മുഖ്യമന്ത്രി പിണറായി വിജയന്റെ തെരഞ്ഞെടുപ്പ് പ്രചാരണത്തിന് ആവേശം പകർന്ന് ഇന്ന് കണ്ണൂരിൽ റോഡ് ഷോ നടക്കുന്നു. മട്ടന്നൂർ വിമാനത്താവളം മുതൽ പിണറായി വരെ നീളുന്ന റോഡ് ഷോയോടെയാണ് ഇടതുപക്ഷ ജനാധിപത്യ മുന്നണിയുടെ ഔദ്യോഗിക പ്രചാരണ പരിപാടികൾക്ക് തുടക്കമാകുന്നത്. ഇന്ന് വൈകിട്ട് 3.30-ന് ആരംഭിക്കുന്ന പരിപാടിയിൽ ആയിരക്കണക്കിന് പ്രവർത്തകർ അണിനിരക്കുമെന്നാണ് കരുതുന്നത്.
ധർമ്മടം നിയമസഭാ മണ്ഡലത്തിൽ ഇടതുപക്ഷ സ്ഥാനാർത്ഥിയായി വീണ്ടും ജനവിധി തേടാനുള്ള വലിയ ഉത്തരവാദിത്തം പാർട്ടി തന്നെ ഏൽപ്പിച്ചതായി മുഖ്യമന്ത്രി വ്യക്തമാക്കി. താൻ ജനിച്ചുവളർന്ന നാടിനെ കഴിഞ്ഞ 10 വർഷം നിയമസഭയിൽ പ്രതിനിധീകരിച്ചതിന്റെ ആത്മവിശ്വാസവും അനുഭവ സമ്പത്തുമായാണ് മൂന്നാം തവണയും ജനങ്ങളെ സമീപിക്കുന്നതെന്ന് അദ്ദേഹം ഫേസ്ബുക്കിൽ കുറിച്ചു. എക്കാലത്തും ജനങ്ങൾ നൽകിയ സ്നേഹവും പിന്തുണയുമാണ് തന്റെ പ്രവർത്തനങ്ങൾക്ക് കരുത്തേകിയതെന്നും അദ്ദേഹം കൂട്ടിച്ചേർത്തു.
മതനിരപേക്ഷ ജനാധിപത്യ കേരളത്തിന്റെ നിലനിൽപ്പിനായും വികസനത്തിന്റെയും സാമൂഹ്യ പുരോഗതിയുടെയും തുടർച്ചയ്ക്കായും എല്ലാവരും ഒരേ മനസ്സോടെ മുന്നേറണമെന്ന് മുഖ്യമന്ത്രി ആഹ്വാനം ചെയ്തു. സ്ഥാനാർത്ഥി നിർണ്ണയം പൂർത്തിയായതോടെ സംസ്ഥാനത്തുടനീളം വലിയ ആത്മവിശ്വാസത്തിലാണ് ഇടതുമുന്നണി തെരഞ്ഞെടുപ്പിനെ നേരിടുന്നത്. ഔദ്യോഗിക പ്രഖ്യാപനം വന്ന മണ്ഡലങ്ങളിലെല്ലാം സ്ഥാനാർത്ഥികൾ ഇതിനോടകം തന്നെ സജീവമായ പ്രചാരണം ആരംഭിച്ചിട്ടുണ്ട്.
The post കണ്ണൂരിൽ മുഖ്യമന്ത്രിയുടെ റോഡ് ഷോ ഇന്ന്; വിമാനത്താവളം മുതൽ പിണറായി വരെ ആവേശം! appeared first on Express Kerala.
