കുവൈത്ത് ഇന്റർനാഷണൽ ഷോ ജംപിങ് ചാമ്പ്യൻഷിപ്പിൽ സ്വർണ്ണനേട്ടവുമായി മലയാളി താരം സോജോ ബേബി. കുവൈത്തിൽ നടന്ന സി.എസ്.ഐ വൺ സ്റ്റാർ-ത്രി സ്റ്റാർ വിഭാഗത്തിലെ 110 ക്ലാസ് മത്സരത്തിലാണ് ഇന്ത്യയെ പ്രതിനിധീകരിച്ച് അദ്ദേഹം ചരിത്രവിജയം സ്വന്തമാക്കിയത്. എറണാകുളം ജില്ലയിലെ കൂത്താട്ടുകുളം വടക്കൻ പാലക്കുഴി സ്വദേശിയായ സോജോ, അന്താരാഷ്ട്ര തലത്തിൽ ശ്രദ്ധേയനായ കുതിരപ്പന്തയ താരമാണ്. കുവൈത്ത്, സൗദി അറേബ്യ, ബ്രിട്ടൻ തുടങ്ങി ഒൻപത് രാജ്യങ്ങളിൽ നിന്നുള്ള 250-ഓളം പ്രമുഖ റൈഡർമാരോട് മത്സരിച്ചാണ് ഈ നേട്ടം കൈവരിച്ചത് എന്നത് ശ്രദ്ധേയമാണ്.
കഴിഞ്ഞ 14 വർഷമായി കുവൈത്തിൽ താമസിക്കുന്ന സോജോ ബേബി, ഈ രംഗത്ത് പരിശീലകൻ എന്ന നിലയിലും പ്രശസ്തനാണ്. വിവിധ രാജ്യങ്ങളിൽ നിന്നുള്ള രണ്ടായിരത്തിലധികം പേർക്ക് അദ്ദേഹം ഹോഴ്സ് റൈഡിങ്ങിൽ പരിശീലനം നൽകിയിട്ടുണ്ട്. തന്റെ കരിയറിലെ ഈ വലിയ വിജയത്തിന് പിന്നിൽ ഭാര്യ സ്മിത സ്റ്റീഫന്റെയും മക്കളുടെയും നിറഞ്ഞ പിന്തുണയുണ്ടെന്ന് അദ്ദേഹം പറഞ്ഞു. പ്രവാസി മലയാളികൾക്ക് അഭിമാനകരമായ ഈ നേട്ടം ഇന്ത്യൻ കായികരംഗത്തിനും വലിയൊരു മുതൽക്കൂട്ടാണ്.
The post കുതിച്ചുയർന്ന് മലയാളി തിളക്കം; കുവൈത്ത് ഇന്റർനാഷണൽ ഷോ ജംപിങ്ങിൽ സോജോ ബേബിക്ക് സ്വർണം appeared first on Express Kerala.
