അഭിഷേക് നാമയുടെ സംവിധാനത്തിൽ ഒരുങ്ങുന്ന ബ്രഹ്മാണ്ഡ പാൻ ഇന്ത്യൻ ചിത്രം ‘നാഗബന്ധ’ത്തിലെ നഭാ നടേഷിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടു. മകരസംക്രാന്തി ആഘോഷങ്ങളുടെ ഭാഗമായി പുറത്തിറങ്ങിയ പോസ്റ്ററിൽ ‘പാർവതി’ എന്ന കഥാപാത്രമായാണ് നടി പ്രത്യക്ഷപ്പെടുന്നത്. ആത്മീയതയും വിശുദ്ധിയും തുളുമ്പുന്ന പരമ്പരാഗത വേഷത്തിലുള്ള നഭയുടെ ലുക്ക് ഇതിനോടകം സമൂഹമാധ്യമങ്ങളിൽ തരംഗമായിക്കഴിഞ്ഞു. ഭക്തിയിലും പുരാണത്തിലും വേരൂന്നിയ ഈ ചിത്രത്തിൽ ഐശ്വര്യ മേനോനും മറ്റൊരു പ്രധാന വേഷത്തിൽ എത്തുന്നുണ്ട്. ജഗപതി ബാബു, ജയപ്രകാശ്, മുരളി ശർമ്മ, ബി.എസ്. അവിനാശ് തുടങ്ങിയ വൻ താരനിരയാണ് ചിത്രത്തിൽ അണിനിരക്കുന്നത്.
Also Read: ആദ്യമൊന്ന് പരിഭ്രമിച്ചു, പക്ഷെ നിങ്ങളുടെ സ്നേഹം…”; പൊതുവേദിയിൽ മനസ്സ് തുറന്ന് ഭാവന
ഇന്ത്യൻ സിനിമയിലെ തന്നെ ഏറ്റവും ചെലവേറിയ ക്ലൈമാക്സ് രംഗങ്ങളിലൊന്നാണ് ചിത്രത്തിനായി ഒരുക്കിയിരിക്കുന്നത്. ഹൈദരാബാദിലെ രാമനായിഡു സ്റ്റുഡിയോയിൽ 20 കോടി രൂപ ചെലവിൽ നിർമ്മിച്ച ഭീമാകാരമായ സെറ്റിലാണ് ക്ലൈമാക്സ് ചിത്രീകരണം പൂർത്തിയായത്. പ്രശസ്ത കലാസംവിധായകൻ അശോക് കുമാർ രൂപകൽപ്പന ചെയ്ത ഈ സെറ്റിൽ അന്താരാഷ്ട്ര സ്റ്റണ്ട് മാസ്റ്റർ കെച്ചയുടെ നേതൃത്വത്തിലാണ് ആവേശം നിറയ്ക്കുന്ന സംഘട്ടന രംഗങ്ങൾ ചിത്രീകരിച്ചത്. ചിത്രത്തിലെ നായകൻ വിരാട് കർണ്ണ അവതരിപ്പിക്കുന്ന ‘രുദ്ര’ എന്ന കഥാപാത്രത്തിനായി താരം നടത്തിയ ശാരീരിക പരിവർത്തനവും വലിയ വാർത്താപ്രാധാന്യം നേടിയിട്ടുണ്ട്.
ആത്മീയതയും സാഹസികതയും ഒത്തുചേരുന്ന ഈ ചിത്രം കേരളത്തിലെ പത്മനാഭസ്വാമി ക്ഷേത്രം, പുരി ജഗന്നാഥ് ക്ഷേത്രം എന്നിവിടങ്ങളിലെ സമീപകാല നിധി കണ്ടെത്തലുകളിൽ നിന്നും പുരാണങ്ങളിൽ നിന്നും പ്രചോദനം ഉൾക്കൊണ്ടാണ് നിർമ്മിച്ചിരിക്കുന്നത്. 1000 നർത്തകർ പങ്കെടുത്ത ബ്രഹ്മാണ്ഡ ഗാനത്തിനായി അനന്ത പദ്മനാഭ സ്വാമി ക്ഷേത്രത്തിന്റെ മാതൃകയിലുള്ള സെറ്റാണ് ഒരുക്കിയത്. കൂടാതെ “ഓം വീര നാഗ” എന്ന ഗാനവും അതിന്റെ നിർമ്മാണ മികവും ഏറെ ശ്രദ്ധിക്കപ്പെട്ടിരുന്നു. ഭാരതത്തിലെ 108 വിഷ്ണു ക്ഷേത്രങ്ങളുമായി ബന്ധപ്പെട്ട നാഗബന്ധത്തെ ചുറ്റിപ്പറ്റിയുള്ള നിഗൂഢമായ ആചാരങ്ങളും രഹസ്യങ്ങളുമാണ് ചിത്രത്തിന്റെ പ്രമേയം.
അഭിഷേക് പിക്ചേഴ്സിന്റെയും എൻഐകെ സ്റ്റുഡിയോസിന്റെയും ബാനറിൽ കിഷോർ അന്നപുറെഡ്ഡിയും നിഷിത നാഗിറെഡ്ഡിയും ചേർന്നാണ് ഈ ബിഗ് ബജറ്റ് ചിത്രം നിർമ്മിക്കുന്നത്. സൌന്ദർ രാജൻ എസ് ഛായാഗ്രഹണവും അഭേയും ജുനൈദ് കുമാറും സംഗീതവും നിർവ്വഹിക്കുന്നു. തമിഴ്, തെലുങ്ക്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായി 2026 വേനൽക്കാലത്ത് ചിത്രം തീയേറ്ററുകളിൽ എത്തും. വിഎഫ്എക്സ് സാങ്കേതികവിദ്യയുടെ കരുത്തിൽ വിസ്മയിപ്പിക്കുന്ന ദൃശ്യാനുഭവമായിരിക്കും ‘നാഗബന്ധ’മെന്ന് അണിയറപ്രവർത്തകർ അവകാശപ്പെടുന്നു.
The post ‘നാഗബന്ധ’ത്തിൽ പാർവതിയായി നഭാ നടേഷ്; മകരസംക്രാന്തി ദിനത്തിൽ ശ്രദ്ധേയമായി ഫസ്റ്റ് ലുക്ക് പോസ്റ്റർ appeared first on Express Kerala.
