കാലിഫോർണിയ: ലോകമെമ്പാടുമുള്ള ബഹിരാകാശ പ്രേമികളുടെ ആശങ്കകൾക്ക് വിരാമമിട്ട് നാസയുടെ ക്രൂ-11 (Crew-11) ദൗത്യസംഘം ഭൂമിയിൽ സുരക്ഷിതമായി തിരിച്ചെത്തി. സംഘത്തിലെ ഒരു സഞ്ചാരിക്കുണ്ടായ അപ്രതീക്ഷിത ആരോഗ്യപ്രശ്നങ്ങളെത്തുടർന്ന് ദൗത്യം വെട്ടിച്ചുരുക്കിയാണ് സ്പേസ് എക്സിന്റെ ഡ്രാഗൺ എൻഡവർ പേടകം ഇന്ന് ഉച്ചയ്ക്ക് ഇന്ത്യൻ സമയം 2:14-ഓടെ കാലിഫോർണിയ തീരത്ത് ശാന്തസമുദ്രത്തിൽ ലാൻഡ് ചെയ്തത്.
അന്താരാഷ്ട്ര ബഹിരാകാശ നിലയത്തിൽ (ISS) നിന്ന് അൺഡോക്ക് ചെയ്ത ശേഷം പത്ത് മണിക്കൂർ നീണ്ട യാത്രയ്ക്കൊടുവിലായിരുന്നു ഈ ‘സ്പ്ലാഷ്ഡൗൺ’. 2025 ഓഗസ്റ്റിൽ ആറ് മാസത്തെ ദൗത്യത്തിനായി പുറപ്പെട്ട സംഘം ഫെബ്രുവരിയിൽ മടങ്ങാനായിരുന്നു നിശ്ചയിച്ചിരുന്നത്. എന്നാൽ പേര് വെളിപ്പെടുത്താത്ത ഒരു നാസ പ്രതിനിധിയുടെ ആരോഗ്യനില വഷളായതോടെ 165 ദിവസത്തെ ഗവേഷണങ്ങൾ പൂർത്തിയാക്കി മടങ്ങാൻ നാസ നിർദ്ദേശിക്കുകയായിരുന്നു. ബഹിരാകാശ നിലയത്തിന്റെ ചരിത്രത്തിൽ ആദ്യമായാണ് ഒരു സഞ്ചാരിയുടെ ആരോഗ്യപ്രശ്നം മൂലം ദൗത്യം പാതിവഴിയിൽ നിർത്തി സംഘം മടങ്ങുന്നത്.
Also Read: ചൊവ്വയിൽ എന്ത് കഴിക്കും? ഉത്തരം നൽകുന്നവർക്ക് 6.75 കോടി രൂപ! നാസയുടെ വമ്പൻ ചലഞ്ച്
സ്പേസ് എക്സിന്റെ പ്രത്യേക സംഘത്തെ കരയിലെത്തിച്ച് നാല് പേരെയും വിദഗ്ധ പരിശോധനകൾക്കായി ആശുപത്രിയിലേക്ക് മാറ്റും. ദൗത്യത്തെക്കുറിച്ചും യാത്രികരുടെ ആരോഗ്യനിലയെക്കുറിച്ചും നാസ അഡ്മിനിസ്ട്രേറ്റർ ജാറെഡ് ഐസക്മാൻ ഇന്ന് വൈകുന്നേരം നടത്തുന്ന വാർത്താസമ്മേളനത്തിൽ കൂടുതൽ വിവരങ്ങൾ വ്യക്തമാക്കും.
The post ദൗത്യം പാതിവഴിയിൽ നിർത്തി നാസ; ക്രൂ-11 സംഘം ഭൂമിയിൽ തിരിച്ചെത്തി appeared first on Express Kerala.
