മിഥുൻ മാനുവൽ തോമസ് രചനയും സംവിധാനവും നിർവഹിക്കുന്ന ബിഗ് ബജറ്റ് എപ്പിക് ഫാൻ്റസി ചിത്രം “ആട് 3 പാർട്ട് 1: വൺ ലാസ്റ്റ് റൈഡ്” എന്ന സിനിമയിലെ ആദ്യ വീഡിയോ ഗാനം പുറത്തിറങ്ങി. തെന്നിന്ത്യൻ താരം വേദികയുടെ മനംകവരുന്ന നൃത്തചുവടുകളുമായി എത്തിയ “സുൽത്താൻ” എന്ന ഗാനമാണ് അണിയറപ്രവർത്തകർ പുറത്തുവിട്ടത്. ചിത്രത്തിലെ പ്രധാന കഥാപാത്രങ്ങളിലൊന്ന് അവതരിപ്പിക്കുന്ന വിനായകൻ ഒരു സുൽത്താന്റെ ഗെറ്റപ്പിൽ വേദികയ്ക്കൊപ്പം ഗാനരംഗത്തിൽ പ്രത്യക്ഷപ്പെടുന്നു എന്നത് ഈ പാട്ടിന്റെ പ്രത്യേകതയാണ്. ഷാൻ റഹ്മാനാണ് ഈ ആവേശകരമായ ഗാനത്തിന് ഈണം നൽകിയിരിക്കുന്നത്.
2026 മാർച്ച് 19-ന് ഈദ് റിലീസായി ആഗോളതലത്തിൽ പ്രദർശനത്തിനെത്തുന്ന ചിത്രത്തിന്റെ അഡ്വാൻസ് ടിക്കറ്റ് ബുക്കിംഗ് ഇന്ന് മുതൽ സജീവമായി ആരംഭിച്ചിട്ടുണ്ട്. ബുക്കിംഗ് തുടങ്ങി ആദ്യ മണിക്കൂറിൽ തന്നെ അയ്യായിരത്തിലധികം ടിക്കറ്റുകൾ വിറ്റഴിക്കപ്പെട്ടതോടെ ബുക്ക് മൈ ഷോ ട്രെൻഡിങ് ലിസ്റ്റിലും ചിത്രം ഇടംപിടിച്ചു കഴിഞ്ഞു. ഇന്ത്യക്ക് പുറത്തും വൻതോതിലുള്ള ബുക്കിംഗാണ് ചിത്രത്തിന് ലഭിക്കുന്നത്. സെൻസറിങ് പൂർത്തിയാക്കി ക്ലീൻ “U” സർട്ടിഫിക്കറ്റ് സ്വന്തമാക്കിയ ചിത്രത്തിന് 2 മണിക്കൂർ 47 മിനിറ്റാണ് ദൈർഘ്യം.
Also Read:“ഞാൻ സംവിധായകനായത് ധനുഷ് സാർ കാരണം”; ഹൃദയം തൊടുന്ന വെളിപ്പെടുത്തലുമായി കെൻ കരുണാസ്
വിജയ് ബാബുവിന്റെ ഫ്രൈഡേ ഫിലിം ഹൗസും വേണു കുന്നപ്പിള്ളിയുടെ നേതൃത്വത്തിലുള്ള കാവ്യാ ഫിലിം കമ്പനിയും ചേർന്നാണ് ജയസൂര്യ നായകനാകുന്ന ഈ വമ്പൻ ചിത്രം നിർമ്മിക്കുന്നത്. ആദ്യ രണ്ട് ഭാഗങ്ങളിലുണ്ടായിരുന്ന ജയസൂര്യ, വിനായകൻ, ഇന്ദ്രൻസ്, സൈജു കുറുപ്പ്, ധർമജൻ തുടങ്ങി വലിയൊരു താരനിര തന്നെ മൂന്നാം ഭാഗത്തിലുമുണ്ട്. വെറും കോമഡി മാത്രമല്ല, വ്യത്യസ്ത കാലഘട്ടങ്ങളിലൂടെ കടന്നുപോകുന്ന ഫാന്റസി ഘടകങ്ങളും ഇത്തവണ ചിത്രത്തിലുണ്ടാകുമെന്നാണ് സൂചന. ‘വൺ ലാസ്റ്റ് റൈഡ്’ എന്ന ടാഗ്ലൈൻ നൽകിയിരിക്കുന്നതിലൂടെ ചിത്രത്തിന് ഒരു പാർട്ട് കൂടി ഉണ്ടാകുമെന്ന ഉറപ്പും അണിയറപ്രവർത്തകർ നൽകുന്നുണ്ട്.
The post ഷാജി പാപ്പന്റെ വരവറിയിച്ച് ‘സുൽത്താൻ’; ആട് 3 ബുക്കിംഗിൽ റെക്കോർഡ് കുതിപ്പ് appeared first on Express Kerala.
