മൃഗങ്ങളിൽ പ്രധാനമായും കണ്ടുവരുന്ന ഷമോണ്ട വൈറസ് ബാധിച്ച് ഫ്രാൻസിൽ ഒരാൾ മരിച്ചു. മനുഷ്യരിൽ ഈ വൈറസ് ബാധ സ്ഥിരീകരിക്കുന്ന ആദ്യ സംഭവം. പ്രാണികളുടെ കടിയിലൂടെ പകർന്നതാകാമെന്ന് സംശയം. ആരോഗ്യവിദഗ്ധർ അന്വേഷണം ആരംഭിച്ചു

പാരിസ്: മൃഗങ്ങളിൽ പ്രധാനമായും കണ്ടുവരുന്ന ഷമോണ്ട വൈറസ് ബാധിച്ച് ഫ്രാൻസിൽ ഒരാൾ മരിച്ചതായി റിപ്പോർട്ട്. മനുഷ്യരിൽ ഈ വൈറസ് ബാധ സ്ഥിരീകരിക്കുന്ന ആദ്യ സംഭവമാണിതെന്നാണ് റിപ്പോർട്ട്. സംഭവത്തിന്റെ പശ്ചാത്തലത്തിൽ ആരോഗ്യവിദഗ്ധർ അന്വേഷണം ആരംഭിച്ചു.

മറ്റ് ഗുരുതര ആരോഗ്യപ്രശ്നങ്ങൾക്ക് ചികിത്സയിലായിരുന്ന, പ്രതിരോധശേഷി കുറഞ്ഞ രോഗിയിലാണ് വൈറസ് ബാധ കണ്ടെത്തിയത്. ലിയോണിലെ ആശുപത്രിയിൽ ചികിത്സയിലായിരുന്ന രോഗി ഒക്ടോബർ ആദ്യവാരമാണ് മരിച്ചത്. വൈറസ് ബാധയും മരണവും തമ്മിൽ നേരിട്ടുള്ള ബന്ധമുണ്ടോയെന്ന് വ്യക്തമാക്കാൻ കൂടുതൽ പരിശോധനകൾ ആവശ്യമാണ്.

പ്രാണികളുടെ കടിയിലൂടെ പകർന്നതാകാമെന്ന് സംശയം

കിഴക്കൻ ഫ്രാൻസിൽ ഈ വർഷം വസന്തകാലത്തും വേനൽക്കാലത്തും മൃഗങ്ങളിൽ ഷമോണ്ട വൈറസിന്റെ സാന്നിധ്യം കണ്ടെത്തിയിരുന്നു. വൈറസ് വാഹകരായ കടിക്കുന്ന ചെറുപ്രാണികളിലൂടെ രോഗിക്ക് അണുബാധയുണ്ടായതാകാമെന്നാണ് പ്രാഥമിക നിഗമനം. എന്നാൽ വൈറസ് ബാധയുടെ കൃത്യമായ ഉറവിടം ഇതുവരെ സ്ഥിരീകരിച്ചിട്ടില്ല.

കന്നുകാലികളിലാണ് ഈ വൈറസ് പ്രധാനമായും കണ്ടുവരുന്നത്. കുതിരകൾ, ആടുകൾ, ചെമ്മരിയാടുകൾ തുടങ്ങിയ മൃഗങ്ങളിലും വൈറസ് സാന്നിധ്യം റിപ്പോർട്ട് ചെയ്തിട്ടുണ്ട്. രോഗവാഹകരായ ചെറുപ്രാണികളുടെ കടിയിലൂടെയാണ് മൃഗങ്ങൾക്കിടയിൽ വൈറസ് പകരുന്നത്.

#France has reported the first documented case of a human infection with #Shamonda virus, a virus only previously detected in animals. The patient was immunocompromised, which made them more vulnerable to infection and severe disease, and unfortunately died. My heartfelt condolences to their loved ones. Shamonda virus primarily affects animals such as cattle, sheep, goats and horses. The virus is thought to spread between animals by the bites of a midge, which is a small fly-like insect. Further studies are needed to fully understand transmission. The French patient was in an area where the Shamonda virus was circulating in animals and where Culicoides midges were also present. @WHO is in contact with French authorities who are collecting information to better understand the source of infection in the first human patient, possible routes of transmission and any potential risk to public health.

— Tedros Adhanom Ghebreyesus (@DrTedros) October 22, 2026

ആരോഗ്യവിദഗ്ധരുടെ നിരീക്ഷണം

1960-കളിൽ നൈജീരിയയിലാണ് ഷമോണ്ട വൈറസ് ആദ്യമായി തിരിച്ചറിഞ്ഞത്. തുടർന്ന് ആഫ്രിക്കയുടെ വിവിധ ഭാഗങ്ങളിലും ജപ്പാനിലും മൃഗങ്ങളിൽ വൈറസ് സാന്നിധ്യം കണ്ടെത്തിയിട്ടുണ്ട്. 2026-ലെ വേനൽക്കാലത്ത് യൂറോപ്പിലെ കന്നുകാലികളിലും വൈറസ് ബാധ റിപ്പോർട്ട് ചെയ്തിരുന്നു.

മനുഷ്യരിൽ വൈറസ് ബാധ സ്ഥിരീകരിച്ച സാഹചര്യത്തിൽ രോഗബാധയുടെ ഉറവിടം, വൈറസ് പകരുന്ന രീതി, മരണത്തിൽ വൈറസിനുള്ള പങ്ക് എന്നിവ കണ്ടെത്തുന്നതിനാണ് അധികൃതരുടെ ശ്രമം. വൈറസിന്റെ വ്യാപനസാധ്യതയും പൊതുജനാരോഗ്യത്തെ ബാധിക്കാനുള്ള സാധ്യതയും സംബന്ധിച്ച വിലയിരുത്തലുകളും തുടരുകയാണ്.

ലഭ്യമായ വിവരങ്ങളുടെ അടിസ്ഥാനത്തിൽ പൊതുജനങ്ങൾക്ക് കാര്യമായ ആരോഗ്യഭീഷണിയുള്ളതായി ഇതുവരെ കണ്ടെത്തിയിട്ടില്ലെന്നാണ് റിപ്പോർട്ട്. എങ്കിലും മനുഷ്യരിലെ ആദ്യത്തെ സ്ഥിരീകരിച്ച കേസായതിനാൽ സംഭവത്തെ ആരോഗ്യവിദഗ്ധർ സൂക്ഷ്മമായി നിരീക്ഷിച്ചുവരികയാണ്.