ട്രംപിന്റെ ഊർജ്ജ വെടിനിർത്തൽ നിർദ്ദേശം തള്ളി ഉക്രെയ്ൻ; റഷ്യൻ എണ്ണ ശുദ്ധീകരണ ശാലയ്ക്ക് നേരെ വൻ ഡ്രോൺ ആക്രമണം നടത്തി കീവ്; മോസ്കോയോടും പുടിനോടുമുള്ള യു.എസ് നയങ്ങളെ പരസ്യമായി രൂക്ഷമായി വിമർശിച്ച് പ്രസിഡന്റ് വ്ളോഡിമിർ സെലെൻസ്കി
Current: മലയാളം
കീവ്: ഊര്‍ജ്ജ നിലയങ്ങള്‍ക്ക് നേരെ നടത്തുന്ന ആക്രമണങ്ങള്‍ നിര്‍ത്തിവെക്കണമെന്ന യു.എസ് പ്രസിഡന്റ് ഡൊണാള്‍ഡ് ട്രംപിന്റെ വെടിനിര്‍ത്തല്‍ ആവശ്യം തള്ളി ഉക്രെയ്ന്‍.
യു.എസിന്റെ നിര്‍ദ്ദേശം അവഗണിച്ച് മോസ്‌കോയ്ക്ക് തെക്കുകിഴക്കന്‍ മേഖലയായ റിയാസാനിലുള്ള റഷ്യന്‍ സര്‍ക്കാര്‍ എണ്ണക്കമ്പനിയായ റോസ്നെഫ്റ്റിന്റെ ശുദ്ധീകരണ ശാലയ്ക്ക് നേരെ ഉക്രെയ്ന്‍ വന്‍ ഡ്രോണ്‍ ആക്രമണം നടത്തി.
ആക്രമണത്തില്‍ എണ്ണ ശുദ്ധീകരണ ശാലയില്‍ വന്‍ തീപിടുത്തമുണ്ടായതായി റിയാസാന്‍ ഗവര്‍ണര്‍ പാവല്‍ മാല്‍ക്കോവ് സ്ഥിരീകരിച്ചു.
റഷ്യന്‍ നിലയങ്ങള്‍ക്ക് നേരെയുള്ള ആക്രമണം താല്‍ക്കാലികമായി അവസാനിപ്പിച്ചിരുന്നെങ്കിലും റഷ്യ നിരന്തരം ഉക്രേനിയന്‍ ഊര്‍ജ്ജ നിലയങ്ങള്‍ക്ക് നേരെ മിസൈല്‍-ഡ്രോണ്‍ ആക്രമണങ്ങള്‍ തുടരുകയാണെന്നും തങ്ങളുടെ ക്ഷമ നശിച്ചതായും ഫിനാന്‍ഷ്യല്‍ ടൈംസിന് നല്‍കിയ അഭിമുഖത്തില്‍ ഉക്രെയ്ന്‍ പ്രസിഡന്റ് വ്‌ളോഡിമിര്‍ സെലെന്‍സ്‌കി വ്യക്തമാക്കി.
റഷ്യയുമായി കരാറുകളില്‍ ഏര്‍പ്പെടാനുള്ള ട്രംപിന്റെ നീക്കങ്ങളെയും വ്‌ളാഡിമിര്‍ പുടിനോടുള്ള മൃദുസമീപനത്തെയും സെലെന്‍സ്‌കി രൂക്ഷമായി വിമര്‍ശിച്ചു.
കൂടാതെ ഉക്രേനിയന്‍ ഡ്രോണുകളുടെ പ്രവര്‍ത്തനത്തെ തടസ്സപ്പെടുത്തുന്ന രീതിയില്‍ സ്‌പേസ് എക്‌സിന്റെ സ്റ്റാര്‍ലിങ്ക് സേവനങ്ങളില്‍ വരുത്തിയ നിയന്ത്രണങ്ങള്‍ക്ക് പിന്നില്‍ രാഷ്ട്രീയ തീരുമാനങ്ങളാണെന്നും അദ്ദേഹം ആരോപിച്ചു.
