‘ആസിയാൻ ഇന്ത്യയുടെ ആക്ട് ഈസ്റ്റ് നയത്തിന്റെ ആണിക്കല്ല്’: ഇന്തോ-പസഫിക് മേഖലയിൽ ശക്തമായ പ്രതിരോധ സഹകരണത്തിന് ആഹ്വാനം ചെയ്ത് പ്രതിരോധ മന്ത്രി രാജ്നാഥ് സിംഗ്
Current: മലയാളം
സെബു: ആസിയാന്‍ കൂട്ടായ്മയുടെ കേന്ദ്രസ്ഥാനം ഇന്ത്യയുടെ ‘ആക്ട് ഈസ്റ്റ്’ നയത്തിന്റെയും ഇന്തോ-പസഫിക് കാഴ്ചപ്പാടിന്റെയും ആണിക്കല്ലാണെന്ന് കേന്ദ്ര പ്രതിരോധ മന്ത്രി രാജ്നാഥ് സിംഗ് വ്യക്തമാക്കി.
മേഖലയിലെ പുതിയ സുരക്ഷാ വെല്ലുവിളികളെ നേരിടാനും പരസ്പര വിശ്വാസം വളര്‍ത്താനും ഇന്തോ-പസഫിക് പ്രദേശത്ത് പ്രതിരോധ സഹകരണം കൂടുതല്‍ ശക്തമാക്കണമെന്ന് അദ്ദേഹം ആഹ്വാനം ചെയ്തു.
ഫിലിപ്പീന്‍സിലെ സെബുവില്‍ നടന്ന 13-ാമത് ആസിയാന്‍ പ്രതിരോധ മന്ത്രിമാരുടെ യോഗത്തില്‍ സംസാരിക്കുകയായിരുന്നു അദ്ദേഹം.
സുസ്ഥിരവും സുരക്ഷിതവും സമൃദ്ധവുമായ ഒരു മേഖല നിലനിര്‍ത്തുന്നതില്‍ ഇത്തരം കൂട്ടായ്മകള്‍ നിര്‍ണ്ണായകമാണെന്ന് രാജ്നാഥ് സിംഗ് ചൂണ്ടിക്കാട്ടി.
അന്താരാഷ്ട്ര നിയമങ്ങളും ഐക്യരാഷ്ട്രസഭയുടെ സമുദ്രനിയമ കരാറും പാലിച്ചുകൊണ്ടുള്ള സഹകരണമാണ് ഉണ്ടാകേണ്ടതെന്ന് യോഗത്തിന് അധ്യക്ഷത വഹിച്ച ഫിലിപ്പീന്‍സ് പ്രതിരോധ സെക്രട്ടറി ഗില്‍ബെര്‍ട്ടോ സി. തിയോഡോറോ ജൂനിയര്‍ പറഞ്ഞു.
സംഘര്‍ഷ മേഖലകളില്‍ അകപ്പെടുന്ന കുടിയേറ്റ തൊഴിലാളികളുടെയും നാവികരുടെയും സുരക്ഷ ഉറപ്പാക്കാന്‍ അന്താരാഷ്ട്ര സമൂഹം ഒന്നിച്ച് പ്രവര്‍ത്തിക്കണമെന്നും അദ്ദേഹം അഭ്യര്‍ത്ഥിച്ചു.
2026-ല്‍ ഫിലിപ്പീന്‍സാണ് യോഗത്തിന് നേതൃത്വം നല്‍കുന്നത്. 20242027 കാലയളവിലേക്കുള്ള ഭീകരവിരുദ്ധ വിദഗ്ദ്ധ സമിതിയുടെ സഹ-അധ്യക്ഷ സ്ഥാനം ഇന്ത്യയും മലേഷ്യയും ചേര്‍ന്നാണ് വഹിക്കുന്നത്.
