എസ്എസ്എൽസി പരീക്ഷ മാർച്ച് 1 മുതൽ; ഹയർ സെക്കൻഡറി പരീക്ഷകൾ മാർച്ച് 2ന് തുടങ്ങും. മെയ് ആദ്യവാരം ഫലം. പരീക്ഷാ രജിസ്ട്രേഷൻ നവംബർ 18ന് ആരംഭിക്കും
തിരുവനന്തപുരം: കേരളത്തിലെ അടുത്ത അധ്യയന വർഷത്തെ എസ്എസ്എൽസി, ഹയർ സെക്കൻഡറി, വൊക്കേഷണൽ ഹയർ സെക്കൻഡറി പരീക്ഷകളുടെ തീയതികൾ പ്രഖ്യാപിച്ചു.
വിദ്യാഭ്യാസമന്ത്രി എൻ. ഷംസുദ്ദീനാണ് പരീക്ഷാ തീയതികൾ പ്രഖ്യാപിച്ചത്. എസ്എസ്എൽസി പരീക്ഷ മാർച്ച് 1 മുതൽ 30 വരെയാണ് നടക്കുക. ഹയർ സെക്കൻഡറി ഒന്നാം വർഷ, രണ്ടാം വർഷ പൊതുപരീക്ഷകൾ മാർച്ച് 2ന് ആരംഭിച്ച് 30ന് അവസാനിക്കും.
എസ്എസ്എൽസി മാതൃകാ പരീക്ഷ ഫെബ്രുവരി 16 മുതൽ 20 വരെ നടക്കും. പ്രധാന പരീക്ഷയുടെ ഉത്തരക്കടലാസുകളുടെ മൂല്യനിർണയം ഏപ്രിൽ 5 മുതൽ 27 വരെ നടക്കും. മെയ് ആദ്യവാരം എസ്എസ്എൽസി പരീക്ഷാഫലം പ്രഖ്യാപിക്കാനാണ് തീരുമാനം. എസ്എസ്എൽസി പരീക്ഷാ രജിസ്ട്രേഷൻ നവംബർ 18ന് ആരംഭിക്കും.
പുതിയ പരീക്ഷാ സോഫ്റ്റ്‌വെയറായ ‘യൂണിഫൈഡ് എക്സാമിനേഷൻ മാനേജ്മെന്റ് സിസ്റ്റം’ വഴിയാണ് ഇത്തവണ രജിസ്ട്രേഷൻ ഉൾപ്പെടെയുള്ള പരീക്ഷാ നടപടികൾ പൂർത്തിയാക്കുക.ഹയർ സെക്കൻഡറി, വൊക്കേഷണൽ ഹയർ സെക്കൻഡറി വിഭാഗങ്ങളിലെ ക്രിസ്മസ് പരീക്ഷ ഡിസംബർ 8 മുതൽ 17 വരെ നടക്കും. ഡിസംബർ 18ന് ക്രിസ്മസ് അവധിക്കായി അടയ്ക്കുന്ന സ്കൂളുകൾ ഡിസംബർ 28ന് തുറക്കും.
രണ്ടാം വർഷ ഹയർ സെക്കൻഡറി വിദ്യാർഥികളുടെ പ്രാക്ടിക്കൽ പരീക്ഷകൾ ജനുവരി 25ന് ആരംഭിക്കും. രണ്ടാം വർഷ വൊക്കേഷണൽ ഹയർ സെക്കൻഡറി വിദ്യാർഥികളുടെ വൊക്കേഷണൽ വിഷയങ്ങളുടെ പ്രായോഗിക പരീക്ഷകൾ ജനുവരി 15ന് തുടങ്ങും.
