“നിലവാരമില്ലാത്ത മനുഷ്യൻ, നാണമില്ലേ?”; പാർലമെന്റിൽ മുൻ പ്രധാനമന്ത്രി നഫ്താലി ബെന്നറ്റുമായി വാക്കുതർക്കത്തിലേർപ്പെട്ട് നെതന്യാഹുവിന്റെ ഭാര്യ സാറ | Sara Netanyahu Naftali Bennett argument

ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ ഭാര്യ സാറ നെതന്യാഹുവും മുൻ പ്രധാനമന്ത്രി നഫ്താലി ബെന്നറ്റും തമ്മിലുള്ള രൂക്ഷമായ വാക്കുതർക്കത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നു. ഒക്ടോബറിലെ തിരഞ്ഞെടുപ്പിന് പിന്നാലെ പുതിയ സർക്കാർ രൂപീകരണം പൂർത്തിയാകാത്തതിനാൽ കാവൽ പ്രധാനമന്ത്രിയായി തുടരുന്ന നെതന്യാഹു ചൊവ്വാഴ്ച പാർലമെന്റായ നെസറ്റിൽ നടത്തിയ പ്രസംഗത്തിനിടെയായിരുന്നു സംഭവം. ( Sara Netanyahu Naftali Bennett argument)

ദേശീയ ഐക്യത്തെക്കുറിച്ച് നെതന്യാഹു സംസാരിക്കവെ ബെന്നറ്റ് ഇടപെട്ട് ഖത്തറുമായുള്ള നെതന്യാഹുവിന്റെ ബന്ധത്തെക്കുറിച്ചുള്ള ആരോപണങ്ങളിലും 2023 ഒക്ടോബർ ഏഴിലെ ആക്രമണത്തെക്കുറിച്ചുള്ള അന്വേഷണത്തിലും മറുപടി ആവശ്യപ്പെട്ടു. ഇതോടെ ഇസ്രയേൽ ദേശീയ സുരക്ഷാ മന്ത്രി ഇതാമർ ബെൻ ഗ്വിർ ബെന്നറ്റിനെ ‘നാണമില്ലാത്തവൻ’, ‘വിലയില്ലാത്തവൻ’ എന്നിങ്ങനെ വിശേഷിപ്പിച്ചു.

തർക്കത്തിൽ സാറ നെതന്യാഹുവും ഇടപെട്ടതോടെ രംഗം കൂടുതൽ വഷളായി. അറബ് ജോയിന്റ് ലിസ്റ്റിനൊപ്പം ഇരിക്കുന്ന ബെന്നറ്റ് കാപട്യം കാണിക്കുകയാണെന്ന് ആരോപിച്ച സാറ, ‘നിലവാരമില്ലാത്ത മനുഷ്യൻ, നാണക്കേട്’ എന്നും വിളിച്ചു. ഇതിന്റെ ദൃശ്യങ്ങളാണ് ഇപ്പോൾ വ്യാപകമായി പ്രചരിക്കുന്നത്. അതേസമയം, നെതന്യാഹുവിന്റെ പ്രസംഗത്തിനെതിരെ മുൻ ഇസ്രയേൽ പ്രതിരോധ സേനാ മേധാവി ഗാദി ഐസൻകോട്ടും രംഗത്തെത്തി. രാജ്യത്തിന്റെ പ്രധാനപ്പെട്ട ചടങ്ങ് സ്വന്തം രാഷ്ട്രീയ താൽപര്യങ്ങൾക്കായി ഉപയോഗിക്കുകയാണ് നെതന്യാഹുവെന്ന് ആരോപിച്ച അദ്ദേഹം പ്രസംഗത്തെ ‘ലജ്ജാകരം’ എന്ന് വിശേഷിപ്പിച്ചു. പ്രധാനമന്ത്രി സ്ഥാനത്ത് തുടരാനുള്ള നെതന്യാഹുവിന്റെ യോഗ്യതയെയും അദ്ദേഹം ചോദ്യം ചെയ്തു.

അന്താരാഷ്ട്ര സമ്മർദം നേരിടേണ്ടിവന്നാലും ആണവായുധ ശേഷിയുള്ള ഇറാനെയും നിലവിലെ ഭരണകൂടത്തെയും അംഗീകരിക്കാൻ ഇസ്രയേൽ നിർബന്ധിതരാകരുതെന്ന് നെതന്യാഹു പ്രസംഗത്തിൽ മുന്നറിയിപ്പ് നൽകിയിരുന്നു. ഇറാൻ ഇസ്രയേലിന്റെ നിലനിൽപ്പിന് ഭീഷണിയാണെന്നും അദ്ദേഹം ആരോപിച്ചു. ഇസ്രയേലിൽ അടുത്ത സർക്കാർ രൂപീകരിക്കാനുള്ള രാഷ്ട്രീയ നീക്കങ്ങൾക്കിടെയാണ് നേതാക്കൾ തമ്മിലുള്ള പോര് ശക്തമാകുന്നത്. 120 അംഗ നെസറ്റിൽ ഭൂരിപക്ഷം ഉറപ്പിക്കാൻ ആവശ്യമായ 61 പേരുടെ പിന്തുണ നെതന്യാഹുവിനോ ഐസൻകോട്ടിനോ നിലവിൽ ലഭിച്ചിട്ടില്ലെന്നാണ് റിപ്പോർട്ട്.

Summary: Sara Netanyahu was involved in a heated exchange with former Israeli Prime Minister Naftali Bennett during Benjamin Netanyahu’s address to the Knesset. The confrontation comes amid political tensions following Israel’s October elections and efforts to form a new government.