സർക്കാർ ആശുപത്രികളിൽ 24 മണിക്കൂർ സ്പെഷ്യലിസ്റ്റ് സേവനം; സർക്കാരും കെജിഎംഒഎയും തമ്മിൽ സമവായം | Kerala government hospitals 24 hour specialist service

കൊച്ചി: സംസ്ഥാനത്തെ സർക്കാർ ജില്ലാ, ജനറൽ ആശുപത്രികളിൽ മുഴുവൻ സമയ സ്പെഷ്യലിസ്റ്റ് ഡോക്ടർമാരുടെ സേവനം ഉറപ്പാക്കുന്ന പദ്ധതിയുമായി ബന്ധപ്പെട്ട് സർക്കാരും കേരള ഗവൺമെന്റ് മെഡിക്കൽ ഓഫീസേഴ്സ് അസോസിയേഷനും (കെജിഎംഒഎ) തമ്മിൽ സമവായത്തിലെത്തി (Kerala government hospitals 24 hour specialist service). സ്പെഷ്യാലിറ്റി ഡോക്ടർമാരുടെ ഒഴിവുകൾ നികത്തുന്നതും പ്രമോഷൻ നടപടികൾ വേഗത്തിലാക്കുന്നതും ഉൾപ്പെടെയുള്ള ആവശ്യങ്ങളിൽ സർക്കാർ ഉറപ്പ് നൽകിയതോടെയാണ് പ്രശ്നപരിഹാരമായത്.

പദ്ധതിയുമായി ബന്ധപ്പെട്ട വിഷയങ്ങളിൽ ആരോഗ്യമന്ത്രി കെജിഎംഒഎ പ്രതിനിധികളുമായി നടത്തിയ ചർച്ചയിലാണ് ധാരണ രൂപപ്പെട്ടത്. 24 മണിക്കൂറും സ്പെഷ്യലിസ്റ്റ് സേവനം ഉറപ്പാക്കുന്നതിനുള്ള തീരുമാനത്തോട് തുടക്കത്തിൽ സംഘടന എതിർപ്പ് പ്രകടിപ്പിച്ചിരുന്നു. ആവശ്യമായ ഒഴിവുകൾ നികത്തുകയും കൂടുതൽ നിയമനങ്ങൾ നടത്തുകയും വേണമെന്നതായിരുന്നു കെജിഎംഒഎയുടെ പ്രധാന ആവശ്യം.

ആവശ്യത്തിന് ഡോക്ടർമാർ നിലവിലെ ആരോഗ്യ സംവിധാനത്തിനുള്ളിൽ തന്നെയുണ്ടെന്നും പ്രാഥമിക ആരോഗ്യകേന്ദ്രങ്ങളിൽ സേവനമനുഷ്ഠിക്കുന്ന സ്പെഷ്യലിസ്റ്റുമാരെ പുനർവിന്യസിച്ച് പദ്ധതി നടപ്പാക്കാമെന്നുമായിരുന്നു സർക്കാരിന്റെ നിലപാട്. എന്നാൽ ചർച്ചയ്ക്ക് പിന്നാലെ ഒഴിവുകൾ നികത്തുന്നതിനും പ്രമോഷൻ നടപടികൾ വേഗത്തിലാക്കുന്നതിനും സർക്കാർ തയ്യാറാണെന്ന് വ്യക്തമാക്കി.

പ്രാഥമിക ആരോഗ്യകേന്ദ്രങ്ങളിൽ നിന്നുള്ള സ്പെഷ്യലിസ്റ്റ് ഡോക്ടർമാരെ പുനർവിന്യസിക്കുന്നതിന് മുമ്പ് അവരുടെ സമ്മതം തേടുമെന്നും സർക്കാർ അറിയിച്ചു. പുനർവിന്യസിക്കപ്പെടുന്ന ഡോക്ടർമാരുടെ നിലവിലെ സ്ഥാനങ്ങളിൽ പകരം ഡോക്ടർമാരെ ലഭ്യമാക്കാനും നടപടി സ്വീകരിക്കും.

പുനർവിന്യസിക്കപ്പെടുന്ന സ്പെഷ്യലിസ്റ്റ് ഡോക്ടർമാർക്ക് പ്രത്യേക അലവൻസ് അനുവദിക്കണമെന്ന കെജിഎംഒഎയുടെ ആവശ്യവും പരിഗണിക്കുമെന്ന് സർക്കാർ ഉറപ്പ് നൽകിയിട്ടുണ്ട്.

സമവായം രൂപപ്പെട്ട സാഹചര്യത്തിൽ പുനലൂർ ആശുപത്രിയിൽ പദ്ധതി പൂർണതോതിൽ ഉടൻ നടപ്പാക്കും. ഓർത്തോപീഡിക്സ്, ഗൈനക്കോളജി, പീഡിയാട്രിക്സ്, ജനറൽ മെഡിസിൻ, ജനറൽ സർജറി വിഭാഗങ്ങളിൽ രാവിലെ എട്ട് മുതൽ രാത്രി എട്ട് വരെ സ്പെഷ്യലിസ്റ്റ് ഡോക്ടറുടെ സേവനം ലഭ്യമാക്കും.

രാത്രി എട്ടിന് ശേഷം ഓൺ-കോൾ സംവിധാനത്തിലൂടെ സ്പെഷ്യലിസ്റ്റ് സേവനം ഉറപ്പാക്കാനാണ് തീരുമാനം. സർക്കാർ ആശുപത്രികളിലെ വിദഗ്ധ ചികിത്സാ സേവനം കൂടുതൽ കാര്യക്ഷമമാക്കാൻ പുതിയ സംവിധാനം സഹായിക്കുമെന്നാണ് പ്രതീക്ഷ.

Story Summary:
The Kerala government and KGMOA have reached an agreement on ensuring round-the-clock specialist services in government district and general hospitals. The government has agreed to fill specialist vacancies, speed up promotions and consider concerns regarding the redeployment of doctors.