കുവൈത്തിൽ വരും ദിവസങ്ങളിൽ അതിശൈത്യവും പൊടിക്കാറ്റും അനുഭവപ്പെടുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. വടക്കുപടിഞ്ഞാറൻ കാറ്റ് ശക്തമാകുന്നതോടെ രാജ്യത്തെ തണുപ്പ് ക്രമാതീതമായി വർധിക്കുമെന്ന് കാലാവസ്ഥാ നിരീക്ഷണ കേന്ദ്രം ഡയറക്ടർ ധരാർ അൽ അലി അറിയിച്ചു. കഴിഞ്ഞ ദിവസങ്ങളിൽ അനുഭവപ്പെട്ട മേഘാവൃതമായ അന്തരീക്ഷത്തിനും പൊടിപടലങ്ങൾക്കും പിന്നാലെയാണ് രാജ്യം കടുത്ത ശൈത്യത്തിലേക്ക് നീങ്ങുന്നത്.
അടുത്ത അഞ്ച് ദിവസത്തേക്ക് രാജ്യത്ത് കടുത്ത തണുപ്പ് തുടരുമെന്നാണ് കാലാവസ്ഥാ മാപ്പുകൾ നൽകുന്ന സൂചന. മരുഭൂമി മേഖലകളിലും കാർഷിക പ്രദേശങ്ങളിലും താപനില മൂന്ന് ഡിഗ്രി സെൽഷ്യസിനും താഴെ പോകാൻ സാധ്യതയുണ്ട്. ഇത്തരം സ്ഥലങ്ങളിൽ മഞ്ഞുവീഴ്ചയ്ക്കും (Frost) സാധ്യതയുണ്ടെന്ന് അധികൃതർ വ്യക്തമാക്കി. പകൽ സമയത്ത് 14 മുതൽ 16 ഡിഗ്രി വരെ താപനില ഉയരുമെങ്കിലും രാത്രിയിൽ ഇത് രണ്ട് മുതൽ അഞ്ച് ഡിഗ്രി വരെയായി ചുരുങ്ങും.
Also Read: ഇന്ത്യൻ സംരംഭകർക്ക് സുവർണ്ണാവസരം; ഷാർജയിൽ നിക്ഷേപത്തിന്റെ പുത്തൻ വാതിലുകൾ തുറക്കുന്നു
പൊടിപടലങ്ങൾ കാരണം കാഴ്ചപരിധി കുറയാൻ സാധ്യതയുള്ളതിനാൽ ഹൈവേകളിലൂടെ യാത്ര ചെയ്യുന്ന വാഹനമോടിക്കുന്നവർ അതീവ ജാഗ്രത പാലിക്കണമെന്ന് നിർദ്ദേശമുണ്ട്. അന്തരീക്ഷത്തിലെ പൊടിയും ഈർപ്പവും വർധിക്കുന്നത് കണക്കിലെടുത്ത് ശ്വാസകോശ സംബന്ധമായ അസുഖങ്ങളുള്ളവരും അലർജി രോഗികളും പുറത്തിറങ്ങുമ്പോൾ നിർബന്ധമായും മാസ്ക് ധരിക്കണം. പെട്ടെന്നുണ്ടാകുന്ന ഈ കാലാവസ്ഥാ വ്യതിയാനത്തിൽ ജനങ്ങൾ ആവശ്യമായ മുൻകരുതലുകൾ എടുക്കണമെന്ന് ആരോഗ്യവിദഗ്ധരും ഓർമ്മിപ്പിച്ചു.
The post മരവിച്ച് കുവൈത്ത്; താപനില മൂന്ന് ഡിഗ്രിയിൽ താഴേക്ക്, മഞ്ഞുവീഴ്ചയ്ക്കും പൊടിക്കാറ്റിനും സാധ്യത appeared first on Express Kerala.
