ഓണത്തിന് ഇത്തവണ ട്രൈ ചെയ്യാം 5 വ്യത്യസ്ത മേക്കപ്പ് ലുക്കുകൾ; സാരിയ്ക്കൊപ്പം ഗ്ലാമറസാകാൻ ഇതാ ഐഡിയകൾ | Onam makeup looks

കസവുസാരിയും മുല്ലപ്പൂവും പൂക്കളവും ഓണസദ്യയുമെല്ലാം ചേർന്ന ആഘോഷത്തിൽ മേക്കപ്പിനും വലിയ പ്രാധാന്യമുണ്ട്. പതിവ് കാജലും ചെറിയ പൊട്ടും മാത്രം പരീക്ഷിക്കുന്നതിന് പകരം ഇത്തവണ അൽപം വ്യത്യസ്തമായ ലുക്കുകൾ പരീക്ഷിക്കാം. ഓണാഘോഷത്തിനും ഫോട്ടോഷൂട്ടുകൾക്കും ഒരുപോലെ ചേരുന്ന അഞ്ച് മേക്കപ്പ് സ്റ്റൈലുകളാണ് ശ്രദ്ധ നേടുന്നത്. (Onam makeup looks)

1. 80s ഗ്ലാം

അൽപം ബോൾഡ് ലുക്ക് ഇഷ്ടപ്പെടുന്നവർക്ക് 80കളിലെ ഗ്ലാം മേക്കപ്പ് പരീക്ഷിക്കാം. മാറ്റ് ഫിനിഷുള്ള ലൈറ്റ് ഫൗണ്ടേഷൻ, ബ്രിക്ക് റെഡ് ലിപ്, കട്ടിയുള്ള കൺപീലികൾ, സോഫ്റ്റ് ബ്ലഷ് എന്നിവയ്ക്കൊപ്പം വലിയ വട്ടപ്പൊട്ടും നൽകാം. കസവുസാരിക്കൊപ്പം ഈ ലുക്ക് കൂടുതൽ ശ്രദ്ധേയമാകും.

2. ഫിയറി റെഡ്

ഓണത്തിന് അധികം മേക്കപ്പ് വേണ്ടെന്നുള്ളവർക്ക് ഒരു ബോൾഡ് റെഡ് ലിപ് തന്നെ ലുക്കിന്റെ ഹൈലൈറ്റാക്കാം. ചെറിയ കറുത്ത പൊട്ട്, സ്വാഭാവികമായ ബ്ലഷ്, നന്നായി നിർവചിച്ച പുരികങ്ങൾ എന്നിവ ചേർത്താൽ ലളിതവും ആകർഷകവുമായ ലുക്ക് ലഭിക്കും. ഡ്യൂവി ഫിനിഷ് നൽകാൻ മേക്കപ്പിന് മുമ്പ് ചർമ്മത്തിൽ ആവശ്യമായ മോയ്സ്ചറൈസർ ഉപയോഗിക്കാം.

3. നോ-മേക്കപ്പ് മേക്കപ്പ്

‘മേക്കപ്പ് ചെയ്തിട്ടും മേക്കപ്പ് ചെയ്തതായി തോന്നാത്ത’ ലുക്കാണ് ഇപ്പോഴത്തെ ട്രെൻഡ്. ഓണത്തിനും ഇത് മികച്ച ഓപ്ഷനാണ്. ചെറിയ അളവിൽ കൺസീലർ, കാജൽ, സ്വാഭാവിക നിറത്തിലുള്ള ലിപ് ടിന്റ് അല്ലെങ്കിൽ ഗ്ലോസ്, വളരെ നേരിയ ബ്ലഷ് എന്നിവ ഉപയോഗിച്ച് ഫ്രഷ് ലുക്ക് സ്വന്തമാക്കാം.

4. കണ്ണുകൾക്ക് കൂടുതൽ പ്രാധാന്യം

മേക്കപ്പിൽ പരീക്ഷണങ്ങൾ നടത്താൻ ആഗ്രഹിക്കുന്നവർക്ക് ഐ മേക്കപ്പിൽ ഫോക്കസ് ചെയ്യാം. ഗ്രാഫിക് ഐലൈനർ, ഡ്രമാറ്റിക് വിങ്, അല്ലെങ്കിൽ വസ്ത്രത്തിന്റെ നിറവുമായി ചേരുന്ന കളർഡ് ടൈറ്റ്‌ലൈൻ എന്നിവ ലുക്കിന് വ്യത്യസ്തമായ ഭാവം നൽകും. കസവുസാരിയുടെ പരമ്പരാഗത ഭംഗിക്കൊപ്പം ചെറിയൊരു മോഡേൺ ടച്ച് നൽകാനും ഈ സ്റ്റൈൽ സഹായിക്കും.

5. സോഫ്റ്റ് ഗ്ലാം

വളരെ അധികം മേക്കപ്പും വേണ്ട, എന്നാൽ സാധാരണ ലുക്കിൽ നിന്ന് അൽപം വ്യത്യസ്തമാകണമെന്നും ആഗ്രഹിക്കുന്നവർക്ക് സോഫ്റ്റ് ഗ്ലാം മികച്ചതാണ്. നാച്ചുറൽ ബേസ്, നേരിയ ബ്ലഷ്, സോഫ്റ്റ് ഐ മേക്കപ്പ്, ന്യൂഡ് അല്ലെങ്കിൽ പിങ്ക് ടോൺ ലിപ് കളർ എന്നിവ ഉപയോഗിച്ച് എലഗന്റ് ലുക്ക് നേടാം. ഓണാഘോഷത്തിനിടെ ഏറെ നേരം മേക്കപ്പ് നിലനിർത്താനും ഈ ലുക്ക് താരതമ്യേന എളുപ്പമാണ്.