മധ്യപ്രദേശിൽ 5, 8 ക്ലാസുകളിലെ പരീക്ഷകൾ 2025-2026 അക്കാദമിക് വർഷം മുതൽ ബോർഡ് പരീക്ഷാ പാറ്റേണിലേക്ക് മാറുന്നു. ഫെബ്രുവരി 20 മുതൽ 28 വരെ നടക്കുന്ന ഈ പരീക്ഷകൾക്കായി സംസ്ഥാനത്തുടനീളം 12,920 കേന്ദ്രങ്ങളാണ് സജ്ജീകരിച്ചിരിക്കുന്നത്. സർക്കാർ സ്കൂളുകൾ, സ്വകാര്യ സ്കൂളുകൾ, മദ്രസകൾ എന്നിവിടങ്ങളിൽ നിന്നായി ഏകദേശം 25 ലക്ഷം വിദ്യാർത്ഥികൾ ഇത്തവണ പരീക്ഷയെഴുതും. എൻസിഇആർടി സിലബസ് പിന്തുടരുന്ന ചില സ്വകാര്യ സ്കൂളുകൾക്കായി പ്രത്യേക ഭാഷാ ചോദ്യപേപ്പറുകൾ തയ്യാറാക്കിയിട്ടുണ്ടെന്ന് രാജ്യ ശിക്ഷാ കേന്ദ്ര അറിയിച്ചു.
പരീക്ഷാ നടപടികൾ സുതാര്യമാക്കാൻ പ്രത്യേക ഐടി പോർട്ടൽ സ്കൂൾ വിദ്യാഭ്യാസ വകുപ്പ് സജ്ജമാക്കിയിട്ടുണ്ട്. വിദ്യാർത്ഥികളുടെ രജിസ്ട്രേഷൻ, അഡ്മിറ്റ് കാർഡ് വിതരണം, മൂല്യനിർണ്ണയം, മാർക്ക് ഷീറ്റ് തയ്യാറാക്കൽ തുടങ്ങിയ എല്ലാ കാര്യങ്ങളും ഈ പോർട്ടൽ വഴിയായിരിക്കും ഏകോപിപ്പിക്കുക. നിലവിൽ രജിസ്റ്റർ ചെയ്യാത്ത യോഗ്യരായ വിദ്യാർത്ഥികൾക്കും പരീക്ഷ എഴുതാൻ അവസരമുണ്ടാകുമെന്നും പരീക്ഷയ്ക്ക് ശേഷം ഇവരുടെ വിവരങ്ങൾ ഓൺലൈനായി അപ്ഡേറ്റ് ചെയ്യുമെന്നും അധികൃതർ വ്യക്തമാക്കി.
Also Read: പഠിക്കാനുള്ള അവകാശം പ്രധാനം! ക്യാമ്പസിനുള്ളിലെ സമരം, ധർണ്ണ, വഴിതടയൽ എന്നിവയ്ക്ക് നിയന്ത്രണം വരുന്നു
അതേസമയം, സംസ്ഥാനത്തെ 10, 12 ക്ലാസുകളിലെ ബോർഡ് പരീക്ഷകളും ഫെബ്രുവരിയിൽ തന്നെ നടക്കും. പന്ത്രണ്ടാം ക്ലാസ് പരീക്ഷകൾ ഫെബ്രുവരി 7 മുതൽ മാർച്ച് 3 വരെയും പത്താം ക്ലാസ് പരീക്ഷകൾ ഫെബ്രുവരി 11 മുതൽ മാർച്ച് 2 വരെയുമാണ് നിശ്ചയിച്ചിരിക്കുന്നത്. രാവിലെ 9 മണിക്ക് ആരംഭിക്കുന്ന പരീക്ഷകൾക്ക് ഒരു മണിക്കൂർ മുമ്പ് തന്നെ വിദ്യാർത്ഥികൾ പരീക്ഷാ കേന്ദ്രങ്ങളിൽ റിപ്പോർട്ട് ചെയ്യണം. പരീക്ഷാ ഹാളിന്റെ ഗേറ്റ് 15 മിനിറ്റ് മുമ്പ് അടയ്ക്കുമെന്നും കൃത്യസമയത്ത് എത്തുന്നവർക്ക് മാത്രമേ പ്രവേശനം അനുവദിക്കൂ എന്നും നിർദ്ദേശമുണ്ട്.
The post മധ്യപ്രദേശിൽ 5, 8 ക്ലാസുകൾ ഇനി ബോർഡ് പരീക്ഷാ പാറ്റേണിൽ; പരീക്ഷ ഫെബ്രുവരി 20 മുതൽ! appeared first on Express Kerala.
