കാലിക്കടവ് എംഡിഎംഎ കേസ്: ഘാന സ്വദേശിയും മലയാളി യുവതിയും പിടിയിൽ; അന്താരാഷ്ട്ര ബന്ധം പരിശോധിച്ച് പൊലീസ് | Kasaragod MDMA case

കാസർഗോഡ്: യൂത്ത് കോൺഗ്രസ് നേതാവ് പ്രതിയായ കാസർഗോഡ് കാലിക്കടവ് ചന്തേര എംഡിഎംഎ കേസിൽ മുഖ്യ സൂത്രധാരന്മാരെന്ന് അന്വേഷണ സംഘം സംശയിക്കുന്ന രണ്ടുപേരെ കൂടി പിടികൂടി (Kasaragod MDMA case). ഘാന സ്വദേശിയായ വിക്ടറും കേസിലെ നിർണായക കണ്ണിയെന്ന് കരുതുന്ന മലയാളി യുവതി റിയയുമാണ് പിടിയിലായത്.

കേസിൽ നേരത്തെ അറസ്റ്റിലായ പ്രതികളെ കസ്റ്റഡിയിൽ വാങ്ങി അന്വേഷണ സംഘം വിശദമായി ചോദ്യം ചെയ്തിരുന്നു. ഇതിന്റെ അടിസ്ഥാനത്തിൽ മയക്കുമരുന്ന് ശൃംഖലയ്ക്ക് അന്താരാഷ്ട്ര ബന്ധമുണ്ടോയെന്ന കാര്യത്തിൽ അന്വേഷണ സംഘം പരിശോധന ശക്തമാക്കിയിരുന്നു. സംഘത്തിലെ യുവതിയെ കണ്ടെത്തുന്നതിനായും വ്യാപക അന്വേഷണം നടന്നുവരികയായിരുന്നു.

തുടർന്നുള്ള അന്വേഷണത്തിനൊടുവിലാണ് ഗ്വാളിയോറിൽ നിന്ന് റിയയെ പിടികൂടിയത്. കേസിലെ മയക്കുമരുന്ന് ഇടപാടുകളുമായി ബന്ധപ്പെട്ട് റിയയുടെ പങ്കും മറ്റ് പ്രതികളുമായുള്ള ബന്ധവും അന്വേഷണ സംഘം വിശദമായി പരിശോധിച്ചുവരികയാണ്.

അതേസമയം, ഘാന സ്വദേശിയായ വിക്ടറുടെ അറസ്റ്റ് കേസിന് പുതിയ വഴിത്തിരിവായിട്ടുണ്ട്. ഇയാളെ പിടികൂടിയതോടെ മയക്കുമരുന്ന് ശൃംഖലയ്ക്ക് വിദേശബന്ധമുണ്ടെന്ന സംശയവും കൂടുതൽ ശക്തമായിരിക്കുകയാണ്.

പ്രത്യേക അന്വേഷണ സംഘം നടത്തിയ പരിശോധനയിലൂടെയാണ് കേസിലെ പ്രധാന കണ്ണികളെന്ന് സംശയിക്കുന്ന ഇരുവരും പിടിയിലായത്. ഇവരുടെ ചോദ്യം ചെയ്യലിലൂടെ മയക്കുമരുന്ന് ശൃംഖലയെക്കുറിച്ചും മറ്റ് പ്രതികളെക്കുറിച്ചും കൂടുതൽ വിവരങ്ങൾ ലഭിക്കുമെന്നാണ് അന്വേഷണ സംഘത്തിന്റെ പ്രതീക്ഷ.

Story Summary:Two more key suspects, including a Ghanaian national and a Malayali woman, have been detained in connection with the Kalikkadavu Chandera MDMA case in Kasaragod. Investigators are examining suspected international links and the wider drug distribution network.