അർജന്റീനയുടെ ജേഴ്സി അഴിച്ച് മെസ്സി; ഇനി രാജ്യത്തിനായി കളിക്കില്ല! അവസാന മത്സരം കഴിഞ്ഞ് തീരുമാനം…

20 വർഷം നീണ്ട അർജന്റീനയുടെ ജേഴ്സിയിലെ യാത്രയ്ക്ക് അവസാനം. 2026 ലോകകപ്പ് ഫൈനലിന് പിന്നാലെ രാജ്യാന്തര ഫുട്ബോളിൽ നിന്ന് വിരമിക്കുന്നതായി ലയണൽ മെസ്സി പ്രഖ്യാപിച്ചു. 2022 ലോകകപ്പ് കിരീടം അർജന്റീനയ്ക്ക് സമ്മാനിച്ച മെസ്സിയുടെ അവസാന രാജ്യാന്തര മത്സരം 2026 ലോകകപ്പ് ഫൈനലായിരുന്നു. ന്യൂജഴ്‌സിയിൽ നടന്ന ഫൈനലിൽ സ്പെയിനോട് അർജന്റീന 1–0ന് തോറ്റു. തന്റെ ആറാമത്തെ ലോകകപ്പിൽ എട്ട് ഗോളും നാല് അസിസ്റ്റും നേടി ലോകകപ്പിലെ ഏറ്റവും മികച്ച പ്രകടനമാണ് മെസ്സി പുറത്തെടുത്തത്. രാജ്യാന്തര കരിയർ അവസാനിപ്പിച്ചെങ്കിലും ഇന്റർ മിയാമിക്കായി എംഎൽഎസിൽ കളി തുടരുമെന്നാണ് റിപ്പോർട്ട്.

ഇൻസ്റ്റഗ്രാമിലൂടെയാണ് മെസ്സി വിരമിക്കൽ പ്രഖ്യാപനം നടത്തിയത്. ഏറെ ആലോചിച്ച ശേഷമാണ് ദേശീയ ടീമിൽ നിന്ന് പിന്മാറാനുള്ള തീരുമാനമെടുത്തതെന്നും ഇത് വേദനിപ്പിക്കുന്ന തീരുമാനമാണെന്നും മെസ്സി വ്യക്തമാക്കി. അർജന്റീനയുടെ ജേഴ്സിക്കായി എല്ലാക്കാലത്തും പരമാവധി നൽകിയെന്നും ആരാധകരെ സന്തോഷിപ്പിക്കാനും രാജ്യത്തെ അഭിമാനിപ്പിക്കാനും താൻ പോരാടിയെന്നും അദ്ദേഹം പറഞ്ഞു. ഇനി ദേശീയ ടീമിനായി തനിക്ക് നൽകാൻ അധികമൊന്നുമില്ലെന്നും മികച്ച യുവതാരങ്ങൾ ടീമിലേക്ക് എത്തുന്നുണ്ടെന്നും മെസ്സി കൂട്ടിച്ചേർത്തു.

ALSO READ;മെസ്സിക്ക് എന്തുപറ്റി? ആ മാന്ത്രിക കാലുകൾക്ക് വിശ്രമമോ അതോ തന്ത്രമോ!

2005 ഓഗസ്റ്റിൽ ഹംഗറിക്കെതിരായ സൗഹൃദ മത്സരത്തിലൂടെയാണ് മെസ്സി അർജന്റീനയുടെ സീനിയർ ടീമിൽ അരങ്ങേറ്റം കുറിച്ചത്. അടുത്ത വർഷം തന്നെ ലോകകപ്പിലും കളിച്ചു. രണ്ട് പതിറ്റാണ്ട് നീണ്ട രാജ്യാന്തര കരിയറിൽ വിജയങ്ങൾക്കൊപ്പം ഫൈനലുകളിലെ നിരാശകളും മെസ്സിക്ക് നേരിടേണ്ടിവന്നു. ഒടുവിൽ ഖത്തറിൽ നടന്ന 2022 ലോകകപ്പിൽ കിരീടം ഉയർത്തി തന്റെ ഏറ്റവും വലിയ സ്വപ്നം സാക്ഷാത്കരിച്ചു. ഇതിനുപുറമെ നിരവധി രാജ്യാന്തര കിരീടങ്ങളും അർജന്റീനയ്ക്കായി സ്വന്തമാക്കി.

അച്ഛൻ ജോർജ് മെസ്സിയുടെ മരണം കൂടി തീരുമാനത്തെ കൂടുതൽ ഉറപ്പിച്ചതായി മെസ്സി വ്യക്തമാക്കി. ജൂലൈ 21ന്, ലോകകപ്പ് ഫൈനലിന് രണ്ട് ദിവസത്തിന് ശേഷം തന്നെയാണ് വിരമിക്കൽ കുറിപ്പ് എഴുതിയതെന്നും പിന്നീട് അച്ഛന്റെ മരണത്തിന് പിന്നാലെ തീരുമാനത്തിൽ കൂടുതൽ ഉറപ്പുണ്ടായെന്നും അദ്ദേഹം പറഞ്ഞു. അർജന്റീനയ്ക്കായി നൽകിയ 20 വർഷത്തെ പിന്തുണയ്ക്ക് ആരാധകർക്കും കുടുംബത്തിനും പരിശീലകർക്കും സഹതാരങ്ങൾക്കും നന്ദി പറഞ്ഞ മെസ്സി, ഇനി പുറത്തുനിന്ന് ദേശീയ ടീമിനെ പിന്തുണയ്ക്കുമെന്നും വ്യക്തമാക്കി. ‘വാമോസ്, അർജന്റീന’ എന്ന വാക്കുകളോടെയാണ് രാജ്യാന്തര കരിയറിന് മെസ്സി വിരാമമിട്ടത്.

The post അർജന്റീനയുടെ ജേഴ്സി അഴിച്ച് മെസ്സി; ഇനി രാജ്യത്തിനായി കളിക്കില്ല! അവസാന മത്സരം കഴിഞ്ഞ് തീരുമാനം… appeared first on Express Kerala.