നാഗ യുവാവിൻ്റെ ശിരസ്സ് തിരികെ എത്തിക്കാതെ പോസ്റ്റ്‌മോർട്ടം അനുവദിക്കില്ല: കേന്ദ്രത്തിനും മണിപ്പൂർ സർക്കാരിനും 48 മണിക്കൂർ സമയം നൽകി നാഗാ സംഘടനകൾ | Naga Organizations

ഗുവഹാത്തി: കുക്കി തീവ്രവാദികൾ ബലി നൽകിയെന്നു ആരോപിക്കപ്പെടുന്ന നാഗാ യുവാവിന്റെ വിച്ഛേദിക്കപ്പെട്ട തല കണ്ടെത്തി കുടുംബത്തിന് വിട്ടുനൽകാൻ കേന്ദ്ര-മണിപ്പൂർ സർക്കാരുകൾക്ക് 48 മണിക്കൂർ അന്ത്യശാസനം നൽകി ജോയിന്റ് ട്രൈബ്സ് കൗൺസിൽ-മണിപ്പൂർ (WC-JTC) വർക്കിംഗ് കമ്മിറ്റി. കുക്കി ഭൂരിപക്ഷ പ്രദേശമായ കാംഗ്‌പോക്പി ജില്ലയിൽ കഴിഞ്ഞ ശനിയാഴ്ച കുക്കി വിമതർ നടത്തിയ ആക്രമണത്തിലാണ് അജിൻബൗ ആർ എന്ന നാഗാ യുവാവ് ശിരച്ഛേദം ചെയ്യപ്പെട്ട് കൊല്ലപ്പെട്ടത്.(Naga Organizations Issue 48 Hour Ultimatum Over Manipur Beheading Incident)

ആക്രമണത്തിൽ മറ്റ് മൂന്ന് നാഗാ യുവാക്കളും കൊല്ലപ്പെട്ടിരുന്നു. ദിബാംബൗ റിങ്‌കാങ്മെയ്, മച്ചുങ്‌അമാങ് ദൈമെയ്, റാംനിങ്പൗ ഗാങ്മെയ് എന്നിവരാണ് കൊല്ലപ്പെട്ട മറ്റ് മൂന്നുപേർ. ഇതോടൊപ്പം വെള്ളി, ശനി ദിവസങ്ങളിലായി കാംജോങ്, ഉഖ്രുൽ ജില്ലകളിൽ നടന്ന വെവ്വേറെ ആക്രമണങ്ങളിൽ രണ്ട് നാഗാ വംശജരും രണ്ട് കുക്കികളും ഒരു ഗോർഖ വിഭാഗക്കാരനും കൊല്ലപ്പെട്ടിരുന്നു.

അജിൻബൗവിന്റെ കാണാതായ തല വീണ്ടെടുത്ത് അന്തസ്സോടെ സംസ്‌കരിക്കാൻ കുടുംബത്തിന് നൽകുന്നതുവരെ അജിൻബൗ, ദിബാംബൗ എന്നിവരുടെ മൃതദേഹങ്ങൾ പോസ്റ്റ്‌മോർട്ടം ചെയ്യാൻ അനുവദിക്കില്ലെന്ന് ഡബ്ല്യുസി-ജെടിസി വ്യക്തമാക്കി. കേന്ദ്ര സർക്കാരുമായുള്ള സസ്പെൻഷൻ ഓഫ് ഓപ്പറേഷൻസ് കരാറിന്റെ മറവിലാണ് തീവ്രവാദികൾ ഇത്തരത്തിലുള്ള നിഷ്ഠൂരമായ ആക്രമണങ്ങൾ നടത്തുന്നതെന്നും, ക്രൂരതയ്ക്ക് മുന്നിൽ നിശ്ശബ്ദത പാലിക്കുന്ന സർക്കാരുകൾ ഇതിന് ഉത്തരവാദികളാണെന്നും സംഘടന കുറ്റപ്പെടുത്തി. 48 മണിക്കൂറിനകം നടപടിയുണ്ടായില്ലെങ്കിൽ കടുത്ത പ്രതിഷേധങ്ങളിലേക്ക് കടക്കുമെന്നും കൗൺസിൽ മുന്നറിയിപ്പ് നൽകി.

സംഭവത്തെ അതിശക്തമായി അപലപിച്ച നാഗാ സംഘടനകളുടെ പരമോന്നത സമിതിയായ യുണൈറ്റഡ് നാഗാ കൗൺസിൽ (UNC), ഈ കൊടും ക്രൂരത വെറുമൊരു കൊലപാതകമല്ലെന്നും മനുഷ്യാവകാശ ലംഘനവും ‘യുദ്ധക്കുറ്റവുമാണെന്ന്’ വിശേഷിപ്പിച്ചു. സുരക്ഷാ സേനയുടെ സാന്നിധ്യത്തിലും നാഗാ ഗ്രാമങ്ങൾ ആക്രമിക്കപ്പെടുന്നത് ഖേദകരമാണെന്ന് സമിതി കൂട്ടിച്ചേർത്തു. മേഖലയിലെ തീവ്രവാദം അവസാനിപ്പിക്കുമെന്ന് ഉറപ്പുനൽകിയ കേന്ദ്ര ആഭ്യന്തരമന്ത്രി അമിത് ഷാ അടിയന്തരമായി ഇടപെടണമെന്ന് മണിപ്പൂർ നാഗാ യൂത്ത് ഓർഗനൈസേഷൻ ആവശ്യപ്പെട്ടു. അക്രമത്തിന് പിന്നിൽ വിദേശ ശക്തികളോ കുക്കി നാഷണൽ ആർമി-ബർമയോ ഇല്ലെന്ന മണിപ്പൂർ മുഖ്യമന്ത്രി യുമ്നം ഖേംചന്ദ് സിംഗിന്റെയും ആഭ്യന്തരമന്ത്രി കൊന്തൗജാം ഗോവിന്ദാസിന്റെയും മുൻ പ്രസ്താവനകൾ പിൻവലിക്കണമെന്നും സംഘടന ആവശ്യപ്പെട്ടു.

Story Summary

The Joint Tribes Council-Manipur (WC-JTC) has issued a 48-hour deadline to the central and Manipur governments to recover the missing head of a Naga man beheaded in Kangpokpi district, allegedly by Kuki rebels. Naga organizations have refused post-mortem procedures until the decapitated head is returned for a dignified burial, calling the attack a war crime. They have also urged the government to hold SoO-sheltered insurgents accountable and treat the ongoing conflict as external aggression.