അരനൂറ്റാണ്ടിലധികമായി തൊടുപുഴ മണ്ഡലത്തെ പ്രതിനിധീകരിക്കുന്ന കേരള കോൺഗ്രസ് ചെയർമാൻ പി. ജെ. ജോസഫ് ഇത്തവണ തിരഞ്ഞെടുപ്പ് ഗോദയിൽ നിന്ന് മാറിനിൽക്കുന്നു. അദ്ദേഹത്തിന് പകരം മകനും പാർട്ടിയുടെ സ്റ്റേറ്റ് കോർഡിനേറ്ററുമായ അപു ജോൺ ജോസഫ് ഇത്തവണ തൊടുപുഴയിൽ നിന്ന് ജനവിധി തേടും. 1970 മുതൽ പത്ത് തവണ മണ്ഡലത്തെ നിയമസഭയിൽ പ്രതിനിധീകരിച്ച പി. ജെ. ജോസഫിന്റെ ഈ തീരുമാനം കേരള രാഷ്ട്രീയത്തിൽ വലിയൊരു തലമുറമാറ്റത്തിനാണ് വഴിതെളിക്കുന്നത്.
പി. ജെ. ജോസഫ് മത്സരരംഗത്ത് നിന്ന് വിട്ടുനിൽക്കുകയാണെങ്കിൽ താൻ മത്സരത്തെക്കുറിച്ച് ഗൗരവമായി ആലോചിക്കുമെന്ന് അപു ജോൺ ജോസഫ് നേരത്തെ തന്നെ പാർട്ടി നേതൃത്വത്തെ അറിയിച്ചിരുന്നു. നിലവിൽ കേരള കോൺഗ്രസിന്റെ സംഘടനാ ചുമതലകളിൽ സജീവമായി പ്രവർത്തിക്കുന്ന അപുവിനെ മുൻനിർത്തി മണ്ഡലം നിലനിർത്താമെന്നാണ് പാർട്ടി കണക്കുകൂട്ടുന്നത്. പതിറ്റാണ്ടുകളായി പി. ജെ. ജോസഫിന് മണ്ഡലത്തിലുള്ള വ്യക്തിപരമായ സ്വാധീനം അപുവിനും ഗുണകരമാകുമെന്നാണ് പ്രവർത്തകരുടെ പ്രതീക്ഷ.
Also Read:കോൺഗ്രസിൻ്റെ സ്ഥാനാർത്ഥി പട്ടിക പുറത്ത്
തിരഞ്ഞെടുപ്പ് രാഷ്ട്രീയത്തിൽ നിന്ന് പി. ജെ. ജോസഫ് പൂർണ്ണമായും പിന്മാറുന്നത് സംബന്ധിച്ച ഔദ്യോഗിക ചർച്ചകൾക്ക് ശേഷമാണ് അപുവിന്റെ സ്ഥാനാർത്ഥിത്വത്തിലേക്ക് പാർട്ടി എത്തിയത്. രാഷ്ട്രീയ കേരളം ഉറ്റുനോക്കുന്ന തൊടുപുഴ മണ്ഡലത്തിൽ അപു ജോൺ ജോസഫിന്റെ വരവ് വലിയ ആവേശമാണ് കേരള കോൺഗ്രസ് അണികൾക്കിടയിൽ ഉണ്ടാക്കിയിരിക്കുന്നത്.
The post തൊടുപുഴയിൽ തലമുറമാറ്റം; പി. ജെ. ജോസഫ് മത്സരിക്കില്ല, പകരം മകൻ മത്സരിക്കും appeared first on Express Kerala.
