ഫിന്നിഷ് ആരോഗ്യ സാങ്കേതിക കമ്പനിയായ ഔറ, തങ്ങളുടെ പ്രശസ്തമായ സ്മാർട്ട് റിങ് 4 ഇന്ത്യൻ വിപണിയിൽ അവതരിപ്പിച്ചു. ഇന്ത്യയുടെ വർദ്ധിച്ചുവരുന്ന ഹെൽത്ത് വെയറബിൾസ് വിപണി ലക്ഷ്യമിട്ടാണ് ബ്രാൻഡിന്റെ ഈ പുതിയ നീക്കം. ആരോഗ്യ ട്രാക്കിംഗ്, ഉറക്ക വിശകലനം, ശാരീരിക വീണ്ടെടുക്കൽ എന്നിവയിൽ ശ്രദ്ധ കേന്ദ്രീകരിക്കുന്ന ഈ സ്മാർട്ട് റിങ്, അത്യാധുനിക സെൻസിംഗ് സാങ്കേതികവിദ്യയോടെയാണ് എത്തുന്നത്. ബ്ലൂടൂത്ത് ലോ എനർജി (LE) കണക്റ്റിവിറ്റി പിന്തുണയ്ക്കുന്ന റിങ്, ഔറ ആപ്പിലൂടെ വിശദമായ ആരോഗ്യ വിവരങ്ങൾ ഉപഭോക്താക്കൾക്ക് ലഭ്യമാക്കും.
കറുപ്പ്, വെള്ളി നിറങ്ങളിൽ ലഭ്യമാകുന്ന അടിസ്ഥാന മോഡലിന് 28,900 രൂപ മുതലാണ് ഇന്ത്യയിലെ വില ആരംഭിക്കുന്നത്. ബ്രഷ്ഡ് സിൽവർ, റോസ് ഗോൾഡ്, സ്റ്റെൽത്ത് എന്നീ പ്രീമിയം നിറങ്ങളിലുള്ളവയ്ക്ക് 39,900 രൂപ മുതൽ വിലവരും. മാർച്ച് 18 മുതൽ ഓൺലൈനായും ഇന്ത്യയിലെ തിരഞ്ഞെടുത്ത 100 ക്രോമ സ്റ്റോറുകൾ വഴിയും ഇത് സ്വന്തമാക്കാം. 4 മുതൽ 15 വരെയുള്ള 12 വ്യത്യസ്ത വലുപ്പങ്ങളിൽ ലഭ്യമാകുന്ന ഈ റിങ്, ഉപഭോക്താക്കളുടെ വിരലിന്റെ വലിപ്പത്തിനനുസരിച്ച് തിരഞ്ഞെടുക്കാവുന്നതാണ്.
Also Read: 7,000 mAh കരുത്തുറ്റ ബാറ്ററിയുമായി ഓപ്പോ K14 5G ഇന്ത്യയിലെത്തി..!
പൂർണ്ണമായും ടൈറ്റാനിയം കൊണ്ട് നിർമ്മിച്ച ഈ റിങ് അലർജി രഹിതവും ഭാരം കുറഞ്ഞതുമാണ്. വലുപ്പമനുസരിച്ച് വെറും 3.3 ഗ്രാം മുതൽ 5.2 ഗ്രാം വരെ മാത്രമാണ് ഇതിന്റെ ഭാരം. 100 മീറ്റർ വരെ ജല പ്രതിരോധം വാഗ്ദാനം ചെയ്യുന്ന റിങ്, 2.8 എംഎം കനവും 7.9 എംഎം വീതിയുമുള്ള ഒതുക്കമുള്ള ഡിസൈനിലാണ് വരുന്നത്. 18-പാത്ത് മൾട്ടി-വേവ്ലെങ്ത് ഫോട്ടോപ്ലെത്തിസ്മോഗ്രഫി (PPG) സംവിധാനം ഉപയോഗിക്കുന്നതിനാൽ ഹൃദയമിടിപ്പും മറ്റ് ബയോമെട്രിക് ഡാറ്റയും വളരെ കൃത്യമായി രേഖപ്പെടുത്താൻ ഇതിന് സാധിക്കുമെന്ന് കമ്പനി അവകാശപ്പെടുന്നു.
നൂതനമായ അൽഗോരിതങ്ങളും റിസർച്ച്-ഗ്രേഡ് സെൻസറുകളും ഉപയോഗിച്ച് ഹൃദയമിടിപ്പ്, ഉറക്കത്തിന്റെ ഘട്ടങ്ങൾ, ശരീരതാപനില, രക്തത്തിലെ ഓക്സിജന്റെ അളവ്, ശ്വസന നിരക്ക് എന്നിവ ഈ റിങ് നിരന്തരം നിരീക്ഷിക്കും. ടോക്കിയോ സർവ്വകലാശാല ഉൾപ്പെടെയുള്ള പ്രമുഖ അന്താരാഷ്ട്ര സ്ഥാപനങ്ങൾ ഇതിന്റെ കൃത്യത സാക്ഷ്യപ്പെടുത്തിയിട്ടുണ്ട്. രാത്രിയും പകലും ഒരുപോലെ പ്രവർത്തിക്കുന്ന സെൻസറുകൾ ഓരോ വ്യക്തിയുടെയും ശാരീരിക മാറ്റങ്ങൾക്കനുസരിച്ച് വ്യക്തിഗതമായ ആരോഗ്യ നിർദ്ദേശങ്ങൾ നൽകാനും പ്രാപ്തമാണ്.
The post സ്മാർട്ട് റിങ് ഇനി ഇന്ത്യയിലും! ഔറ റിങ് 4 പുറത്തിറങ്ങി appeared first on Express Kerala.
