ജമാഅത്തെ ഇസ്ലാമിയെച്ചൊല്ലി കേരള രാഷ്ട്രീയത്തിൽ വി.ഡി. സതീശനും എം.വി. ഗോവിന്ദനും തമ്മിലുള്ള വാക്പോര് മുറുകുന്നതിനിടെ, പ്രതിപക്ഷ നേതാവിനെതിരെ കടുത്ത വിമർശനവുമായി അഖിൽ മാരാർ രംഗത്ത്. എൻ.എസ്.എസ്, എസ്.എൻ.ഡി.പി തുടങ്ങിയ സംഘടനകളോട് കർശന നിലപാട് സ്വീകരിക്കുന്ന പ്രതിപക്ഷ നേതാവ്, മതരാഷ്ട്രവാദം മുന്നോട്ടുവെക്കുന്ന ജമാഅത്തെ ഇസ്ലാമിയെ എന്തിനാണ് പിന്തുണയ്ക്കുന്നതെന്ന് അഖിൽ മാരാർ ചോദിച്ചു. മതേതരത്വം എന്നത് ഒരു പ്രത്യേക വിഭാഗത്തിനെതിരെ മാത്രം എടുക്കുന്ന നിലപാടായി മാറുന്നത് അപകടകരമാണെന്നും, ശത്രുവിനെ കൊല്ലാൻ പാമ്പിനെ സഞ്ചിയിലിട്ടു കൊണ്ടുപോകുന്ന അവസ്ഥ സതീശന് വരാതിരിക്കട്ടെ എന്നും അദ്ദേഹം ഫേസ്ബുക്കിൽ കുറിച്ചു.
അതേസമയം, ജമാഅത്തെ ഇസ്ലാമി വിഷയത്തിൽ സിപിഎം സംസ്ഥാന സെക്രട്ടറി എം.വി. ഗോവിന്ദന്റെ നിലപാടിനെ അഖിൽ മാരാർ പിന്തുണച്ചു. ജമാഅത്തെ ഇസ്ലാമിക്ക് സതീശൻ ‘ഗുഡ് സർട്ടിഫിക്കറ്റ്’ നൽകുകയാണെന്ന ഗോവിന്ദന്റെ ആരോപണത്തിന്, 42 വർഷം ഇതേ സംഘടനയുമായി ബന്ധം പുലർത്തിയ സിപിഎമ്മിന് ഇപ്പോൾ മറവിരോഗമാണെന്നായിരുന്നു സതീശന്റെ മറുപടി. നിയമസഭാ തിരഞ്ഞെടുപ്പ് അടുത്തിരിക്കെ ഇരുമുന്നണികളും ഈ വിഷയത്തിൽ പരസ്പരം പോരടിക്കുകയാണ്.
Also Read: ഭരണമാറ്റം എല്ലാവരും ആഗ്രഹിക്കുന്നുണ്ട്; വി ഡി സതീശൻ
ഇതിനിടെ, യുഡിഎഫിനെ പ്രതിരോധത്തിലാക്കി സമസ്തയും രംഗത്തെത്തി. കാസർകോട് നടക്കുന്ന സമസ്തയുടെ നൂറാം വാർഷിക സമ്മേളനത്തിൽ ജമാഅത്തെ ഇസ്ലാമിക്കെതിരെ രൂക്ഷമായ പ്രമേയം അവതരിപ്പിച്ചു. രാഷ്ട്രീയ ഇസ്ലാം അപകടകരമാണെന്നും മൗദൂദി ചിന്തകൾ യുവാക്കളെ വഴിതെറ്റിക്കുന്നുവെന്നും സമസ്ത മുന്നറിയിപ്പ് നൽകി.
The post ശത്രുവിനെ കൊല്ലാൻ പാമ്പിനെ സഞ്ചിയിൽ ഇട്ട് പോയാലുള്ള അവസ്ഥ വരാതിരിക്കട്ടെ; വി ഡി സതീശനെതിരെ അഖിൽ മാരാർ appeared first on Express Kerala.
