Skip to content
November 19, 2026
⌕

ഉഗാണ്ടൻ കുരുന്നിന് പുതുജീവനേകി രാജഗിരി ആശുപത്രി; മലയാളം പാട്ടിന് ചുവടുവെച്ച് നന്ദിയറിയിച്ച് ‘ഗെറ്റോ കിഡ്‌സ്’ | Ghetto Kids Uganda

November 18, 2026
Share this post to
Ghetto Kids Uganda

കൊച്ചി: ലോകപ്രശസ്ത ഉഗാണ്ടൻ നൃത്തസംഘമായ ‘ഗെറ്റോ കിഡ്‌സിന്റെ’ ( Ghetto Kids Uganda) ചുവടുകളിലൂടെ കേരളത്തിന്റെയും ആലുവ രാജഗിരി ആശുപത്രിയുടെയും കരുതലും സ്നേഹവും വീണ്ടും ആഗോളതലത്തിൽ ശ്രദ്ധനേടുന്നു. സങ്കീർണ്ണമായ ജന്മനാ ഉള്ള ഹൃദ്രോഗവുമായി ഉഗാണ്ടയിൽ നിന്ന് കേരളത്തിലെത്തിയ ഒരു വയസ്സുകാരി റൗദ അമീറ കിബോനെക്കയുടെ രോഗമുക്തി ആഘോഷമാക്കിയാണ് ഈ കുട്ടിനർത്തകർ ലോകത്തിന്റെ ഹൃദയം കവർന്നത്. കൊച്ചിയിലെ വിജയകരമായ ശസ്ത്രക്രിയയ്ക്ക് ശേഷം നാട്ടിൽ തിരിച്ചെത്തിയ റൗദയെ വൻ ആഘോഷത്തോടെയാണ് ഗെറ്റോ കിഡ്‌സ് സംഘം വരവേറ്റത്.

ഹൃദയത്തിന്റെ അറകൾക്കിടയിലുള്ള സുഷിരവും വാൽവിലെ ചോർച്ചയും കാരണം കടുത്ത ആരോഗ്യപ്രശ്നങ്ങളാണ് റൗദ നേരിട്ടിരുന്നത്. വളർച്ചാ മുരടിപ്പ്, ഇടയ്ക്കിടെയുള്ള പനി, ശരിയായി പാലുകുടിക്കാൻ സാധിക്കാത്ത അവസ്ഥ, പ്രതിരോധശേഷിക്കുറവ് എന്നിവ മൂലം കുഞ്ഞിന്റെ ജീവൻ അപകടത്തിലായിരുന്നു. തുടർന്നാണ് തങ്ങളുടെ ഫൗണ്ടേഷൻ അംഗമായ കുടുംബത്തിന് കൈത്താങ്ങായി ഗെറ്റോ കിഡ്‌സ് മുന്നോട്ടുവരികയും വിദഗ്ധ ചികിത്സയ്ക്കായി രാജഗിരി ആശുപത്രിയിൽ സൗകര്യമൊരുക്കുകയും ചെയ്തത്.

പീഡിയാട്രിക് കാർഡിയോളജി, കാർഡിയാക് സർജറി വിഭാഗങ്ങളിലെ വിദഗ്ധ സംഘമാണ് ചികിത്സയ്ക്ക് നേതൃത്വം നൽകിയത്. ശസ്ത്രക്രിയയ്ക്ക് വിധേയയാകുമ്പോൾ റൗദയ്ക്ക് ഒരു വയസ്സും 16 ദിവസവുമായിരുന്നു പ്രായം. പീഡിയാട്രിക് കാർഡിയാക് സർജറി വിഭാഗം സീനിയർ കൺസൾട്ടന്റ് ഡോ. മുസ്തഫ ജനീൽ എം, കൺസൾട്ടന്റുമാരായ ഡോ. പ്രീതി കാഥൽ, ഡോ. സജിത്ത് സുലൈമാൻ, ഡോ. ബിജിന ഭരതൻ കെ, പീഡിയാട്രിക് കാർഡിയോളജിസ്റ്റ് ഡോ. എസ്. വെങ്കിടേശ്വരൻ എന്നിവരടങ്ങുന്ന സംഘമാണ് അതിസങ്കീർണ്ണമായ ശസ്ത്രക്രിയ വിജയകരമായി പൂർത്തിയാക്കിയത്. ശസ്ത്രക്രിയയ്ക്ക് ശേഷം കുഞ്ഞിന്റെ ആരോഗ്യനിലയിൽ അത്ഭുതകരമായ പുരോഗതിയുണ്ടായതായി ഡോ. മുസ്തഫ ജനീൽ പറഞ്ഞു.

ഏഴ് ദിവസത്തെ ആശുപത്രിവാസത്തിന് ശേഷം പൂർണ്ണ ആരോഗ്യവതിയായാണ് റൗദ ഉഗാണ്ടയിലേക്ക് മടങ്ങിയത്. മടങ്ങുന്നതിന് മുൻപ് രാജഗിരി ആശുപത്രിയിലെ ക്രിസ്മസ് കേക്ക് മിക്സിങ് ചടങ്ങിലും കുഞ്ഞ് പങ്കെടുത്തിരുന്നു. സ്വന്തം വിരൽസ്പർശമുള്ള കേക്കും സമ്മാനങ്ങളും നൽകിയാണ് ആശുപത്രി അധികൃതർ കുഞ്ഞിനെ യാത്രയാക്കിയത്.

ഖത്തർ എയർവേയ്‌സ് വിമാനത്തിൽ ഉഗാണ്ടയിൽ വന്നിറങ്ങിയ റൗദയെ വലിയ ബാനറുകളും സമ്മാനങ്ങളുമായാണ് ഗെറ്റോ കിഡ്‌സ് സ്വീകരിച്ചത്. മോഹൻലാൽ ചിത്രമായ ‘വർണ്ണപ്പകിട്ടി’ലെ “ഒക്കേല ഒക്കേല നാൻ ഉരുകാത വെണ്ണിലാ” എന്ന പ്രശസ്ത മലയാളം ഗാനത്തിന് ചുവടുവെച്ചാണ് ഇവർ കേരളത്തോടും ഡോക്ടർമാരോടുമുള്ള സ്നേഹവും നന്ദിയും പ്രകടിപ്പിച്ചത്. ദശലക്ഷക്കണക്കിന് ഫോളോവേഴ്‌സുള്ള തങ്ങളുടെ സോഷ്യൽ മീഡിയ പേജുകളിൽ പങ്കുവെച്ച ഈ വീഡിയോ ഇതിനോടകം വൈറലായിക്കഴിഞ്ഞു.

കുട്ടികളുടെ സൗജന്യ ഹൃദയശസ്ത്രക്രിയയ്ക്കായി ആഗോളതലത്തിൽ നടപ്പാക്കുന്ന ‘മിഷൻ ഫോർ ലിറ്റിൽ ഹാർട്ട്സ്’ പദ്ധതിയുടെ ഭാഗമായാണ് റൗദയുടെ ചികിത്സ നിർവ്വഹിച്ചതെന്ന് രാജഗിരി ആശുപത്രി എക്സിക്യൂട്ടീവ് ഡയറക്ടർ ഫാ. ജോൺസൺ വാഴപ്പിള്ളി അറിയിച്ചു. 2014-ൽ അധ്യാപകനും കൊറിയോഗ്രാഫറുമായ ദാവൂദ കാവൂമ ഉഗാണ്ടയിലെ കാംപാല ചേരികളിൽ നിന്നാരംഭിച്ച പ്രസ്ഥാനമാണ് ഗെറ്റോ കിഡ്‌സ് ഫൗണ്ടേഷൻ. നിർധനരും അനാഥരുമായ കുട്ടികൾക്ക് വിദ്യാഭ്യാസവും ഭക്ഷണവും നൃത്തപരിശീലനവും നൽകി ജീവിതം കെട്ടിപ്പടുക്കാൻ സഹായിക്കുന്ന ഇവർ, നേരത്തെ മോഹൻലാലിനൊപ്പം ‘ഓപ്പറേഷൻ ഗംഗ’ എന്ന ചിത്രത്തിലും ചുവടുവെച്ച് മലയാളികളുടെ പ്രിയങ്കരരായിരുന്നു.

Story Summary:
World-renowned Ugandan dance group Ghetto Kids celebrated the successful heart surgery of one-year-old Raudha Ameera Kiboneka at Kochi’s Rajagiri Hospital by dancing to a popular Malayalam song upon her return home. Treated under the ‘Mission for Little Hearts’ initiative, the toddler recovered from a complex congenital heart defect, strengthening the heartwarming bond between Uganda and Kerala.

Get more updates from Pudukad News on Google