ആലപ്പുഴയിലെ യാത്രയ്ക്കിടെ അപ്രതീക്ഷിതമായി നേരിട്ട ആരോഗ്യപ്രശ്നങ്ങൾക്ക് ചികിത്സ തേടി ആലപ്പുഴ ജനറൽ ആശുപത്രിയിലെത്തിയ സ്പാനിഷ് സോളോ ട്രാവലർ വെറോണിക്കയ്ക്ക് പങ്കുവെക്കാൻ മികച്ച അനുഭവങ്ങൾ മാത്രമാണുള്ളത്. ആശുപത്രിയിലെ വേഗതയേറിയ സേവനവും ജീവനക്കാരുടെ കാര്യക്ഷമതയും തന്നെ വല്ലാതെ അത്ഭുതപ്പെടുത്തിയെന്ന് വെറോണിക്ക തന്റെ ഇൻസ്റ്റഗ്രാം വീഡിയോയിലൂടെ ലോകത്തോട് പറഞ്ഞു. ഒരു പൊതുജനാരോഗ്യ കേന്ദ്രത്തിൽ ഇത്രയും കൃത്യതയോടെയും കരുതലോടെയും ചികിത്സ ലഭ്യമാകുന്നത് തനിക്ക് വിശ്വസിക്കാനായില്ലെന്നും കേരളത്തിലെ ആരോഗ്യരംഗം അവിശ്വസനീയമാണെന്നും വെറോണിക്ക വാതോരാതെ പുകഴ്ത്തി.
സൗജന്യമായോ കുറഞ്ഞ ചിലവിലോ ഇത്രയും കാര്യക്ഷമമായ ചികിത്സാ രീതികൾ യൂറോപ്യൻ രാജ്യങ്ങളിൽ പോലും ലഭിക്കുക പ്രയാസമാണെന്നിരിക്കെ, കേരളത്തിലെ സർക്കാർ ആശുപത്രിയിലെ ജീവനക്കാരുടെ ഇടപെടലും കൃത്യനിഷ്ഠയും തന്നെ അത്ഭുതപ്പെടുത്തിയെന്ന് അവർ പറഞ്ഞു. ആശുപത്രിയുടെ ശുചിത്വത്തെയും ജീവനക്കാരുടെ ഊഷ്മളമായ പെരുമാറ്റത്തെയും താരം പ്രകീർത്തിച്ചു. കേരളത്തിന്റെ ആരോഗ്യമാതൃക വിദേശികൾക്കിടയിൽ വീണ്ടും ചർച്ചയാകാൻ വെറോണിക്കയുടെ ഈ കുറിപ്പ് കാരണമായിരിക്കുകയാണ്.
The post കേരളത്തിന്റെ ആരോഗ്യരംഗത്തിന് വെറോണിക്കയുടെ കയ്യടി; ആലപ്പുഴയിലെ സർക്കാർ ആശുപത്രി കണ്ട് അതിശയിച്ച് സ്പാനിഷ് യാത്രിക! appeared first on Express Kerala.
