തിരുവനന്തപുരം കോർപ്പറേഷനിലെ ഇലക്ട്രിക് ബസ് സർവീസുമായി ബന്ധപ്പെട്ട തർക്കങ്ങൾക്കിടെ ഗതാഗത മന്ത്രി കെ.ബി. ഗണേഷ് കുമാറും മേയർ വി.വി. രാജേഷും കൂടിക്കാഴ്ച നടത്തി. സ്മാർട്ട് സിറ്റി പദ്ധതിയുടെ ഭാഗമായി ലഭിച്ച ബസുകളുടെ സർവീസ് സംബന്ധിച്ച കാര്യങ്ങൾ ചർച്ചയായെങ്കിലും, കരാർ പാലിക്കുന്നതിലെ തർക്കം പൂർണ്ണമായി പരിഹരിക്കപ്പെട്ടിട്ടില്ല. തൽക്കാലം നിലവിലെ സാഹചര്യം തുടരാനാണ് ഇരുവരും തമ്മിലുള്ള ചർച്ചയിൽ ധാരണയായത്.
തിരുവനന്തപുരം നഗരത്തിലെ ഇടറോഡുകളിലൂടെ സർവീസ് നടത്തിയിരുന്ന 113 ഇലക്ട്രിക് ബസുകൾ ലാഭകരമല്ലെന്ന് വിലയിരുത്തി കെ.എസ്.ആർ.ടി.സി മറ്റു സ്ഥലങ്ങളിലേക്ക് മാറ്റിയതാണ് വിവാദത്തിന് തുടക്കമിട്ടത്. എന്നാൽ ഈ ബസുകൾ നഗരപരിധിക്കുള്ളിൽ തന്നെ ഓടണമെന്നും മറ്റ് ഡിപ്പോകൾക്ക് നൽകിയവ തിരികെ എത്തിക്കണമെന്നുമുള്ള കർശന നിലപാടാണ് മേയർ വി.വി. രാജേഷ് സ്വീകരിച്ചത്. സർവീസിലെ ലാഭവിഹിതം കോർപ്പറേഷന് നൽകുന്നതിൽ വീഴ്ചയുണ്ടായെന്നും അദ്ദേഹം ആരോപിച്ചിരുന്നു.
Also Read: കേരള കോൺഗ്രസ്സുമായി ചർച്ച നടത്തിയിട്ടില്ല; വി ഡി സതീശൻ
വിവാദത്തിന് മറുപടിയായി, കോർപ്പറേഷൻ ആവശ്യപ്പെട്ടാൽ 24 മണിക്കൂറിനുള്ളിൽ ബസുകൾ തിരിച്ചുനൽകുമെന്നും പകരം കെ.എസ്.ആർ.ടി.സി ബസുകൾ ഇറക്കുമെന്നും മന്ത്രി നേരത്തെ വ്യക്തമാക്കിയിരുന്നു. ബസുകൾ സ്വതന്ത്രമായി നടത്തിക്കൊണ്ടുപോകുന്നത് വലിയ സാമ്പത്തിക ബാധ്യതയുണ്ടാക്കുമെന്നും ഗണേഷ് കുമാർ ചൂണ്ടിക്കാട്ടിയിരുന്നു. എന്നാൽ ബസുകൾ തിരിച്ചെടുക്കാൻ ഉദ്ദേശമില്ലെന്നും കരാർ കൃത്യമായി പാലിക്കണമെന്നുമാണ് മേയർ തിരിച്ചടിച്ചത്.
ഇരുപക്ഷവും കടുത്ത നിലപാടുകൾ തുടരുന്നതിനിടയിൽ നടന്ന ഈ കൂടിക്കാഴ്ച മഞ്ഞുരുകലിന്റെ സൂചനയായാണ് വിലയിരുത്തപ്പെടുന്നത്. ബസ് റൂട്ടുകളെ സംബന്ധിച്ച തന്റെ നിർദ്ദേശങ്ങൾ മേയർ മന്ത്രിയെ അറിയിച്ചിട്ടുണ്ട്. എല്ലാ മന്ത്രിമാരെയും നേരിൽ കാണുന്നതിന്റെ ഭാഗമായാണ് ഈ സന്ദർശനമെന്ന് മേയർ പറയുമ്പോഴും, നഗരത്തിലെ പൊതുഗതാഗത സൗകര്യം മെച്ചപ്പെടുത്തുന്നതിൽ ഇരുവർക്കും ഇടയിലുണ്ടായ ധാരണ നിർണ്ണായകമാണ്.
The post ഇലക്ട്രിക് ബസ് വിവാദത്തിൽ മഞ്ഞുരുക്കം? ഗതാഗത മന്ത്രിയുമായി കൂടിക്കാഴ്ചയ്ക്ക് ശേഷം മേയര് വിവി രാജേഷ്; ‘നിലവിലെ സാഹചര്യം തുടരും’ appeared first on Express Kerala.
