ഹരാരെ: മുൻ താരം തമീം ഇഖ്ബാലിനെതിരെയുള്ള അധിക്ഷേപത്തെത്തുടർന്ന് ബംഗ്ലാദേശ് ക്രിക്കറ്റിൽ ആഭ്യന്തര കലഹം രൂക്ഷമാകുന്നു. ബംഗ്ലാദേശ് ക്രിക്കറ്റ് ബോർഡ് (ബിസിബി) അംഗമായ നജ്മുൾ ഇസ്ലാം തമീമിനെ ‘ഇന്ത്യൻ ഏജന്റ്’ എന്ന് വിളിച്ചതാണ് വിവാദങ്ങൾക്ക് തിരികൊളുത്തിയത്. ഇതേത്തുടർന്ന് താരങ്ങൾ ബംഗ്ലാദേശ് പ്രീമിയർ ലീഗിലെ (BPL) മത്സരങ്ങൾ ബഹിഷ്കരിക്കുമെന്ന് ഭീഷണി മുഴക്കിയതോടെ രാജ്യം കടുത്ത ക്രിക്കറ്റ് പ്രതിസന്ധിയിലേക്കാണ് നീങ്ങുന്നത്. നജ്മുൾ ഇസ്ലാമിന്റെ രാജി ആവശ്യപ്പെട്ട് താരങ്ങൾ ഉറച്ചുനിൽക്കുകയാണ്.
വ്യാഴാഴ്ച ബംഗ്ലാദേശ് പ്രീമിയർ ലീഗിൽ നടന്ന നാടകീയ സംഭവങ്ങൾ ക്രിക്കറ്റ് ലോകത്തെ ഞെട്ടിച്ചു. ചാറ്റോഗ്രാം റോയൽസും നവോഖാലി എക്സ്പ്രസ്സും തമ്മിലുള്ള മത്സരത്തിന്റെ ടോസ് സമയത്ത് ഇരുടീമുകളുടെയും ക്യാപ്റ്റൻമാരോ കളിക്കാരോ മൈതാനത്ത് എത്തിയില്ല. മാച്ച് റഫറി ഷിപർ അഹമ്മദ് മൈതാനത്ത് ഏകനായി നിൽക്കുന്ന വിചിത്രമായ കാഴ്ചയ്ക്കാണ് ഗാലറി സാക്ഷ്യം വഹിച്ചത്. “എന്താണ് സംഭവിക്കുന്നതെന്ന് തനിക്ക് മനസ്സിലാകുന്നില്ല” എന്നായിരുന്നു ഇതിനോട് റഫറിയുടെ പ്രതികരണം. ബി.പി.എല്ലിന് പുറമെ ധാക്ക ക്രിക്കറ്റ് ലീഗിലെ താരങ്ങളും ബഹിഷ്കരണ ഭീഷണി ഉയർത്തിയിട്ടുണ്ട്.
ടി20 ലോകകപ്പ് വേദി മാറ്റുന്നതുമായി ബന്ധപ്പെട്ട തമീം ഇഖ്ബാലിന്റെ നിലപാടാണ് ബിസിബിയെ ചൊടിപ്പിച്ചത്. സുരക്ഷാ കാരണങ്ങളാൽ ഇന്ത്യയിലേക്ക് ടീമിനെ അയക്കില്ലെന്ന ബോർഡ് തീരുമാനത്തിനെതിരെ രാജ്യത്തിന്റെ ഭാവി താത്പര്യം മുൻനിർത്തി തീരുമാനമെടുക്കണമെന്ന് തമീം നിർദ്ദേശിച്ചിരുന്നു. ഇതിന് പിന്നാലെയാണ് നജ്മുൾ ഇസ്ലാം ഫെയ്സ്ബുക്കിലൂടെ താരത്തെ അധിക്ഷേപിച്ചത്. സംഭവത്തിൽ ബോർഡ് നജ്മുളിന് കാരണം കാണിക്കൽ നോട്ടീസ് നൽകിയിട്ടുണ്ടെങ്കിലും പ്രതിഷേധം തണുപ്പിക്കാൻ ഇത് പര്യാപ്തമായിട്ടില്ല.
The post ബംഗ്ലാദേശ് ക്രിക്കറ്റിൽ പൊട്ടിത്തെറി; തമീം ഇഖ്ബാലിനെതിരായ അധിക്ഷേപം വിനയായി, മത്സരങ്ങൾ ബഹിഷ്കരിച്ച് താരങ്ങൾ appeared first on Express Kerala.
