‘ജനനായക’ന് വീണ്ടും കടമ്പ; രാഷ്ട്രീയ പരാമർശങ്ങളിൽ തീരുമാനം ഇനി തിരഞ്ഞെടുപ്പ് കമ്മീഷന്റേത്

വിജയ് നായകനാകുന്ന ബിഗ് ബജറ്റ് ചിത്രം ‘ജനനായക’ന്റെ റിലീസിന് മേൽ വീണ്ടും അനിശ്ചിതത്വം. സിനിമയിലെ രാഷ്ട്രീയ പരാമർശങ്ങൾ കാരണം സെൻസർ ബോർഡ് റിവൈസിങ് കമ്മിറ്റി ചിത്രം വീണ്ടും വിലയിരുത്തിയതിനെത്തുടർന്ന്, അന്തിമ തീരുമാനത്തിനായി വിഷയം തിരഞ്ഞെടുപ്പ് കമ്മീഷന് വിട്ടു. ചൊവ്വാഴ്ച മുംബൈയിൽ വെച്ച് നടന്ന സ്ക്രീനിംഗിന് ശേഷമാണ് സെൻസർ ബോർഡ് ഈ നിർണ്ണായക ശുപാർശ നൽകിയത്. ഇതോടെ ചിത്രത്തിന്റെ ഭാവി ഇനി തിരഞ്ഞെടുപ്പ് കമ്മീഷന്റെ കൈകളിലായി.

പൊങ്കൽ ആഘോഷങ്ങളുടെ ഭാഗമായി ജനുവരി ഒൻപതിന് റിലീസ് ചെയ്യാനായിരുന്നു അണിയറപ്രവർത്തകർ ആദ്യം തീരുമാനിച്ചിരുന്നത്. എന്നാൽ സെൻസർ സർട്ടിഫിക്കറ്റ് ലഭിക്കാത്തതിനെത്തുടർന്ന് റിലീസ് അനിശ്ചിതമായി നീളുകയായിരുന്നു. ചിത്രത്തിന്റെ നിർമ്മാതാക്കളായ കെ.വി.എൻ പ്രൊഡക്ഷൻസ് ആദ്യം മദ്രാസ് ഹൈക്കോടതിയെയും പിന്നീട് സുപ്രീംകോടതിയെയും സമീപിച്ചെങ്കിലും അനുകൂല വിധി ലഭിച്ചിരുന്നില്ല. ഒടുവിൽ നിയമപോരാട്ടങ്ങൾ അവസാനിപ്പിച്ച് ചിത്രം പുനഃപരിശോധനയ്ക്ക് അയക്കാൻ നിർമ്മാതാക്കൾ തീരുമാനിക്കുകയായിരുന്നു.

Also Read:‘കെഡി’യിലെ ഗാനത്തിന് നിരോധനം; അശ്ലീല വരികൾക്കെതിരെ കേന്ദ്ര സർക്കാർ കർശന നടപടി!

സിനിമയിലെ രാഷ്ട്രീയ ഉള്ളടക്കം വരാനിരിക്കുന്ന തിരഞ്ഞെടുപ്പിനെ സ്വാധീനിക്കാൻ സാധ്യതയുണ്ടെന്ന വിലയിരുത്തലിലാണ് തിരഞ്ഞെടുപ്പ് കമ്മീഷന്റെ പരിശോധന ആവശ്യപ്പെട്ടിരിക്കുന്നത്. തമിഴ്നാട്ടിലെ രാഷ്ട്രീയ സാഹചര്യങ്ങൾക്കിടെ വിജയ് ചിത്രത്തിന് നേരിടേണ്ടി വന്ന ഈ തടസ്സം ആരാധകർക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്. തിരഞ്ഞെടുപ്പ് കമ്മീഷന്റെ റിപ്പോർട്ട് വന്നതിന് ശേഷം മാത്രമേ ‘ജനനായകൻ’ തിയേറ്ററുകളിൽ എന്ന് എത്തുമെന്ന് ഉറപ്പിക്കാൻ കഴിയൂ.

The post ‘ജനനായക’ന് വീണ്ടും കടമ്പ; രാഷ്ട്രീയ പരാമർശങ്ങളിൽ തീരുമാനം ഇനി തിരഞ്ഞെടുപ്പ് കമ്മീഷന്റേത് appeared first on Express Kerala.