ലഖ്നൗ: ലോക്സഭാ പ്രതിപക്ഷ നേതാവ് രാഹുൽ ഗാന്ധി അയോധ്യയിലെ രാമക്ഷേത്രം സന്ദർശിച്ചേക്കുമെന്ന വാർത്തകൾക്കിടയിൽ പ്രതിഷേധവുമായി ഒരു വിഭാഗം സന്യാസിമാർ രംഗത്ത്. ക്ഷേത്ര പ്രതിഷ്ഠാ ചടങ്ങിനെ കോൺഗ്രസ് രാഷ്ട്രീയ നാടകമെന്ന് വിശേഷിപ്പിച്ച സാഹചര്യത്തിൽ അദ്ദേഹത്തെ ക്ഷേത്രത്തിൽ പ്രവേശിക്കാൻ അനുവദിക്കരുതെന്നാണ് ഇവരുടെ ആവശ്യം.
രാഹുൽ ഗാന്ധിയെ ക്ഷേത്രത്തിൽ പ്രവേശിപ്പിക്കരുതെന്ന് ജ്യോതിർമഠ് ശങ്കരാചാര്യ സ്വാമി അവിമുക്തേശ്വരാനന്ദ ശ്രീരാമ ജന്മഭൂമി തീർത്ഥ ക്ഷേത്ര ട്രസ്റ്റിനോട് അഭ്യർത്ഥിച്ചു. രാഹുൽ ഹിന്ദുവാണെന്ന് കരുതുന്നില്ലെന്നും ഹൈന്ദവ മൂല്യങ്ങളെ അധിക്ഷേപിക്കുന്നവർക്ക് ക്ഷേത്രത്തിൽ പ്രവേശിക്കാൻ യോഗ്യതയില്ലെന്നും അദ്ദേഹം ആരോപിച്ചു. മുൻപ് മനുസ്മൃതിക്കെതിരെ സംസാരിച്ചതിന്റെ പേരിൽ രാഹുലിനെ ഹൈന്ദവതയിൽ നിന്ന് പുറത്താക്കുന്നതായി സ്വാമി അവിമുക്തേശ്വരാനന്ദ പ്രഖ്യാപിച്ചിരുന്നു. അയോധ്യയിലെ മറ്റു ചില സന്യാസിമാരും ഈ നിലപാടിനെ പിന്തുണച്ചിട്ടുണ്ട്.
Also Read: ജനാധിപത്യ പ്രക്രിയകളിൽ ഇന്ത്യ ലോകത്തിന് മാതൃകയെന്ന് പ്രധാനമന്ത്രി
ബിജെപിയുടെ വിമർശനം
രാഹുൽ ഗാന്ധിയുടെ സന്ദർശന നീക്കം വരാനിരിക്കുന്ന നിയമസഭാ തിരഞ്ഞെടുപ്പ് ലക്ഷ്യം വെച്ചുള്ള വെറും രാഷ്ട്രീയ തന്ത്രമാണെന്ന് ഉത്തർപ്രദേശിലെ ബിജെപി നേതാക്കൾ ആരോപിച്ചു. രാഷ്ട്രീയ ലാഭത്തിനും ഫോട്ടോകൾക്കും വേണ്ടിയുള്ള നാടകമാണ് ഇതെന്നാണ് ബിജെപിയുടെ പക്ഷം.
അതേസമയം, രാഹുലിന്റെ സന്ദർശനം സംബന്ധിച്ച് കോൺഗ്രസ് ഔദ്യോഗികമായി സ്ഥിരീകരണം നൽകിയിട്ടില്ല. എന്നാൽ അദ്ദേഹം സമീപഭാവിയിൽ തന്നെ രാമക്ഷേത്രത്തിൽ ദർശനം നടത്താൻ സാധ്യതയുണ്ടെന്ന് കോൺഗ്രസ് എംപി തനുജ് പൂനിയ സൂചിപ്പിച്ചു.
The post രാമക്ഷേത്ര സന്ദർശനം രാഷ്ട്രീയ തന്ത്രം; രാഹുൽ ഗാന്ധിക്കെതിരെ ബിജെപിയും ഒരു വിഭാഗം സന്യാസിമാരും appeared first on Express Kerala.
