2026 മാർച്ച് 31-ഓടെ ഇന്ത്യയെ പൂർണ്ണമായും നക്സൽ മുക്തമാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ പ്രഖ്യാപിച്ചു. ഒഡീഷയിലെ കട്ടക്കിൽ നടന്ന സി.ഐ.എസ്.എഫ് അൻപത്തിയേഴാം റെയ്സിംഗ് ദിനത്തിൽ സംസാരിക്കുകയായിരുന്നു അദ്ദേഹം. റെഡ് കോറിഡോറിൽ സുരക്ഷാ സേന ഇതിനോടകം ആധിപത്യം സ്ഥാപിച്ചു കഴിഞ്ഞുവെന്നും, തിരുപ്പതി മുതൽ പശുപതിനാഥ് വരെയുള്ള മേഖലകളെ നിയന്ത്രിച്ചിരുന്ന ശക്തികളെ പൂർണ്ണമായും പരാജയപ്പെടുത്തുമെന്നും അദ്ദേഹം ഉറപ്പിച്ചു പറഞ്ഞു. രാജ്യത്തിന്റെ ആഭ്യന്തര സുരക്ഷാ ചരിത്രത്തിലെ നിർണ്ണായകമായ ഒരു ലക്ഷ്യമായാണ് കേന്ദ്ര സർക്കാർ ഇതിനെ കാണുന്നത്.
രാജ്യത്തിന്റെ വ്യാവസായിക വികസനത്തിൽ സി.ഐ.എസ്.എഫ് വഹിക്കുന്ന പങ്ക് നിസ്തുലമാണെന്ന് മന്ത്രി ചൂണ്ടിക്കാട്ടി. വിമാനത്താവളങ്ങൾ, തുറമുഖങ്ങൾ, മറ്റ് തന്ത്രപ്രധാനമായ സ്ഥാപനങ്ങൾ എന്നിവയുടെ സുരക്ഷയിൽ സി.ഐ.എസ്.എഫ് ഒരു കവചമായി പ്രവർത്തിക്കുന്നു. ഈ വിശ്വാസത്തിന്റെ അടിസ്ഥാനത്തിൽ രാജ്യത്തെ എല്ലാ തുറമുഖങ്ങളുടെയും സുരക്ഷാ ചുമതല സി.ഐ.എസ്.എഫിനെ ഏൽപ്പിക്കാൻ ആഭ്യന്തര മന്ത്രാലയം തീരുമാനിച്ചതായും അദ്ദേഹം അറിയിച്ചു. വ്യാവസായിക യൂണിറ്റുകളുടെ സംരക്ഷണം ഉറപ്പാക്കാതെ വികസിത ഇന്ത്യ എന്ന ദർശനം പൂർത്തിയാക്കാൻ കഴിയില്ലെന്നും അമിത് ഷാ കൂട്ടിച്ചേർത്തു.
Also Read: ഇന്ധനക്ഷാമം ഉണ്ടാകില്ല! കേന്ദ്രത്തിന്റെ ഉറപ്പ്; ഖത്തറിന് പകരം പുതിയ വഴികൾ തേടി ഇന്ത്യ
കഴിഞ്ഞ 56 വർഷത്തിനിടയിൽ എല്ലാത്തരം വെല്ലുവിളികളെയും അതിജീവിച്ച് നവീകരിക്കപ്പെടാൻ സി.ഐ.എസ്.എഫിന് സാധിച്ചിട്ടുണ്ടെന്ന് അദ്ദേഹം പറഞ്ഞു. ഒഡീഷ, ഛത്തീസ്ഗഢ്, തെലങ്കാന തുടങ്ങിയ സംസ്ഥാനങ്ങളിൽ നക്സലിസം തുടച്ചുനീക്കുന്നതിൽ ഈ സേന വലിയ സംഭാവനകളാണ് നൽകിയത്. ധീരതയുടെയും ത്യാഗത്തിന്റെയും പാരമ്പര്യം ഉയർത്തിപ്പിടിക്കുന്ന സി.ഐ.എസ്.എഫ്, 2026 മാർച്ചിനുള്ളിൽ നക്സൽ മുക്ത ഭാരതം എന്ന മോദി സർക്കാരിന്റെ ദൃഢനിശ്ചയം പൂർത്തിയാക്കുന്നതിലും പ്രധാന പങ്ക് വഹിക്കുമെന്ന് അദ്ദേഹം പ്രത്യാശ പ്രകടിപ്പിച്ചു.
The post “2026 മാർച്ച് 31-ഓടെ ഇന്ത്യ നക്സൽ മുക്തം!” കേന്ദ്രത്തിന്റെ ദൃഢനിശ്ചയം പ്രഖ്യാപിച്ച് അമിത് ഷാ appeared first on Express Kerala.
