നാല് ദിശകളിൽ നിന്നും ട്രെയിനുകൾ പാഞ്ഞെത്തുന്ന ഒരു റെയിൽവേ ട്രാക്കിന് നടുവിൽ നിങ്ങൾ നിൽക്കുന്നത് സങ്കൽപ്പിച്ചു നോക്കൂ. കേൾക്കുമ്പോൾ ഏതെങ്കിലും സിനിമയിലെ ഗ്രാഫിക്സ് രംഗം പോലെ തോന്നുമെങ്കിലും സംഗതി സത്യമാണ്. മഹാരാഷ്ട്രയിലെ നാഗ്പൂരിന്റെ ഹൃദയഭാഗത്താണ് ‘ഡയമണ്ട് ക്രോസിംഗ്’ എന്ന ഈ എഞ്ചിനീയറിംഗ് വിസ്മയം ഒളിഞ്ഞിരിക്കുന്നത്. സങ്കൽപ്പത്തിന് അപ്പുറം യാഥാർത്ഥ്യമായ ഈ അത്ഭുതം കാണാൻ ദിവസവും നിരവധി ആളുകളാണ് ഇവിടെയെത്തുന്നത്.
രണ്ട് റെയിൽവേ ട്രാക്കുകൾ ഒരേ നിരപ്പിൽ 90 ഡിഗ്രിയിൽ പരസ്പരം മുറിച്ചുകടക്കുമ്പോഴാണ് ഒരു ഡയമണ്ട് ക്രോസിംഗ് രൂപപ്പെടുന്നത്. വജ്രത്തിന്റെ ആകൃതിയിലുള്ള ഈ റെയിൽവേ ലേഔട്ട് ജ്യാമിതീയമായ കൃത്യതയോടെയാണ് രൂപകൽപ്പന ചെയ്തിരിക്കുന്നത്. ഇന്ത്യയിലെ ഏക ‘ഇരട്ട ഡയമണ്ട് ക്രോസിംഗ്’ എന്ന പ്രത്യേകത നാഗ്പൂരിനുണ്ട്. ഡൽഹി (വടക്ക്), ചെന്നൈ (തെക്ക്), ഹൗറ (കിഴക്ക്), മുംബൈ (പടിഞ്ഞാറ്) എന്നിവിടങ്ങളിൽ നിന്നുള്ള റെയിൽവേ ലൈനുകൾ പരസ്പരം സംഗമിക്കുന്ന ഇടമാണിത്. ബ്രിട്ടീഷുകാർ ഇന്ത്യയുടെ ഭൂമിശാസ്ത്ര കേന്ദ്രമായി നാഗ്പൂരിനെ കണക്കാക്കിയതും ഈ സവിശേഷത കൊണ്ടാണ്.
Also Read: ലക്ഷ്വറിയിൽ പുത്തൻ വിസ്മയം; 2027 ബിഎംഡബ്ല്യു 7 സീരീസ് ടീസർ പുറത്ത്!
നാല് വശങ്ങളിൽ നിന്നും ട്രെയിനുകൾ എത്തുമ്പോഴും അവ തമ്മിൽ കൂട്ടിയിടിക്കില്ല എന്നതാണ് ഈ സംവിധാനത്തിന്റെ ഏറ്റവും വലിയ പ്രത്യേകത. അതീവ കൃത്യതയാർന്ന സിഗ്നലിംഗ് സംവിധാനത്തിലൂടെ ഒരേസമയം ഒരു പാതയിലൂടെ മാത്രം ട്രെയിനുകൾ കടത്തിവിട്ടാണ് സുരക്ഷ ഉറപ്പാക്കുന്നത്. ഇതിനുപുറമെ ട്രെയിനുകളുടെ സമയം മുൻകൂട്ടി ക്രമീകരിക്കുന്ന ടൈംടേബിൾ മാനേജ്മെന്റും, അത്യാധുനിക ഇലക്ട്രോണിക് സ്വിച്ച് സംവിധാനങ്ങളും ഓരോ ട്രെയിനിനെയും കൃത്യമായ ട്രാക്കിലേക്ക് നയിക്കുന്നു. ഓട്ടോമേറ്റഡ് സംവിധാനങ്ങൾ ഉണ്ടെങ്കിലും റെയിൽവേ ജീവനക്കാരുടെ കർശനമായ മേൽനോട്ടം 24 മണിക്കൂറും ഇവിടെയുണ്ട്.
The post കൂട്ടിയിടിക്കില്ല ഈ ട്രെയിനുകൾ; നാഗ്പൂരിലെ ഈ ഇരട്ട ഡയമണ്ട് ക്രോസിംഗിന്റെ രഹസ്യം ഇതാ… appeared first on Express Kerala.
