അണ്ടർ 19 ലോകകപ്പിൽ ആറാം കിരീടം ലക്ഷ്യമിടുന്ന ഇന്ത്യ ഇന്ന് നിർണായകമായ സെമിഫൈനൽ പോരാട്ടത്തിനിറങ്ങുന്നു. ബുലവായോയിൽ നടക്കുന്ന മത്സരത്തിൽ അഫ്ഗാനിസ്ഥാനാണ് ഇന്ത്യയുടെ എതിരാളികൾ. ഹരാരെയിൽ ഇന്ത്യൻ സമയം ഉച്ചയ്ക്ക് ഒരു മണിക്ക് കളി ആരംഭിക്കും. ടൂർണമെന്റിലുടനീളം തോൽവി അറിയാതെ മുന്നേറുന്ന ഇന്ത്യൻ ടീം വലിയ ആത്മവിശ്വാസത്തിലാണ്. എന്നാൽ ശ്രീലങ്കയോട് മാത്രമാണ് പരാജയപ്പെട്ടതെന്ന കരുത്തുമായി കന്നി ഫൈനൽ പ്രവേശനം സ്വപ്നം കണ്ടാണ് അഫ്ഗാനിസ്ഥാൻ ഇറങ്ങുന്നത്.
മലയാളി ക്രിക്കറ്റ് പ്രേമികളെ സംബന്ധിച്ചിടത്തോളം ഏറെ ആവേശകരമായ മത്സരമാണിത്. ഓപ്പണർ ആരോൺ ജോർജും സ്പിന്നർ മുഹമ്മദ് ഇനാനും ഇന്ത്യൻ നിരയിലുള്ളത് ടീമിന് കേരളത്തിന്റെ കരുത്ത് നൽകുന്നു. ക്യാപ്റ്റൻ ആയുഷ് മാത്രേ നയിക്കുന്ന ബാറ്റിംഗ് നിരയിൽ വൈഭവ് സൂര്യവംശി, വിഹാൻ മൽഹോത്ര, അഭിഗ്യാൻ കുണ്ടു തുടങ്ങിയ വമ്പൻ താരങ്ങളുണ്ട്. ഇതുവരെയുള്ള മത്സരങ്ങളിൽ ബാറ്റിംഗിനൊപ്പം തന്നെ ഇന്ത്യയെ സുരക്ഷിതമാക്കിയത് അംബരീഷ്, ഹെനിൽ പട്ടേൽ തുടങ്ങിയവരുടെ ബൗളിംഗ് പ്രകടനങ്ങളായിരുന്നു. ആയുഷ് മാത്രേയുടെയും വിഹാൻ മൽഹോത്രയുടെയും ഓൾറൗണ്ട് മികവ് ഇന്ത്യക്ക് കൂടുതൽ ആഴം നൽകുന്നുണ്ട്.
Also Read: സൺറൈസേഴ്സ് ആരാധകർക്ക് ആശങ്ക; ഐപിഎൽ 2026-ൽ പാറ്റ് കമ്മിൻസ് കളിക്കുമോ? താരം മനസ്സ് തുറക്കുന്നു
അഫ്ഗാൻ നിരയിൽ ഫൈസൽ ഷിനോസാദയും മഹ്ബൂബ് ഖാനും ഉൾപ്പെടെയുള്ള താരങ്ങൾ മികച്ച ഫോമിലാണെന്നത് ഇന്ത്യ ജാഗ്രതയോടെ കാണുന്നു. ചരിത്രപരമായി അണ്ടർ 19 ക്രിക്കറ്റിൽ ഇന്ത്യയ്ക്കാണ് മേധാവിത്വം. ഇതുവരെ നേർക്കുനേർ വന്ന പന്ത്രണ്ട് മത്സരങ്ങളിൽ പത്തിലും ഇന്ത്യയ്ക്കായിരുന്നു വിജയം. സെമിഫൈനൽ പോലെ വലിയൊരു വേദിയായതിനാൽ പരീക്ഷണങ്ങൾക്ക് മുതിരാതെ ഏറ്റവും ശക്തമായ ഇലവനെ തന്നെ ഇന്ത്യ മൈതാനത്തിറക്കാനാണ് സാധ്യത. മികച്ച ഫോമിലുള്ള വൈഭവ് സൂര്യവംശി ഇന്ന് യഥാർത്ഥ താളത്തിലേക്ക് ഉയർന്നാൽ ഇന്ത്യയ്ക്ക് കാര്യങ്ങൾ എളുപ്പമായേക്കും.
The post കന്നി ഫൈനൽ തേടി അഫ്ഗാൻ; ആറാം കിരീടത്തിലേക്ക് കണ്ണുവെച്ച് ഇന്ത്യ ഇന്ന് സെമിയിൽ appeared first on Express Kerala.
