വിനോദസഞ്ചാരികളുടെ മറവിൽ കടൽവഴി ആക്രമണത്തിന് പരിശീലനം; കറാച്ചിക്ക് സമീപം ലഷ്‌കർ ഭീകരർക്ക് സ്കൂബ ഡൈവിങ് പരിശീലനമെന്ന് റിപ്പോർട്ട് | Lashkar-e-Taiba maritime training
Current: മലയാളം
പാകിസ്ഥാനിലെ കറാച്ചിക്ക് സമീപമുള്ള ചർണ ദ്വീപിൽ വിനോദസഞ്ചാരികളുടെ വേഷത്തിൽ ലഷ്‌കർ-ഇ-തൊയ്ബ ഭീകരർ കടൽവഴിയുള്ള ആക്രമണങ്ങൾക്ക് പരിശീലനം നടത്തുന്നതായി രഹസ്യാന്വേഷണ വൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട്. സ്കൂബ ഡൈവിങ്, കോംബാറ്റ് സ്വിമ്മിങ്, വെള്ളത്തിനടിയിലെ മറ്റ് പ്രവർത്തനങ്ങൾ എന്നിവയിലാണ് പരിശീലനം നൽകുന്നതെന്നാണ് വിവരം. കറാച്ചിയിൽനിന്ന് ഏകദേശം 50 കിലോമീറ്റർ അകലെയുള്ള ചർണ ദ്വീപ് നിരവധി ഡൈവിങ് കേന്ദ്രങ്ങളുള്ള വിനോദസഞ്ചാര മേഖലയാണ്. (Lashkar-e-Taiba maritime training)
ലഷ്‌കറിന്റെ ‘ദവ മറൈൻ വിങ്’ അഥവാ ‘സദാ-എ-ഹുരിയത്ത്’ എന്നറിയപ്പെടുന്ന വിഭാഗത്തിൽപ്പെട്ടവരാണ് പരിശീലനം നേടുന്നതെന്നാണ് വിവരം. പാകിസ്ഥാനിലെ ലഷ്‌കറിന്റെ അനുബന്ധ സംഘടനയായ പാകിസ്ഥാൻ മർക്കസി മുസ്‌ലിം ലീഗിലെ (പിഎംഎംഎൽ) അംഗങ്ങളാണ് പരിശീലകരെന്നും റിപ്പോർട്ടിൽ പറയുന്നു. വിനോദത്തിനായി ദ്വീപിലെത്തുന്ന സഞ്ചാരികളെന്ന രീതിയിലാണ് ഭീകരരെ അവിടെ എത്തിക്കുന്നതെന്നാണ് രഹസ്യാന്വേഷണ വൃത്തങ്ങളുടെ വെളിപ്പെടുത്തൽ. പാക് അധീന കശ്മീരിലെ മംഗ്ല അണക്കെട്ടിലും ഭീകരരുടെ ലോഞ്ച് പാഡുകളിലെ നീന്തൽക്കുളങ്ങളിലും നേരത്തെ ലഷ്‌കർ സമാനമായ പരിശീലനം നടത്തിയതായി കണ്ടെത്തിയിരുന്നു. കടൽമാർഗമുള്ള പ്രവർത്തനങ്ങൾ വിപുലീകരിക്കാൻ ഭീകരസംഘടന ശ്രമിക്കുന്നതായും റിപ്പോർട്ടിൽ പറയുന്നു. 2008ലെ മുംബൈ ഭീകരാക്രമണത്തിൽ പങ്കെടുത്ത ലഷ്‌കർ ഭീകരർ കടൽമാർഗമാണ് നഗരത്തിലെത്തിയത്. 2008 മുതൽ ചെറിയൊരു സമുദ്ര വിഭാഗം സംഘടനയ്ക്കുണ്ടായിരുന്നെങ്കിലും ഇപ്പോൾ വലിയ തോതിലുള്ള കടൽ ആക്രമണങ്ങൾക്കായി തയ്യാറെടുക്കുകയാണെന്നാണ് വിവരം.
കടൽമാർഗം ഉയർന്നേക്കാവുന്ന ഭീഷണികളെക്കുറിച്ച് ഇന്ത്യൻ സുരക്ഷാ ഏജൻസികൾക്ക് വിവരങ്ങൾ ലഭിച്ചിട്ടുണ്ടെന്നും പ്രതിരോധ നടപടികൾ സ്വീകരിച്ചുവരികയാണെന്നും റിപ്പോർട്ട് പറയുന്നു. 2025 മേയിൽ നടന്ന ഓപ്പറേഷൻ സിന്ദൂറിൽ പാകിസ്ഥാനിലെ മുരിദ്കെയിലുള്ള ലഷ്‌കർ ആസ്ഥാനമുൾപ്പെടെ ഒൻപത് ഭീകരകേന്ദ്രങ്ങളും അടിസ്ഥാന സൗകര്യങ്ങളും ഇന്ത്യ തകർത്തിരുന്നു. അതിനിടെ, സമൂഹമാധ്യമങ്ങളിലൂടെ യുവാക്കളെ തീവ്രവാദത്തിലേക്ക് ആകർഷിക്കുകയും റിക്രൂട്ട് ചെയ്യുകയും ചെയ്തിരുന്ന ലഷ്‌കർ ശൃംഖലയെക്കുറിച്ചുള്ള അന്വേഷണത്തിന്റെ ഭാഗമായി കശ്മീരിൽ കൗണ്ടർ ഇന്റലിജൻസ് കശ്മീർ (സിഐകെ) ആറിടങ്ങളിൽ പരിശോധന നടത്തി. ബുദ്ഗാം, ശ്രീനഗർ, ബിജ്ബെഹറ, അനന്ത്നാഗിലെ മട്ടൻ, പുൽവാമയിലെ ഒരു ഗ്രാമം എന്നിവിടങ്ങളിലായിരുന്നു പരിശോധന. ഡിജിറ്റൽ ഉപകരണങ്ങളും രേഖകളും ഉൾപ്പെടെയുള്ളവ പിടിച്ചെടുത്തതായി അന്വേഷണ വൃത്തങ്ങൾ അറിയിച്ചു.
പരിശോധന നടത്തിയ വീടുകളിലൊന്ന് 22കാരനായ ബിരുദധാരി മുഹമ്മദ് യാസീൻ മിറിന്റേതാണ്. ഇയാളുടെ മാതാവ് തബസ്സും ഷഹീൻ പാകിസ്ഥാൻ പൗരയാണ്. 2025 ഏപ്രിൽ 29ന് ഇന്ത്യ വിട്ട ഇവർ പിന്നീട് തിരിച്ചെത്തിയിട്ടില്ല. വിസ നിഷേധിക്കപ്പെട്ടതാണോ അതോ സ്വന്തം തീരുമാനപ്രകാരം മടങ്ങാത്തതാണോ എന്ന് വ്യക്തമല്ല. മകനുമായി ഇവർ നിരന്തരം ബന്ധം പുലർത്തിയിരുന്നുവെന്നും ഈ ബന്ധം അന്വേഷണവിധേയമാണെന്നും റിപ്പോർട്ടിൽ പറയുന്നു.
Summary: Lashkar-e-Taiba terrorists are reportedly receiving scuba diving and underwater combat training at Charna Island near Karachi while posing as tourists. Indian intelligence agencies are monitoring the alleged maritime threat as Kashmir’s Counter Intelligence wing conducts raids against a Lashkar recruitment network.
