‘ഔദ്യോഗിക മാനദണ്ഡങ്ങൾ പാലിച്ചില്ല’: പെട്രോളിൽ 31% എഥനോൾ ചേർക്കുന്നുവെന്ന കർണാടക സർക്കാരിൻ്റെ വാദം തള്ളി പൊതുമേഖലാ എണ്ണക്കമ്പനികൾ | OMCs Reject Karnataka Claim

ബെംഗളൂരു: സംസ്ഥാനത്തെ ചില റീട്ടെയിൽ ഔട്ട്ലെറ്റുകളിൽ വിൽക്കുന്ന പെട്രോളിൽ 31 ശതമാനം വരെ എഥനോൾ അടങ്ങിയിട്ടുണ്ടെന്ന കർണാടക സർക്കാരിന്റെ വാദം തള്ളി പൊതുമേഖലാ എണ്ണ വിതരണ കമ്പനികൾ. ഔദ്യോഗികവും സാങ്കേതികവുമായ പരിശോധനാ മാനദണ്ഡങ്ങൾ പാലിക്കാതെയാണ് സർക്കാർ ഈ നിഗമനത്തിൽ എത്തിയതെന്ന് കമ്പനികൾ വ്യക്തമാക്കി.(OMCs Reject Karnataka Claim Ethanol Blending 31 Percent In Petrol)

നിർദിഷ്ട 20 ശതമാനം പരിധിക്ക് മുകളിൽ എഥനോൾ കലർത്തി പെട്രോൾ വിതരണം ചെയ്യുന്നുവെന്ന് ആരോപിച്ച കർണാടക സർക്കാർ, ചില സാമ്പിളുകളിൽ എഥനോളിന്റെ അളവ് 31.2 ശതമാനം വരെ ഉയർന്നതായി രേഖപ്പെടുത്തിയതിനെ തുടർന്ന് കമ്പനികൾക്കെതിരെ നടപടി വേണമെന്ന് ആവശ്യപ്പെട്ടിരുന്നു. ബെംഗളൂരു, കോലാർ, ചിക്ബല്ലാപ്പൂർ, മംഗളൂരു, തുമകൂരു തുടങ്ങിയ സ്ഥലങ്ങളിൽ നിന്ന് ശേഖരിച്ച സാമ്പിളുകൾ പരിശോധിച്ചതിന്റെ അടിസ്ഥാനത്തിലാണ് ഈ ആരോപണമെന്ന് ഭക്ഷ്യ-സിവിൽ സപ്ലൈസ്, ലീഗൽ മെട്രോളജി മന്ത്രി മാധ്യമങ്ങളോട് പറഞ്ഞിരുന്നു.

എന്നാൽ, ഇന്ത്യൻ ഓയിൽ കോർപ്പറേഷൻ (IOCL), ഭാരത് പെട്രോളിയം (BPCL), ഹിന്ദുസ്ഥാൻ പെട്രോളിയം (HPCL) എന്നീ കമ്പനികൾ സംയുക്തമായി പുറത്തിറക്കിയ പ്രസ്താവനയിലാണ് സർക്കാരിന്റെ അവകാശവാദങ്ങളെ എതിർത്തത്. ബ്യൂറോ ഓഫ് ഇന്ത്യൻ സ്റ്റാൻഡേർഡ്സിന്റെ (BIS) പ്രിസ്‌ക്രൈബ് ചെയ്ത മാനദണ്ഡങ്ങൾ പാലിച്ചാണ് കർണാടക ഉൾപ്പെടെയുള്ള രാജ്യത്തുടനീളം E20 പെട്രോൾ വിതരണം ചെയ്യുന്നതെന്ന് കമ്പനികൾ വ്യക്തമാക്കി. പരിശോധനയ്ക്കായി സാമ്പിളുകൾ ശേഖരിച്ച രീതിയിലും സ്വീകരിച്ച നടപടിക്രമങ്ങളിലും കമ്പനികൾ സംശയം പ്രകടിപ്പിച്ചു.

മാനദണ്ഡങ്ങൾ അനുസരിച്ച് സാമ്പിളുകൾ എടുക്കുമ്പോൾ എണ്ണക്കമ്പനി പ്രതിനിധികളുടെ സാന്നിധ്യമുണ്ടായിരിക്കണം. എന്നാൽ 2026 ഒക്ടോബറിൽ സർക്കാർ നടത്തിയ പരിശോധനയിൽ കമ്പനി പ്രതിനിധികളെ പങ്കെടുപ്പിച്ചില്ലെന്ന് എണ്ണക്കമ്പനികൾ ചൂണ്ടിക്കാട്ടി. കൂടാതെ, അംഗീകൃത ലാബുകളിൽ പരിശോധിക്കുന്നതിന് പകരം തേർഡ് പാർട്ടി ലാബ് റിപ്പോർട്ടുകളാണ് സർക്കാർ ആശ്രയിച്ചതെന്നും, പുനഃപരിശോധനയ്ക്കുള്ള അവസരം തങ്ങൾക്ക് നിഷേധിച്ചുവെന്നും ഇവർ വ്യക്തമാക്കി.

Story Summary

Public sector Oil Marketing Companies (IOCL, BPCL, HPCL) rejected the Karnataka government’s claim that petrol sold in parts of the state contained up to 31% ethanol. The OMCs stated that the sampling and testing procedures conducted in October 2026 violated established statutory protocols, used unapproved third-party laboratories, and denied dealers and companies the right to verification or re-testing.