‘ഗോളം’ എന്ന ഹിറ്റ് ചിത്രത്തിന് ശേഷം സംവിധായകൻ സംജാദും നിർമ്മാതാക്കളായ ആൻ സജീവും സജീവ് പി.കെയും വീണ്ടും ഒന്നിക്കുന്ന വമ്പൻ പ്രോജക്റ്റാണ് ‘ഹാഫ്’. വാംപയർ മിത്തോളജിയുടെ പശ്ചാത്തലത്തിൽ പ്രതികാരം, അതിജീവനം, വ്യക്തിത്വം എന്നീ പ്രമേയങ്ങൾ കോർത്തിണക്കിയാണ് ഈ ത്രില്ലർ ഒരുങ്ങുന്നത്. ചിത്രത്തിന്റെ ദുരൂഹതയും സംഘർഷങ്ങളും സൂചിപ്പിക്കുന്ന പുതിയ പോസ്റ്റർ അണിയറ പ്രവർത്തകർ പുറത്തുവിട്ടു. വൻ ക്യാൻവാസിൽ ഒരുങ്ങുന്ന ഈ ചിത്രം വിവിധ ലൊക്കേഷനുകളിലായാണ് ചിത്രീകരിച്ചിരിക്കുന്നത്.
അമല പോൾ, രഞ്ജിത് സജീവ്, ഐശ്വര്യ രാജ് എന്നിവർക്കൊപ്പം തെന്നിന്ത്യൻ താരം അബ്ബാസിന്റെ ഗംഭീര തിരിച്ചുവരവിനും ഈ ചിത്രം സാക്ഷ്യം വഹിക്കുന്നു. ഏറെക്കാലത്തിന് ശേഷം അബ്ബാസ് മലയാളത്തിലേക്ക് മടങ്ങിയെത്തുന്നത് പ്രേക്ഷകർക്കിടയിൽ വലിയ ആകാംക്ഷയാണ് ജനിപ്പിക്കുന്നത്. ഹോളിവുഡ് ആക്ഷൻ കൊറിയോഗ്രാഫർ വെരി ട്രൈ യുലിസ്മാൻ ഒരുക്കുന്ന സ്റ്റണ്ട് രംഗങ്ങൾ സിനിമയ്ക്ക് ആഗോള നിലവാരം നൽകുമെന്നാണ് പ്രതീക്ഷിക്കുന്നത്. രഞ്ജിത് സജീവും ഐശ്വര്യ രാജും വാംപയർ കഥാപാത്രങ്ങളായി എത്തുമ്പോൾ അമല പോൾ നിർണ്ണായകമായ മറ്റൊരു വേഷത്തിലാണ് എത്തുന്നത്.
Also Read: ആക്ഷൻ മാമാങ്കങ്ങൾക്ക് ശേഷം ടിനു പാപ്പച്ചന്റെ ‘കൊല്ലം കോട്ട കമ്പനി’; ഫസ്റ്റ് ലുക്ക് പുറത്തിറങ്ങി
ദേശീയ പുരസ്കാര ജേതാക്കൾ ഉൾപ്പെടുന്ന വലിയൊരു സാങ്കേതിക നിര തന്നെയാണ് ചിത്രത്തിന് പിന്നിലുള്ളത്. ‘ആട്ടം’ ഫെയിം മഹേഷ് ഭുവനേന്ദ് എഡിറ്റിംഗും പപ്പിനു ഛായാഗ്രഹണവും നിർവ്വഹിക്കുന്നു. മിഥുൻ മുകുന്ദനാണ് സംഗീതം. മോഹൻദാസ് പ്രൊഡക്ഷൻ ഡിസൈൻ കൈകാര്യം ചെയ്യുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് സംജാദും പ്രവീൺ വിശ്വനാഥും ചേർന്നാണ്. പാൻ-ഇന്ത്യൻ തലത്തിൽ ഒരുങ്ങുന്ന ‘ഹാഫ്’ മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും പുറത്തിറങ്ങും.
The post ‘ഹാഫ്’ ചിത്രത്തിൻ്റെ പുത്തൻ പോസ്റ്റർ പുറത്ത് appeared first on Express Kerala.
