് ക്ലബ്ബിന് ഭൂമി പാട്ടത്തിന് നൽകിയതോടെയാണ് തുടക്കം. കുതിരപ്പന്തയത്തിനായി ഇവിടെ ഓവൽ ട്രാക്ക് നിർമിച്ചു. 1927ൽ സമീപത്തെ വില്ലിങ്ഡൺ എയർഫീൽഡിൽ ആദ്യ വാണിജ്യ വിമാനം എത്തിയതായും അടുത്ത വർഷം ഡൽഹി ഫ്ലയിങ് ക്ലബ് രൂപീകരിക്കപ്പെട്ടതായും ചരിത്രരേഖകൾ പറയുന്നു.
രണ്ടാം ലോകമഹായുദ്ധകാലത്ത് ഈ പ്രദേശം വ്യോമസേനാ പ്രവർത്തനങ്ങൾക്കും പരിശീലനത്തിനും പ്രാധാന്യമുള്ള കേന്ദ്രമായി മാറി. 1941ൽ റോയൽ എയർഫോഴ്‌സ് ഇവിടെ എയർ ലാൻഡിങ് സ്കൂൾ ആരംഭിച്ചു. പിന്നീട് 1947 സെപ്റ്റംബർ ഒന്നിന് റേസ് കോഴ്‌സ് പ്രദേശത്ത് എയർഫോഴ്‌സ് സ്റ്റേഷൻ ന്യൂഡൽഹി രൂപീകരിച്ചു. സ്വാതന്ത്ര്യാനന്തരം റേസ് ക്ലബ്ബിന്റെ ഭൂമിയുടെ ഒരു ഭാഗവും വ്യോമസേന ഏറ്റെടുത്തു. കാലക്രമേണ ഈ പ്രദേശം ഗോൾഫ് ഉൾപ്പെടെയുള്ള കായികപ്രവർത്തനങ്ങളുടെ കേന്ദ്രമായി മാറി.

ഭൂമിയുടെ ഉടമസ്ഥതയെച്ചൊല്ലി തർക്കം

സ്പോർട്സ് കോംപ്ലക്സ് പ്രവർത്തിച്ചിരുന്ന ഭൂമിയുടെ ഉടമസ്ഥതയും കൈമാറ്റവും സംബന്ധിച്ച് വർഷങ്ങളായി ചോദ്യങ്ങളുണ്ട്. 2014ൽ കേന്ദ്ര വിവരാവകാശ കമ്മീഷനു നൽകിയ വിശദീകരണത്തിൽ, റേസ് കോഴ്‌സ് മേഖലയിലെ നഗരവികസന മന്ത്രാലയത്തിന്റെ ഭൂമിയിൽ 126.948 ഏക്കർ വ്യോമസേന ഉപയോഗിക്കുന്നുണ്ടെന്ന് ഡൽഹിയിലെ ഡിഫൻസ് എസ്റ്റേറ്റ്സ് ഓഫീസർ അറിയിച്ചിരുന്നു. പ്രതിരോധ മന്ത്രാലയത്തിന് അനുവദിച്ച 100 ഏക്കറിൽ 52.80 ഏക്കർ മാത്രമാണ് ഔദ്യോഗികമായി കൈമാറിയതെന്നും അദ്ദേഹം വ്യക്തമാക്കിയിരുന്നു. ഏകദേശം 30 ഏക്കറുള്ള സ്പോർട്സ് കോംപ്ലക്സ് നഗരവികസന മന്ത്രാലയത്തിന്റെ ഭൂമിയിലാണെന്നാണ് അന്നത്തെ വിശദീകരണം.
2017ൽ തന്നെ റേസ് കോഴ്‌സ്, പോളോ ഗ്രൗണ്ട്, സ്പോർട്സ് കോംപ്ലക്സ്, ഓൾഡ് വില്ലിങ്ഡൺ ക്യാംപ്, സന്തുഷ്ടി ഷോപ്പിങ് കോംപ്ലക്സ് എന്നിവയ്ക്ക് ഒഴിപ്പിക്കൽ നോട്ടീസ് നൽകിയിരുന്നു. എന്നാൽ തുടർനടപടികൾ നീണ്ടുപോയി. ഈ വർഷം മാർച്ചിൽ റേസ് ക്ലബ്ബിനും പോളോ അസോസിയേഷനും വീണ്ടും നോട്ടീസ് നൽകി. ജൂൺ 13ന് പോളോ ഗ്രൗണ്ടും ഓഗസ്റ്റ് 27ന് റേസ് ക്ലബ്ബും സർക്കാർ ഏറ്റെടുത്തു. ഒക്ടോബർ 28ന് ഗോൾഫ് കോഴ്‌സും അടച്ചതോടെ ലോക് കല്യാൺ മാർഗിന് സമീപത്തെ ഭൂമികൾ തിരിച്ചുപിടിക്കുന്ന നടപടിയിൽ പുതിയ അധ്യായം തുറന്നു.

കൊളോണിയൽ കാലത്തെ പൈതൃകം, ഭൂമിയുടെ വാണിജ്യമൂല്യം, ദേശീയ സുരക്ഷാ പ്രാധാന്യം എന്നിവയെല്ലാം ഈ ഭൂമികളെച്ചൊല്ലിയുള്ള ചർച്ചകളിൽ ഉയർന്നിട്ടുണ്ട്. ഭൂമി തിരിച്ചുപിടിക്കുന്നതിലൂടെ കേന്ദ്രസർക്കാർ എന്ത് പദ്ധതികളാണ് നടപ്പാക്കാൻ ഉദ്ദേശിക്കുന്നതെന്ന് വ്യക്തമാകാനിരിക്കുന്നതേയുള്ളൂ.

Summary: The Indian Air Force Sports Complex and its golf course near the Prime Minister’s residence in New Delhi were closed on October 28 following notices seeking the return of the land. The move is part of a wider government effort to reclaim prime land parcels near Lok Kalyan Marg, with a history stretching back to the Delhi Race Club’s lease in 1926.