വീട്ടിലെ ലൈബ്രറി പുസ്തക ചർച്ച നടത്തി

ഇരിങ്ങാലക്കുട : കാറളത്തെ വീട്ടിലെ ലൈബ്രറി പ്രതിമാസ പുസ്‌തക ചർച്ചയ്ക്ക് തുടക്കം കുറിച്ചു.

വായനയും എഴുത്തും സാഹിത്യപുരസ്‌കാരവും കലാപരിപാടികളും മാത്രം പോര, ഓരോ എഴുത്തുകാരുടെയും പുസ്തകങ്ങൾ സമൂഹത്തിൽ ചർച്ച ചെയ്യപ്പെടേണ്ടത് ഈ വർത്തമാന കാലഘട്ടത്തിൽ ആവശ്യമാണെന്ന ആശയത്തെ മുൻനിർത്തിയാണ് പുസ്തക ചർച്ച സംഘടിപ്പിച്ചത്.

വീട്ടിലെ ലൈബ്രറി പ്രഥമ സാഹിത്യ പുരസ്‌കാരം ലഭിച്ച മംഗള കരാട്ടുപറമ്പിലിൻ്റെ “ദാരസമന്വയത്തിൻ്റെ പ്രവാചകൻ” എന്ന നോവലാണ് ചർച്ച ചെയ്തത്.

പുസ്തക ചർച്ച ഡോ. സിസ്റ്റർ റോസ് ആൻ്റോ ഉദ്ഘാടനം ചെയ്തു.

റഷീദ് കാറളം അധ്യക്ഷത വഹിച്ചു.

കൃഷ്ണകുമാർ മാപ്രാണം പുസ്തകം അവതരിപ്പിച്ചു.

കെ.എൻ. രാമൻ മാഷ്, രാധാകൃഷ്ണൻ വെട്ടത്ത്, എം.എ. ഉല്ലാസ്, സുജാത സോമൻ, ആൻ്റണി കൈതാരത്ത്, മോളി പിയൂസ്, ഷൈജൻ കോമ്പരുപറമ്പിൽ എന്നിവർ ചർച്ചയിൽ പങ്കെടുത്തു.

മംഗള കരാട്ടുപറമ്പിൽ മറുമൊഴി നൽകി.

എം.എ. ഉല്ലാസ് സ്വാഗതവും രാധാകൃഷ്ണൻ കിഴുത്താണി നന്ദിയും പറഞ്ഞു.