വാട്ട്‌സ്ആപ്പിലൂടെ നേരിട്ട് സേവിങ്‌സ് അക്കൗണ്ട് തുറക്കാം; പുതിയ സൗകര്യവുമായി ഉജ്ജീവൻ സ്മോൾ ഫിനാൻസ് ബാങ്ക് | Ujjivan Small Finance Bank
കൊച്ചി: രാജ്യത്ത് ആദ്യമായി വാട്ട്‌സ്ആപ്പ് ബാങ്കിംഗ് സംവിധാനത്തിലൂടെ നേരിട്ട് സേവിങ്‌സ് അക്കൗണ്ട് തുറക്കാനുള്ള സൗകര്യം അവതരിപ്പിച്ച് ഉജ്ജീവൻ സ്മോൾ ഫിനാൻസ് ബാങ്ക് (Ujjivan Small Finance Bank). ബാങ്കിന്റെ പ്രത്യേക ആപ്പ് ഡൗൺലോഡ് ചെയ്യാതെ തന്നെ യോഗ്യരായ പുതിയ ഉപഭോക്താക്കൾക്ക് വാട്ട്‌സ്ആപ്പിലൂടെ അക്കൗണ്ട് ആരംഭിക്കാം. ഇതിനായി 900 208 2121 എന്ന നമ്പറിലാണ് ബന്ധപ്പെടേണ്ടത്.
അക്കൗണ്ട് തുറക്കാൻ ചെയ്യേണ്ടത്
പുതിയ ഉപഭോക്താക്കൾ 900 208 2121 എന്ന നമ്പറിലേക്ക് വാട്ട്‌സ്ആപ്പിൽ ‘ഹായ്’ എന്ന് സന്ദേശമയച്ച ശേഷം ‘ഓപ്പൺ സേവിങ്‌സ് അക്കൗണ്ട്’ എന്ന ഓപ്ഷൻ തിരഞ്ഞെടുക്കണം. തുടർന്ന് മൊബൈൽ നമ്പറും പാൻ കാർഡും പരിശോധിക്കും. വ്യക്തിഗത വിവരങ്ങൾ സ്ഥിരീകരിക്കുന്നതിനായി സി-കെവൈസി അല്ലെങ്കിൽ ആധാർ വെരിഫിക്കേഷൻ നടപടികളും പൂർത്തിയാക്കണം.
അടുത്തതായി ഇഷ്ടമുള്ള സേവിങ്‌സ് അക്കൗണ്ട് തിരഞ്ഞെടുക്കുകയും പ്രാരംഭ നിക്ഷേപം നടത്തുകയും വേണം. തുടർന്ന് വീഡിയോ കെവൈസി പൂർത്തിയാക്കുന്നതോടെ അക്കൗണ്ട് സജീവമാക്കാനാകും.
വാട്ട്‌സ്ആപ്പിലൂടെ 50ലധികം ബാങ്കിംഗ് സേവനങ്ങൾ
പുതിയ ആപ്ലിക്കേഷൻ ഇൻസ്റ്റാൾ ചെയ്യുകയോ ഉപയോഗിക്കാൻ പഠിക്കുകയോ ചെയ്യാതെ, ഉപഭോക്താക്കൾക്ക് പരിചിതമായ വാട്ട്‌സ്ആപ്പ് പ്ലാറ്റ്‌ഫോമിലൂടെ ബാങ്കിംഗ് സേവനങ്ങൾ ലഭ്യമാക്കുകയാണ് ലക്ഷ്യമെന്ന് ബാങ്ക് അറിയിച്ചു.
നിലവിൽ ബാങ്കിന്റെ 15 ലക്ഷത്തിലധികം ഉപഭോക്താക്കൾ വാട്ട്‌സ്ആപ്പ് ബാങ്കിംഗ് ഉപയോഗിക്കുന്നുണ്ട്. അക്കൗണ്ട് ബാലൻസ് അറിയുക, സമീപകാല ഇടപാടുകൾ പരിശോധിക്കുക, അക്കൗണ്ട് സ്റ്റേറ്റ്‌മെന്റ് ലഭിക്കുക, നിക്ഷേപ-വായ്പാ വിവരങ്ങൾ അറിയുക, വിവിധ സേവനങ്ങൾക്ക് അപേക്ഷിക്കുക തുടങ്ങിയ 50ലധികം സേവനങ്ങൾ ഇതിലൂടെ ലഭിക്കും. ഏറ്റവും അടുത്തുള്ള ബാങ്ക് ശാഖയും എടിഎമ്മും കണ്ടെത്താനുള്ള സൗകര്യവുമുണ്ട്.
ബാങ്കിന്റെ ആകെ സേവന അപേക്ഷകളിൽ 22 ശതമാനവും നിലവിൽ വാട്ട്‌സ്ആപ്പ് ബാങ്കിംഗ് വഴിയാണ് കൈകാര്യം ചെയ്യുന്നതെന്ന് ബാങ്ക് വ്യക്തമാക്കി.
പുതിയ ഫീച്ചറുകളും ലക്ഷ്യമിടുന്നു
ഉപഭോക്താക്കൾക്ക് ദൈനംദിന ജീവിതത്തിൽ പരിചിതമായ പ്ലാറ്റ്‌ഫോമിലൂടെ ബാങ്കിംഗ് സേവനങ്ങൾ കൂടുതൽ ലളിതമായി ലഭ്യമാക്കാനാണ് പുതിയ സംവിധാനത്തിലൂടെ ലക്ഷ്യമിടുന്നതെന്ന് ഉജ്ജീവൻ സ്മോൾ ഫിനാൻസ് ബാങ്ക് ഇടക്കാല സിഇഒയും എക്‌സിക്യൂട്ടീവ് ഡയറക്ടറുമായ കരോൾ ഫുർട്ടാഡോ പറഞ്ഞു.
എഐ അധിഷ്ഠിത മറുപടികൾ, വിവിധ ഭാഷകളിലുള്ള സേവനം, വോയ്‌സ് അസിസ്റ്റൻസ് തുടങ്ങിയ സവിശേഷതകൾ ഭാവിയിൽ വാട്ട്‌സ്ആപ്പ് ബാങ്കിംഗിൽ ഉൾപ്പെടുത്താനും ബാങ്ക് പദ്ധതിയിടുന്നുണ്ട്.
Story Summary:
Ujjivan Small Finance Bank has introduced a facility that allows eligible new customers to open savings accounts directly through WhatsApp Banking, without downloading a separate app. Customers can initiate the process by messaging ‘Hi’ to 900 208 2121 and completing the required verification and video KYC. The bank says more than 1.5 million customers already use its WhatsApp Banking platform, which offers over 50 services.
