ഗാന്ധിനഗറിൽ കെട്ടിടം തകർന്നു വീണുണ്ടായ അപകടം: 15 തൊഴിലാളികളെയും രക്ഷപ്പെടുത്തി, 13 പേർ ചികിത്സയിലെന്ന് ഗുജറാത്ത് ആരോഗ്യമന്ത്രി | Gandhinagar Building Collapse

ഗാന്ധിനഗർ: ഗുജറാത്തിലെ ഗാന്ധിനഗർ കുഡാസൻ മേഖലയിൽ നിർമ്മാണത്തിലിരുന്ന കെട്ടിടത്തിന്റെ വലിയ മെറ്റൽ സ്ലാബ് തകർന്നുവീണുണ്ടായ അപകടത്തിൽ 15 തൊഴിലാളികളെ രക്ഷപ്പെടുത്തി. ബുധനാഴ്ച രാത്രി 9 മണിയോടെയാണ് അപകടം നടന്നത്.(Gandhinagar Building Collapse 15 Workers Rescued In Kudasan)

തുടർന്ന് എൻ.ഡി.ആർ.എഫ് (NDRF), എസ്.ഡി.ആർ.എഫ് (SDRF) ടീമുകൾ പ്ലാസ്മ, ഗ്യാസ് കട്ടറുകൾ ഉപയോഗിച്ച് രാത്രി മുഴുവൻ അവശിഷ്ടങ്ങൾ നീക്കം ചെയ്ത് തിരച്ചിൽ തുടർന്നതായി ഗുജറാത്ത് ഉപമുഖ്യമന്ത്രി ഹർഷ സംഘവി അറിയിച്ചു. കെട്ടിടാവശിഷ്ടങ്ങൾക്കിടയിൽ നിന്ന് രക്ഷപ്പെടുത്തിയ 13 തൊഴിലാളികളെ ഗാന്ധിനഗർ സിവിൽ ആശുപത്രിയിൽ പ്രവേശിപ്പിച്ചു.

ആരുടെയും നില ഗുരുതരമല്ലെന്ന് ഗുജറാത്ത് ആരോഗ്യ മന്ത്രി പ്രഫുൽ പൻഷേരിയ അറിയിച്ചു. അപകടത്തിൽപ്പെട്ട 15 പേരുടെയും ആരോഗ്യനില തൃപ്തികരമാണെന്നും മരണങ്ങളൊന്നും സംഭവിച്ചിട്ടില്ലെന്നും ഗാന്ധിനഗർ കളക്ടറും ജില്ലാ മജിസ്‌ട്രേറ്റുമായ രവീന്ദ്ര ഖതാ ലെ വ്യക്തമാക്കി. അപകട സമയത്ത് 13 പേരാണ് സംഭവസ്ഥലത്തുണ്ടായിരുന്നത്. അവശിഷ്ടങ്ങൾക്കിടയിൽ കൂടുതൽ ആളുകൾ കുടുങ്ങിക്കിടക്കുന്നില്ലെന്ന് ഉറപ്പാക്കാൻ പ്രദേശത്ത് തിരച്ചിൽ തുടരുകയാണ്. സംഭവത്തിന് പിന്നാലെ ആരോഗ്യ മന്ത്രി പ്രഫുൽ പൻഷേരിയ, എം.എൽ.എ റീതാബെൻ പട്ടേൽ, ഉപമുഖ്യമന്ത്രി ഹർഷ സംഘവി എന്നിവർ ആശുപത്രിയിലെത്തി പരിക്കേറ്റ തൊഴിലാളികളെ സന്ദർശിച്ചു.

Story Summary

A metal slab collapsed at an under-construction building in the Kudasan area of Gandhinagar, Gujarat, trapping around 15 workers. Rescue teams including NDRF and SDRF safely pulled out all 15 laborers, with 13 currently receiving medical care at Gandhinagar Civil Hospital, and no casualties reported.