ബ്രിക്സ് പാർലമെന്ററി ഫോറത്തിൽ സംയുക്ത പ്രഖ്യാപനത്തിന് സമവായം പ്രതീക്ഷിച്ച് ഓം ബിർള; ഭീകരവാദവും ചർച്ചയാകും | Om Birla BRICS Parliamentary Forum

ന്യൂഡൽഹി: ബ്രിക്സ് പാർലമെന്ററി ഫോറത്തിൽ എല്ലാ അംഗരാജ്യങ്ങളുടെയും പിന്തുണയോടെ സംയുക്ത പ്രഖ്യാപനം സാധ്യമാകുമെന്നാണ് പ്രതീക്ഷിക്കുന്നതെന്ന് ലോക്‌സഭാ സ്പീക്കർ ഓം ബിർള. ഒക്ടോബർ 26, 27 തീയതികളിൽ ന്യൂഡൽഹിയിലെ സംവിദാൻ സദനിൽ നടക്കുന്ന 12-ാമത് ബ്രിക്സ് പാർലമെന്ററി ഫോറത്തിന് മുന്നോടിയായാണ് അദ്ദേഹത്തിന്റെ പ്രതികരണം. അംഗരാജ്യങ്ങൾക്കിടയിൽ അഭിപ്രായവ്യത്യാസങ്ങളുണ്ടായിരുന്നിട്ടും ബ്രസീലിൽ നടന്ന ബ്രിക്സ് ഉച്ചകോടിയിൽ സംയുക്ത പ്രഖ്യാപനം സാധ്യമായത് അദ്ദേഹം ചൂണ്ടിക്കാട്ടി. (Om Birla BRICS Parliamentary Forum)

പൊതുവായ വിഷയങ്ങളിൽ സമവായത്തിലെത്താൻ ഇന്ത്യ മറ്റ് രാജ്യങ്ങളുമായി ചർച്ച നടത്തുമെന്ന് ബിർള പറഞ്ഞു. ഭീകരവാദം ലോകം നേരിടുന്ന ഗുരുതരമായ വെല്ലുവിളിയാണെന്നും എല്ലാ രാജ്യങ്ങളിലും ഭീകരവാദം അവസാനിക്കണമെന്നും അദ്ദേഹം വ്യക്തമാക്കി. ഫോറത്തിൽ ഈ വിഷയത്തിൽ വിശദമായ ചർച്ചയുണ്ടാകുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു. കാലാവസ്ഥാ വ്യതിയാനം ഉൾപ്പെടെയുള്ള അതിർത്തികൾ കടന്നുള്ള വെല്ലുവിളികളും പാർലമെന്റുകൾ തമ്മിലുള്ള ചർച്ചകളിൽ പ്രധാന വിഷയങ്ങളാണെന്ന് ബിർള ചൂണ്ടിക്കാട്ടി. ‘ജനകേന്ദ്രീകൃത വികസനത്തിനായി പാർലമെന്റുകളെ ശക്തിപ്പെടുത്തുക’ എന്നതാണ് സമ്മേളനത്തിന്റെ പ്രധാന പ്രമേയം. ജനാധിപത്യ സ്ഥാപനങ്ങളുടെ കാര്യക്ഷമതയും ഉത്തരവാദിത്തവും വർധിപ്പിക്കൽ, ഡിജിറ്റൽ സാങ്കേതികവിദ്യകളുടെയും നിർമിതബുദ്ധിയുടെയും ഉപയോഗം, ആഗോള ഭരണസംവിധാനത്തിൽ പാർലമെന്റുകൾ തമ്മിലുള്ള സഹകരണം, സുസ്ഥിരവും എല്ലാവരെയും ഉൾക്കൊള്ളുന്നതുമായ വികസനം തുടങ്ങിയ വിഷയങ്ങൾ സമ്മേളനത്തിൽ ചർച്ചയാകും.

പ്രധാനമന്ത്രി നരേന്ദ്ര മോദി സമ്മേളനത്തിൽ പങ്കെടുക്കുകയും വിവിധ രാജ്യങ്ങളിൽനിന്നെത്തുന്ന പ്രതിനിധി സംഘങ്ങളുടെ നേതാക്കളുമായി കൂടിക്കാഴ്ച നടത്തുകയും ചെയ്യും. ഫോറത്തിന് അധ്യക്ഷത വഹിക്കുന്ന ഓം ബിർള വിദേശ പാർലമെന്ററി നേതാക്കളുമായി ഉഭയകക്ഷി ചർച്ചകൾ നടത്തുകയും സമാപന പ്രസംഗം നിർവഹിക്കുകയും ചെയ്യും. ബ്രിക്സ് അംഗരാജ്യങ്ങൾക്കും പങ്കാളി രാജ്യങ്ങൾക്കും പുറമെ പാർലമെന്ററി അധ്യക്ഷന്മാർ, ജനപ്രതിനിധികൾ, കേന്ദ്രമന്ത്രിമാർ, സംസ്ഥാന നിയമസഭാംഗങ്ങൾ തുടങ്ങിയവരും പങ്കെടുക്കും.

ഇന്ത്യൻ പാർലമെന്റിന്റെ പ്രവർത്തനരീതികൾ മെച്ചപ്പെടുത്തുന്നതിനായി വിവിധ രാജ്യങ്ങളിലെ നിയമനിർമാണ നടപടികളും പാർലമെന്റിന്റെ പ്രവർത്തനദിവസങ്ങളും നയരൂപീകരണ രീതികളും പഠിച്ചുവരുന്നതായി ബിർള പറഞ്ഞു. വിവിധ രാജ്യങ്ങളുടെ അനുഭവങ്ങൾ പങ്കുവയ്ക്കുന്നതിലൂടെ ഇന്ത്യയ്ക്ക് അനുയോജ്യമായ മികച്ച പാർലമെന്ററി രീതികൾ കണ്ടെത്താനാകുമെന്നാണ് പ്രതീക്ഷ. റഷ്യൻ പ്രതിനിധി സംഘവുമായും ഇന്ത്യ-റഷ്യ പാർലമെന്ററി സൗഹൃദ ഗ്രൂപ്പുമായും പ്രത്യേക കൂടിക്കാഴ്ചകൾ നടക്കും. ഒക്ടോബർ 25-ന് പ്രതിനിധി സംഘങ്ങളുടെ സെക്രട്ടറിമാർ യോഗം ചേർന്ന് സംയുക്ത പ്രസ്താവനയ്ക്ക് അന്തിമരൂപം നൽകുമെന്നും ലോക്‌സഭാ സെക്രട്ടേറിയറ്റ് അറിയിച്ചു.

Summary: Lok Sabha Speaker Om Birla has expressed hope that the 12th BRICS Parliamentary Forum will adopt a joint declaration through consensus. The October 26–27 meeting in New Delhi is expected to discuss terrorism, climate change, artificial intelligence, parliamentary cooperation and people-centric development. Prime Minister Narendra Modi is scheduled to meet leaders of visiting delegations.