അതിവേഗത്തിലെത്തിയ കാർ മീൻകടയിലേക്ക് പാഞ്ഞുകയറി അപകടം: പത്താം ക്ലാസ് വിദ്യാർത്ഥി മരിച്ചു, 3 പേർക്ക് ഗുരുതര പരിക്ക് | Trichy Road Accident
Current: മലയാളം
തിരുച്ചിറപ്പള്ളി: നിയന്ത്രണം വിട്ട കാർ വഴിയോരത്തെ മീൻകടയിലേക്ക് ഇടിച്ചുകയറി പതിനാറുകാരനായ സ്കൂൾ വിദ്യാർത്ഥി കൊല്ലപ്പെട്ടു (Trichy Road Accident). അപകടത്തിൽ മൂന്ന് പേർക്ക് ഗുരുതരമായി പരിക്കേറ്റു. തമിഴ്നാട്ടിലെ തിരുച്ചിറപ്പള്ളി മണപ്പാറയ്ക്ക് സമീപമുള്ള ചെക്കനം ഗ്രാമത്തിലെ ജോൺസൺ (16) ആണ് മരിച്ചത്. കരുങ്കുളം ഗവൺമെന്റ് ഹയർ സെക്കൻഡറി സ്കൂളിലെ പത്താം ക്ലാസ് വിദ്യാർത്ഥിയാണ് ജോൺസൺ.
കുടുംബത്തിന്റെ സാമ്പത്തിക ബുദ്ധിമുട്ടുകൾ പരിഹരിക്കുന്നതിനായി ഞായറാഴ്ചകളിൽ ജോൺസൺ വഴിയോരത്ത് മീൻകട നടത്തി വരികയായിരുന്നു. സംഭവ ദിവസം തൂത്തുക്കുടിയിൽ നിന്ന് ചെന്നൈയിലേക്ക് അമിത വേഗതയിൽ വരികയായിരുന്ന കാർ പെട്ടെന്ന് നിയന്ത്രണം വിട്ട് റോഡരികിൽ പ്രവർത്തിച്ചിരുന്ന ജോൺസന്റെ മീൻകടയിലേക്ക് ഇടിച്ചുകയറുകയായിരുന്നു.
അപകടത്തിൽ ഗുരുതരമായി പരിക്കേറ്റ ജോൺസണെ പ്രദേശവാസികൾ ഉടൻ തന്നെ സമീപത്തെ ആശുപത്രിയിലെത്തിക്കാൻ ശ്രമിച്ചെങ്കിലും വഴിമധ്യേ മരണം സംഭവിക്കുകയായിരുന്നു.
ഈ സമയം കടയിൽ മീൻ വാങ്ങാനെത്തിയ മൂന്ന് ഉപഭോക്താക്കൾക്കും അപകടത്തിൽ ഗുരുതരമായി പരിക്കേറ്റു. ഇവരെയും നാട്ടുകാർ ചേർന്ന് വിദഗ്ധ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. സംഭവമറിഞ്ഞ് വൈയംപട്ടി പോലീസ് സ്ഥലത്തെത്തി അന്വേഷണം ആരംഭിച്ചു. അപകടമുണ്ടാക്കിയ കാർ ഡ്രൈവറെ പോലീസ് കസ്റ്റഡിയിലെടുത്തിട്ടുണ്ട്. സംഭവത്തിൽ പ്രദേശത്ത് കടുത്ത ശോകമൂകമായ അന്തരീക്ഷമാണ് നിലനിൽക്കുന്നത്.
