സിനിമാ ലോകത്തെ ഞെട്ടിച്ച് ലഹരിക്കേസ്: നടൻ റോഹുല്ല മെഹ്ദി അറസ്റ്റിൽ | Actor Rohullah Mehdi

മുംബൈ: സോഷ്യൽ മീഡിയ കേന്ദ്രീകരിച്ച് പ്രവർത്തിക്കുന്ന വൻ ലഹരിമരുന്ന് ശൃംഖലയുമായി ബന്ധപ്പെട്ട് നടനും മോഡലുമായ റോഹുല്ല മെഹ്ദി ദാറിനെയും കൂട്ടാളിയെയും മുംബൈ കാശിമീര പോലീസ് ക്രൈംബ്രാഞ്ച് അറസ്റ്റ് ചെയ്തു. ഇവരിൽ നിന്ന് ഏകദേശം 5.6 ലക്ഷം രൂപ വിലമതിക്കുന്ന 28 ഗ്രാം മെഫെഡ്രോൺ (MD) മയക്കുമരുന്ന് പോലീസ് പിടിച്ചെടുത്തു.(Actor Rohullah Mehdi Arrested In Mumbai Drug Bust MD Drugs Worth 5 Lakhs Seized)

ഷാഹിദ് കപൂർ നായകനായ ‘ദേവ’ (2025) എന്ന ചിത്രത്തിലൂടെ ശ്രദ്ധേയനായ നടനാണ് അറസ്റ്റിലായ റോഹുല്ല. സ്നാപ്ചാറ്റ്, വാട്സ്ആപ്പ് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകൾ വഴി മയക്കുമരുന്ന് വിൽപ്പന നടത്തുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിൽ വ്യാജ ഉപഭോക്താവിനെ വച്ചാണ് പോലീസ് കെണിയൊരുക്കിയത്. തുടർന്ന് ദഹിസർ ചെക്ക് നാക്കയ്ക്ക് സമീപമുള്ള താക്കൂർ മാളിൽ വെച്ച് മയക്കുമരുന്ന് എത്തിച്ച കാശിഫ് എന്നയാളെ പോലീസ് തടഞ്ഞുവെച്ചു. ഇയാളെ ചോദ്യം ചെയ്തപ്പോഴാണ് പ്രധാന കണ്ണിയായ റോഹുല്ല മെഹ്ദിയുടെ പേര് പുറത്തുവന്നത്.

തുടർന്ന് നടത്തിയ തെരച്ചിലിൽ മലോട്ടിലെ ഒരു ഷൂട്ടിംഗ് സ്റ്റുഡിയോയ്ക്ക് പുറത്തുനിന്നാണ് കാശ്മീരിലെ ബുഡ്ഗാം സ്വദേശിയായ റോഹുല്ലയെ പോലീസ് കസ്റ്റഡിയിലെടുത്തത്. എൻ.ഡി.പി.എസ് നിയമപ്രകാരം എഫ്.ഐ.ആർ രജിസ്റ്റർ ചെയ്ത പ്രതികളെ കോടതി 5 ദിവസത്തെ പോലീസ് കസ്റ്റഡിയിൽ വിട്ടു. സിനിമാ മേഖലയിലെ മറ്റ് പ്രമുഖർക്കോ ടെലിവിഷൻ താരങ്ങൾക്കോ ലഹരിമരുന്ന് വിതരണം ചെയ്തിട്ടുണ്ടോ എന്ന് പോലീസ് അന്വേഷിച്ചു വരികയാണ്.

Story Summary

Actor and model Rohullah Mehndi Dar, who appeared in Shahid Kapoor’s film Deva, was arrested by Kashimira Police alongside an associate in a drug bust involving 28 grams of Mephedrone (MD) valued at ₹5.6 lakh. The narcotics network allegedly operated via Snapchat and WhatsApp, prompting police to expand the investigation into potential Bollywood drug links.