‘ദൗത്യത്തിനായി എനിക്ക് എയർ ചീഫിനോട് നുണ പറയേണ്ടിവന്നു’: ഓപ്പറേഷൻ സിന്ദൂറിനെക്കുറിച്ച് നിർണ്ണായക വെളിപ്പെടുത്തലുമായി എയർ മാർഷൽ നാഗേഷ് കപൂർ

ന്യൂഡൽഹി: ‘ഓപ്പറേഷൻ സിന്ദൂർ’ വ്യോമാക്രമണ ദൗത്യത്തിനിടയിൽ അന്നത്തെ എയർ ചീഫിനോട് ചെറിയൊരു അസത്യം പറയേണ്ടിവന്നതായി ഇന്ത്യൻ വ്യോമസേന സൗത്ത് വെസ്റ്റ് എയർ കമാൻഡ് മേധാവി എയർ മാർഷൽ നാഗേഷ് കപൂർ. പാകിസ്താനിലെ ഭോലാരി എയർബേസിലുള്ള കരുത്തുറ്റ സാബ് ഏറിയെ വിമാനം തകർക്കുന്നതിനുള്ള നിർണായക ദൗത്യത്തിലാണ് എയർ ചീഫ് മാർഷൽ എ.പി. സിംഗിനോട് താൻ മിനിറ്റുകളുടെ വ്യത്യാസത്തിൽ വിവരങ്ങൾ മാറ്റിപ്പറഞ്ഞതെന്ന് അദ്ദേഹം പോഡ്‌കാസ്റ്റിൽ വെളിപ്പെടുത്തി.(Operation Sindoor, Air Marshal Nagesh Kapoor Reveals Bholari Airbase BrahMos Strike)

പാകിസ്താന്റെ ഏറ്റവും ശക്തമായ മുന്നറിയിപ്പ് വിമാനമായ സാബ് ഏറിയെ സൂക്ഷിച്ചിരുന്ന ഹാംഗർ തകർക്കാൻ സുഖോയ്-30 എംകെഐ വിമാനങ്ങളിൽ ബ്രഹ്മോസ് മിസൈലുകളുമായി വ്യോമസേനാ പൈലറ്റുമാർ റൺവേയിൽ സർവ്വസജ്ജരായി നിൽക്കുകയായിരുന്നു. എന്നാൽ ഈ ഘട്ടത്തിൽ ദൗത്യം വേണ്ടെന്നുവെക്കാൻ എയർ ഹെഡ്‌ക്വാട്ടേഴ്‌സിൽ നിന്ന് നിർദ്ദേശം വന്നേക്കുമോ എന്ന് ഭയന്ന് വിമാനങ്ങൾ പറന്നുയർന്നു കഴിഞ്ഞുവെന്നും മിസൈൽ തൊടുക്കാൻ അരമണിക്കൂർ മാത്രമേ ഉള്ളൂവെന്നും എയർ ചീഫിനോട് പറഞ്ഞു. എന്നാൽ യഥാർത്ഥത്തിൽ 15 മിനിറ്റോളം വൈകിയാണ് വിമാനങ്ങൾ ടേക്ക് ഓഫ് ചെയ്തത്.

വർഷങ്ങളോളം ഈയൊരു ദൗത്യത്തിനായി കാത്തിരുന്ന പൈലറ്റുമാരുടെ അവസരം നിഷേധിക്കുന്നത് ക്രൂരതയായതിനാലാണ് അങ്ങനെ പറഞ്ഞതെന്നും കപൂർ വ്യക്തമാക്കി. തുടർന്ന് നടന്ന ആക്രമണത്തിൽ പാകിസ്താന്റെ ഹാംഗറും അതിനുള്ളിലെ വിമാനവും കൃത്യമായി തകർക്കപ്പെട്ടു. പിന്നീട് പ്രതിരോധ മന്ത്രി രാജ്‌നാഥ് സിങ്ങിനൊപ്പമുള്ള ഉച്ചഭക്ഷണ വേളയിൽ എയർ ചീഫിനോട് താൻ അന്ന് നുണ പറഞ്ഞതാണെന്ന് സമ്മതിച്ചപ്പോൾ, “എനിക്കത് അറിയാമായിരുന്നു” എന്നായിരുന്നു എ.പി. സിംഗിന്റെ പുഞ്ചിരിയോടെയുള്ള മറുപടി.

Story Summary

Air Marshal Nagesh Kapoor revealed that he had to conceal the exact timeline from Air Chief Marshal A.P. Singh to ensure IAF pilots could execute a precise strike on Pakistan’s Bholari Airbase during Operation Sindoor. Armed with BrahMos missiles on Sukhoi-30 MKIs, the IAF successfully destroyed Pakistan’s SAAB Erieye aircraft.