2013 ബലാത്സംഗക്കേസ്: തരുൺ തേജ്പാലിന്റെ 10 വർഷം തടവ് മരവിപ്പിക്കാനാവില്ലെന്ന് സുപ്രീംകോടതി | Supreme Court Tarun Tejpal sentence
Current: മലയാളം
ന്യൂഡൽഹി: 2013ലെ ബലാത്സംഗക്കേസിൽ മാധ്യമപ്രവർത്തകൻ തരുൺ തേജ്പാലിന് ബോംബെ ഹൈക്കോടതിയുടെ ഗോവ ബെഞ്ച് വിധിച്ച 10 വർഷത്തെ തടവ് മരവിപ്പിക്കണമെന്ന ആവശ്യം സുപ്രീംകോടതി തള്ളി. ശിക്ഷ മരവിപ്പിച്ച് അപ്പീൽ നടപടികൾ പൂർത്തിയാകുന്നതുവരെ ജാമ്യം അനുവദിക്കണമെന്നായിരുന്നു തേജ്പാലിന്റെ ആവശ്യം. ജസ്റ്റിസുമാരായ എം.എം. സുന്ദ്രേഷ്, പി.ബി. വരാലെ എന്നിവരടങ്ങിയ ബെഞ്ചാണ് ഹർജി പരിഗണിച്ചത്. (Supreme Court Tarun Tejpal sentence)
പ്രോസിക്യൂഷൻ സാക്ഷികളുടെ മൊഴികളും കോടതിയിൽ ഹാജരാക്കിയ രേഖകളും ഇരയും തേജ്പാലും തമ്മിലുള്ള സന്ദേശങ്ങളും പ്രാഥമികമായി പരിശോധിച്ചപ്പോൾ ശിക്ഷ മരവിപ്പിക്കാൻ മതിയായ കാരണങ്ങളില്ലെന്ന് ബെഞ്ച് നിരീക്ഷിച്ചു. എന്നാൽ കേസിന്റെ അന്തിമ മെറിറ്റുകളിലേക്ക് കടക്കുന്നില്ലെന്നും ശിക്ഷ മരവിപ്പിക്കണമെന്ന ആവശ്യം മാത്രമാണ് പരിഗണിക്കുന്നതെന്നും കോടതി വ്യക്തമാക്കി. തേജ്പാലിനുവേണ്ടി മുതിർന്ന അഭിഭാഷകരായ കപിൽ സിബലും സിദ്ധാർഥ് അഗർവാളും ഹാജരായി. ഇരയുടെ ആരോപണം തെറ്റാണെന്ന് വാദിച്ച പ്രതിഭാഗം, 2013 നവംബർ ഏഴിന് ഗോവയിലെ ഹോട്ടലിൽ നടന്നതായി പറയുന്ന സംഭവത്തെക്കുറിച്ച് നവംബർ 22നാണ് എഫ്‌ഐആർ രജിസ്റ്റർ ചെയ്തതെന്നും ചൂണ്ടിക്കാട്ടി. ലിഫ്റ്റിലെ സിസിടിവി ദൃശ്യങ്ങളും സാങ്കേതിക പരിശോധനകളും ലൈംഗികാതിക്രമം നടന്നുവെന്ന ആരോപണത്തെ പിന്തുണയ്ക്കുന്നില്ലെന്നും പ്രതിഭാഗം വാദിച്ചു.
ഗോവ സർക്കാരിനുവേണ്ടി ഹാജരായ സോളിസിറ്റർ ജനറൽ തുഷാർ മേത്ത ഈ വാദങ്ങളെ എതിർത്തു. തേജ്പാൽ ഇരയോട് മാപ്പ് ചോദിച്ചുകൊണ്ട് അയച്ച സന്ദേശങ്ങൾ അദ്ദേഹം കോടതിയുടെ ശ്രദ്ധയിൽപ്പെടുത്തി. വിചാരണക്കോടതിയിൽ ഇരയോട് അനുചിതമായ ചോദ്യങ്ങൾ ചോദിച്ചിരുന്നുവെന്നും ഹൈക്കോടതി വിചാരണയുടെ രീതിയെ വിമർശിച്ചിരുന്നുവെന്നും അദ്ദേഹം ചൂണ്ടിക്കാട്ടി. 2021ൽ വിചാരണക്കോടതി തേജ്പാലിനെ കുറ്റവിമുക്തനാക്കിയിരുന്നു. എന്നാൽ ഈ വിധി തെറ്റാണെന്ന് നിരീക്ഷിച്ച ബോംബെ ഹൈക്കോടതിയുടെ ഗോവ ബെഞ്ച് 2026 ഓഗസ്റ്റിൽ കുറ്റവിമുക്തനാക്കിയ നടപടി റദ്ദാക്കി 10 വർഷത്തെ കഠിനതടവ് വിധിക്കുകയായിരുന്നു. തുടർന്ന് സുപ്രീംകോടതി നിർദേശപ്രകാരം സെപ്റ്റംബർ 14ന് തേജ്പാൽ കീഴടങ്ങി. ഹൈക്കോടതി വിധിക്കെതിരായ തേജ്പാലിന്റെ അപ്പീലും ശിക്ഷ വർധിപ്പിക്കണമെന്ന ഗോവ സർക്കാരിന്റെ അപ്പീലും സുപ്രീംകോടതി പരിഗണിക്കാൻ തീരുമാനിച്ചിട്ടുണ്ട്.
Summary: The Supreme Court refused to suspend the 10-year prison sentence imposed on former Tehelka editor Tarun Tejpal in the 2013 rape case. The court admitted his appeal against the conviction but declined to grant relief while the appeal is pending.
